Nzambi udi nanyi?

1. Mukunda natshi tuana gukombelela Nzambi?

Nzambi wa giamatshidia mwene wafugile yima yagasue. Ashigo nu gisendeselo nga gisugishilo. (Lungimbo 90:2) Muene Gishina gia mene jiabonga jidi mu katshi dia Biblia. (1 Timote 1:11) Mukunda Nzambi watuhuile monyo, tudi naye gumukombelela muene hakhenji.​—Tanga Yatuwuwe 4:11.

2. Nzambi udi luholo lutshi?

Gushi ndo nu muthu wamonelegale Nzambi, mukunda udi nyuma. Idi mukotelesa egi monyo wene udi holo dia yima yagasue afugile idi ha mavu. (Yone 1:18; 4:24) Uvi, tudi gumujiya luholo anuvua nu gutalela milonga ha gumona yima afugile. Gula tua tala mabundu nu yaji ya luholo nu luholo, tuajiya gumona guzumba nu gutema guenji. Gukoma gua mavu nu dilu guamonegesa ngolo jienji.​—Tanga Lomo 1:20.

Tuajiya gulonguga gujiya muabonga matangi enji gula tuatanga Biblia. Gula tuatala, Biblia yanagutudijiga yima Nzambi anaguzumba nu anaguzumba ndo, luholo anukalegela athu milonga, nu luholo anukalagala gula mulonga umoshi wazoga.​—Tanga Lungimbo 103:7-10.

3. Nzambi wanukhala nu jina ba?

Yesu wazuelele egi: “Tata udi mu dilu, jina diaye dia gijila dinemesewe.” (Matayo 6:9) Nzambi udi nu batitre avula, uvi udi nu jina kaka dimoshi. Zuelelo nu zuelelo didi nu luholo luawo lua gutamega jina diene. Mu Giphende, anutamega “Yehowa.”a Uvi athu ako anutamega egi “Yahvé.”​—Tanga Lungimbo 83:18, NW.

Mu Biblia jia vula, jina dia Nzambi diakatuwe; hafundo dienji ahagele batitre Maweze nga fumu Nzambi. Uvi mu tangua asendesele gusonega Biblia, jina dia Nzambi diakhalele hehi nga gubalega 7 000. Yesu wadijigile jina dia Nzambi tangua akhalele muleza athu luholo Nzambi adi.​—Tanga Yone 17:26.

4. Yehowa wana gututangiza ba?

Luholo athu avula adi mumona malamba yamonegese egi Yehowa anagututangiza ndo ba? Athu ako anuzuela egi Nzambi wana gutumonesa malamba ha gutuphaga, uvi ishi ngenyi ndo.​—Tanga Yakoba 1:13.

Nzambi wahanele muthu luendu lua gutomba yima muene hakhenji. Tuanusuanguluga ndo luholo tudi nu luendu lua gutomba gukombelela Nzambi? (Yoshua 24:15) Uvi athu avula anutomba gukalegela ako gubola, yene yabatela athu avula malamba. Yehowa wana vua gikenene mu ndaga jinyinyi jabola.​—Tanga Gisendeselo 6:5, 6.

Yehowa wanagututangiza. Wanatshigina egi tusuanguluge nu monyo. Gualeha ndo udi muza mukatula malamba nu athu adi mu gishina dia malamba. Gutuama dia gukatula malamba ene, udi nu ikuma aabembela tangua dia zonda. Mu longo dia 8, mbatudimujiya ikuma yene.​—Tanga 2 Phetelo 2:9; 3:7, 13.

5. Luholo lutshi lua gusetuga gua Nzambi?

Yehowa udi gututamega tusetuge ha gusolola nenji mu njila ya gukombelela. Wanagututegelela muthu nu muthu hakhenji. (Lungimbo 65:2; 145:18) Wanakhala hehi ha gututotesela. Wanamona ngolo tuanukalagala ha gumusuanguluisa, ata tangua diko tuanukita gubola. Hene, ata tushigo agutagana, tuajiya gukuata ufuta wabonga nu Nzambi.​—Tanga Lungimbo 103:12-14; Yakoba 4:8.

Luholo Yehowa watuhuile monyo, tudi naye kumuzumba gubalega muthu wagasue. (Mako 12:30) Tangua udi mumonegesa guzumba guaye kudi Nzambi ha gulonguga ha gumujiya nu gukalagala milonga adi gututoga, udi musetuga hehi diago nu muene.​—Tanga 1 Timote 2:4; 1 Yone 5:3.