LONGO 6

Gumonesa Haphelo Gishina udi Mutangela Verse

Yone 10:33-36

NDAGA UDI NAYE GUKALAGALA: Ulabigo gutanga verse, gungima wabalega gu ndaga iko. Tshita yagasue ha gula athu adi gugutegelela akotelese luholo verse watangi idi gudivua nu ndaga udi muzuela.

LUHOLO LUA GUYIKALAGALA:

Tomba mbimbi jia ndando. Gungima dia gutanga verse, monesa mbimbi jidi gudivua nu ndaga udi muzuelela. Ha guyikalagala, wajiya gutanga mbimbi jiene jia ndando mahugo muyadi, nga guhula muhu umoshi ha gukuatesa athu ajiye mbimbi yene.

Gula wakalegela mbimbi jia gudisha ha guzuelela matangi adi mu verse, jiya egi athu adi gugutegelela adi mumona lamba ha gukotelesa luholo Biblia idi gudivua nu ndaga udi muzuela.
Monegesa matangi a ndando haphelo. Gula wawambela athu gishina watshigina gutangela verse imoshi, akotelesele luholo mbimbi jia ndando jia verse yene jidi gudivua nu ndaga waawambela.

Tangua udi mukotelesela athu verse, bemba Biblia yaye ya gukangula, ha gukuatesa athu amone gudivua gudi mukatshi dia mbimbi jiaye nu verse watangi.
Zuelela ndaga mu luholo lualeba. Uzuelelago ndaga jiazonda-zonda jishigo gudivua nu ndaga udi mulongesa. Kamba gujiya itshi athu adi gugutegelela ana gujiya gale mu ndaga udi mulongesa. Gungima, kamba gujiya ndaga guvula gutshi udi naye guzuela ha gukuatesa athu akotelese muabonga ndaga udi mulongesa.