MWBR21 02 Referanse jia Mukanda wa Gukalegela mu Gudibungisa gua Lujingu nu Mudimo wa Uklisto
1-7 MARS
UMONYI UDI MU MBIMBI YA NZAMBI | LUTANGO 7-8
“Malongo Tuajiya Guzula Mukunda nu Phundo ya Enya Isalele”
it-1-F diyiji 508 par. 5
Hungu
1Gu Isalele, mafumu anyi akhalele mushiwa mutshima akhalele muzuelela athu. (Ez 10:14) “Mafumu a iphuta” ahanele milambu tangua amanesele gutunga inzo ya tenta. (Lutang 7:1-11) Mu masugu a Nehemiya nganga-nzambi, enya Levi nu “manene a athu,” ‘adivile’ nu ambile kashe mu mikanda mu jina dia enya Isalele. (Neh 9:38–10:27) Tangua enya Isalele akhalele mu mavu a luselenga, akhalele nu ‘mafumu a hungu akhalele mutuameza gudibungisa gua mala anyi athu akhalele mutumbuisa.’ Mukatshi dia mafumu ene, tuajiya gutanga mala 250 adibungishile nu Kore nu Datana nu Abilama nu Ona ha guluisa Moize nu Alona. (Lutang 16:1-3) Moize walandudile utuameji wa Yehowa hene watombele akulu 70 a enya Isalele ha gumukuatesa ha gubata ‘ginemo gia athu,’ hafundo dia gugibata hakhenji. (Lutang 11:16, 17, 24, 25) Mukanda wa Levi 4:15 udi muzuelela ‘mafumu a gu Isalele.’ Yajiya gukhala egi mafumu ene, akhalele azueledi a enya Isalele, atuameji nu manzunji.—Lutang 1:4, 16; Yosh 23:2; 24:1.
it-2-F diyiji 835 par. 9
Lubene
Mu phundo ya Isalele, giphuta gia Lubene giakhalele khanda imoshi nu giphuta gia Simeone nu gia Gade. Akhalele mujinga gu Sud ya inzo ya tenta. Tangua akhalele mukatuga ha fundo dimoshi ha guya ha fundo diko, Lubene wakhalele mutuameza iphuta eyi thathu. Akhalele muhatelela giphuta gia Yuda, Isakale nu gia Zebulona. (Lutang 2:10-16; 10:14-20) Akhalele mutshita nji luholo lumoshi tangua akhalele muhana milambu.—Lutang 7:1, 2, 10-47.
w04-F 1/8 diyiji 25 par. 1
Ndaga jia Ndando Jidi mu Mukanda wa Lutango
Lutango 8:25, 26. Akhalele mutoga enya Levi anyi akhalele mambuta (a gukola) ha gubemba gukalagala midimo yakola, hagula midimo ya enya Levi ilandule gukalegewa mu luholo luatagana. Uvi athu ene, akhalele naye gukuatesa enya Levi ako mu tumidimo tua zonda-zonda gula atshigina. Mangino tuana bemba ndo mudimo wa gulongesa ngatshima tuakola. Uvi mukhuala owu udi gutulongesa longo dia ndando. Mangino gula Muklisto wa gukola ashigo luko nu ngolo jia gutagenesa inemo yavula mu ulondegi wa Yehowa, wajiya gutagenesa tuyinemo tuko tuazonda-zonda tudi gudivua nu ngolo jienji.
Ndaga jia Ndando jia mu Nyuma
it-2-F diyiji 637 par. 4
Ana a Somi
Luholo ana a mala a somi a enya Isalele akhalele mubua mafumu a fami, akhalele nu ginemo gia guzuelela enya Isalele. Yehowa wazuelele mukunda nu gifutshi gia enya Isalele egi: Adi an’enji a “somi.” Abuile an’enji a somi mukunda nu gikotelo muene akotele nu Abalahama. (Guz 4:22) Hagula abambe mionyo yawo Yehowa waatogele egi, “ana a somi agasue adi muvualewa mukatshi dia enya Isalele, nga ana mala a somi a athu nga ana somi a alume a shitu,” adi naye gubuishiwa a gijila. (Guz 13:2) Ana somi agasue ahanewe gudi Nzambi.
8-14 MARS
UMONYI UDI MU MBIMBI YA NZAMBI | LUTANGO 9-10
“Luholo Lutshi Yehowa Wana Tuameza Akombeledi Enji?”
it-1-F diyiji 386 par. 5
Phundo
Gukatula phundo eyi yakoma ha guyibata ha fundo diko, yakhalele mumonesa egi akhalele mulondega ndaga mu luholo lua gushimana. Mukanda wa Lutango mukhapho 33 udi mumonesa egi Moize wahagele phundo yene mafundo hehi nu 40. Enya Isalele akhalelego mukatula phundo gula tuta didi dia gumagana holu dia inzo ya tenta. Uvi gula tuta diakatuga, ene nji akhalele mukatula phundo yawo. ‘Enya Isalele akhalele mukatula phundo yawo nga guhaga phundo yawo phamba mu utuameji wa Yehowa.’ (Lutang 9:15-23) Akhalele mushiga phungi mbadi jia utadi wa siliva ha guwambela phundo yagasue ya enya Isalele ndaga jiazuedi Yehowa. (Lutang 10:2, 5, 6) Gula phungi yadila mangololo, yakhalele mumonesa egi enya Isalele adi naye gukatula phundo. Giphungu gia thomo ashigile phungi eyi, giakhalele mu “lusugu lua 20 lua mbeji ya mbadi ya givo gia mbadi [1512 gutuama dia tangua dietu].” Tangua akhalele mukatula phundo ha guyibata ha fundo diko, mushete wa gikotelo wakhalele gutuama. Gungima, iphuta eyi thathu yakhalele mutuamezewa gudi Yuda yakhalele muhata; giphuta gia Yuda gia Isakale nu gia Zabulona. Gula iphuta eyi yakatuga, enya Geleshona nu enya Melali anyi akhalele mubata ima ya inzo ya tenta akhalele guahata gungima. Gungima, iphuta eyi thathu yakhalele mutuamezewa gudi Lubene yakhalele muhata; giphuta gia Lubene gia Simeona nu gia Gade. Gungima diawo, enya Kehate akhalele mubata ima ya gijila ya mu inzo ya tenta nu iphuta eyi thathu; giphuta gia Efrayime gia Manase nu gia Benyamine, akhalele muhata. Ha gusugisa, iphuta eyi thathu yakhalele mutuamezewa gudi Dane; giphuta gia Dane gia Asele nu gia Nefetali akhalele muya. Ngenyi, iphuta thathu yakhalele gutuama nu iphuta thathu yakhalele gu gisugishilo yakhalele mubamba enya Isalele agasue, handaga iphuta eyi yene yakhalele nu athu avula nu enya ngolo.—Lutang 10:11-28.
w11-F 15/4 diyiji 4 par. 4-5
Luholo Lutshi Tuajiya Gumonesa egi Tuana Tshigina Utuameji wa Nzambi?
Mupostolo Phaula wazuelele egi: “Tumagelenu athu adi gumituameza, khalenu guavuila.” (Heb. 13:17, NWT) Uvi, gutshita ngenyi gushigo ndaga yaleba. Tufezegese gale, dihage ha fundo dia enya Isalele mu masugu a Moize. Tangiza egi mudi muwenda. Gungima dia matangua, tuta diamagana fundo dimoshi. Mushigo mujiya masugu guvula gutshi mbamubalegesa fundo diene? Mbamubalegesa lusugu lumoshi, phoso imoshi, nga mbeji jiavula. Wajiya gudihula egi: ‘Nguzola ima yami yagasue ba, nga isala genji mu makuba?’ Thomo wajiya guzuela egi, ngudi muzola phamba ima ngudi nayo funu luenyelu. Gungima dia masugu azonda, wahuila ha guzola gama gamoshi-gamoshi, wazula desizio dia gukangula ima yaye yagasue. Uvi tangua wamanesela guzola ima yaye yagasue gonze, wamona egi tuta diakatuga ha fundo diakhala! Udi naye gusendesa luko gukanga ima yaye yagasue. Ndaga yene yakhalelego yaleba gudi enya Isalele. Handaga akhalele mukatula phundo yawo “ha guya ha fundo diko gula tuta diakatuga.”—Lutang. 9:17-22.
Luholo lutshi tuana kalagala ndaga gula tuaheta malongo akatuga gudi Nzambi? Tuana kalagala ngolo ha gusendesa gukalegela malongo ene mu “tangua diene ba”? Nga tuana landula getu gukalagala ndaga gifua luholo tuajidila gale? Udi gale mujidila nu malongo ahe-ahe tuazudile atadila: Luholo lua gutuameza gulonguga gua Biblia gu mifulo ya jinzo jia athu, gulongesa ngenji, luholo lua gukalagala gukombelela gua mu fami phoso nu phoso, luholo lua guta maga nu Komite yana tadila ndaga ya mahatshi nu luholo tudi naye gukalagala ndaga nu ginemua tangua tudi gu asamble? Tuana monesa nji egi tuana tshigina utuameji wa Nzambi tangua tuana tshigina malongo ana gutuhana aphangi. Tangua tudi mutshigina guzula ba desizio akola, tushigo naye gusha mutshima mu ndunge jietu, uvi tudi naye gusha mutshima gudi Yehowa nu gu ulondegi wenji. Luholo mona wana kamba ukuateshi gudi sh’enji gula udi mutagana nu usageshi, esue nji tuana kamba ukuateshi mu ulondegi wa Yehowa tangua tuana tagana nu malamba akola a ha mavu awa.
Ndaga jia Ndando jia mu Nyuma
it-1-F diyiji 207 par. 7
Gudibungisa
Funu ya Gudibungisa. Wano wa Pake wakhalele mukalegewa mu givo, wakhalele mukolesa gutshigina gua enya Isalele tangua akhalele mutumagela mukhuala wa Nzambi wa gudibungisa hamoshi ha gumukombelela. Yala wagasue munu wakhalele waphelegeta nu wakhalele mutuna gukalagala wano wa Pake gula ashigo mu vuayaje wakhalele mushiyiwa. (Lutang 9:9-14) Tangua Fumu Ezekiase watamegele enya Yuda agasue nu enya Isalele ha guya gu Yelusalema ha gukalagala wano wa Pake waawambelele egi: ‘Enya Isalele, vutugenu gudi Yehowa mulumbugago gifua muatshitshile akhakhenu. Dibulumuisenu gudi Yehowa zenu ha fundo dienji dia gijila diabuishile muene dia gijila mayilago. Kombelelenu Yehowa Nzambi wenu hagula khabu jienji jiakola jihue. Yehowa Nzambi wenu udi wazala pha nu gisemo nu jikhenda mbagashigo gumibemba gula muavutuga gudi muene.’ (2 Gudi 30:6-9) Nga enya Isalele atunyile gutumagela malongo awa, nga amonesele diago egi atunyi gawo Nzambi. Ngatshima Aklisto ana kalagala ndo mawano ako gifua wano wa Pake, uvi mupostolo Phaula udi gututoga egi tubembigo gudibungisa nu akombeledi a Nzambi. Udi muzuela egi: ‘Tudiwungulugienu mukunda nu gudikolesa ha gudizumba muabonga nu ha gutshita ndaga jiabonga. Tubembigo gudibungisa guetu, tukhadigo gifua athu ako adi mutuna gudibungisa, uvi tudikolesenu, tubalege gutshita ngenyi gifua mudi mumona lusugu lua Fumu ludi gale musuena hehi.’—Heb 10:24, 25; tala CONGRÉGATION.
15-21 MARS
UMONYI UDI MU MBIMBI YA NZAMBI | LUTANGO 11-12
“Mukunda Natshi Tudi Naye Gutuna Khadilo dia Gulaba Guboguta?”
w01-F 15/6 diyiji 17 par. 20
Tukhadigo Mubuita Mutshima gu Ndaga Jiabonga Tudi Muvua
20 Mangino Aklisto avula anago gubua mu muheto wa uthambi. Uvi tudi naye gutuna khadilo dia gulaba guboguta mukunda nu ndaga yabonga nga ndaga imoshi yabola. Gula tudi mutshita ngenyi, Nzambi mbawututuna. Phaula udi muzuela egi: ‘Tushigo naye gulola Yehowa gifua muatshitshile athu ako mukatshi diawo [enya Isalele] na hangima ashiyiwe gu nyoga. Mushigo naye guboguta gifua muabogutshile athu ako mukatshi dienu hangima ashiyiwe gudi muthu wana shiya athu.’ (1 Kolinto 10:9, 10) Enya Isalele akhalele muboguta mukunda nu Moize nu Alona—akhalele muboguta nji mukunda nu Nzambi—akhalele muboguta mukunda nu mana anyi Nzambi waahuile mu luholo lua gushimana. (Lutango 16:41; 21:5) Yehowa wamonele egi guboguta gudi gubola guazonda gubalega gukalagala uthambi ba? Biblia idi muzuela egi nyoga jiashiyile athu avula anyi akhalele muboguta. (Lutango 21:6) Gungima dia matangua azonda, nyoga jiashiyile athu 14 700 anyi akhalele muboguta. (Lutango 16:49) Gula tudi musegulula ima Yehowa ana gutuhana, idi mumonesa egi tudi mulola khadilo dienji dia guhuiminyina. Gutshita ngenyi gushigo ndaga yabonga.
w06-F 15/7 diyiji 15 par. 7
‘Tuna Khadilo dia Gulaba Guboguta’
7 Enya Isalele asombegesele diago khadilo diawo! Ahanele Yehowa mersi avula luholo a ahuluishile mu Kianga gia Benga nu ayimbile jingimbo ha gumutumbuisa. (Guzoga 15:1-21) Tangua Enya Isalele akhalele mu mavu a luselenga, akhalele muvuila enya Kanana woma. Gishina giene alebele muila nu asendesele gukudisa khadilo dia guboguta. Luholo enya Isalele akhalele mutadila ndaga mu luholo luabola, yaatumine ha guboguta mukunda nu Nzambi, hafundo dia gumuhana mersi luholo wa ahuluishile. Gishina giene Nzambi waawambelele egi: ‘Uu nu tangua tshi athu awa abola mbaabemba gungunyemena?’—Lutango 14:27; 21:5.
it-2-F diyiji 715 par. 1
Nguma
Guboguta. Khadilo dia guboguta diana lebesa muila. Tangua enya Isalele azogele gu Ejipitu asendesele guboguta mukunda nu Yehowa egi, mukunda natshi atombele Moize nu Alona ha guatuameza. (Guz 16:2, 7) Ndaga yene yalebesele diago Moize muila hene atogele Yehowa egi wajiya genji gufua. (Lutang 11:13-15) Khadilo dia guboguta diajiya guhaga muthu mu gingoza. Athu anyi akhalele muboguta mukunda nu Moize, Yehowa wakhalele guazula egi adi mulumbugila utuameji wenji. (Lutang 14:26-30) Athu avula afuile mukunda nu khadilo diabola dia guboguta.
Ndaga jia Ndando jia mu Nyuma
it-2-F diyiji 207 par. 3
Mana
Luholo Mana Akhalele. Mana akhalele aphelegeta, akhalele gifua tshiba yaphelegeta yana zoga gu mitshi. Akhalele gufula gifua “gato galondewa nu wigi” nga nu “maji a vumba diabonga.” Gula atua phupha yenji, akhalele guyitelega ha gudia nga guyikalanga ha gulonda ba gato.—Guz 16:23, 31; Lutang 11:7, 8.
22-28 MARS
UMONYI UDI MU MBIMBI YA NZAMBI | LUTANGO 13-14
“Luholo Gutshigina Guana Gutuhana Gikhesa”
w06-F 1/10 diyiji 16-17 par. 5-6
Gikhesa Giana Monesa Gutshigina nu Woma wa Nzambi
5 Yoshua nu Kaleba akhalele muvua egi nga angina gale mu Mavu a Gutendelela. Azuelele egi: Enya Kanana adi gifua “dipha gutuama dietu.” ‘Nzambi jiawo jianago guabamba uvi Yehowa udi nu esue. Mu avuilago woma.’ (Lutango 14:9) Yoshua nu Kaleba akhalele muzuela diago giamatshidia. Handaga ene nu enya Isalele ako, amonele luholo Yehowa wahanele enya Ejipitu nu nzambi jiawo sonyi tangua a atumine ndola kumi. Gungima amonele nji luholo Yehowa ashiyile Farao nu masuta enji mu Kianga gia Benga. (Ngimbo 136:15) Mala kumi anyi ayile mutala gifutshi gia Kanana akhalelego naye guvua woma. Handaga amonele ndaga jiagasue jiakalegele Yehowa gu Ejipitu. Ndaga yene yasagesele Yehowa muavula diago hene wazuelele egi: ‘Uu nu tangua tshi ene mbaatuna gusha gutshigina gudi ame, ngatshima ngatshitshile ndaga jia gushimana mukatshi diawo?’—Lutango 14:11.
6 Yehowa wazuelele diago gishina gia ndaga—khadilo dia mala awa diamonesele diago egi akhalelego nu gutshigina. Yadiago, gutshigina nu gikhesa guana wenda fundo dimoshi. Gishina giene Mupostolo Yone wasonegele mukunda nu hungu dia Uklisto nu mukunda nu ita ya mu nyuma akhalele mulua egi: ‘Gutshigina guana gutukuatesa ha gubinga mavu.’ (1 Yone 5:4) Gukhala nu gutshigina gifua gua Yoshua nu Kaleba guana gutukuatesa ha gulongesa lukuma luabonga lua Ufumu ha mavu a mudidi. Lukuma luene ludi mulongesewa gudi Matemue a Yehowa ba milio gubalega 6. Ako mukatshi diawo adi mambuta, ako mavuala, ako adi nu ukhashi, ako adi nu ngolo, ako ikata (ikalaba). Gushigo nga mbalagaji mumoshi wabingile gale ha gukanga masuta awa a gikhesa njila ha gutagenesa mudimo wawo.—Lomo 8:31.
Ndaga jia Ndando jia mu Nyuma
it-1-F diyiji 740
Gifutshi Nzambi a Hanele Enya Isalele
GIFUTSHI Nzambi ahanele enya Isalele giakhalele giawaha diago. Moize watumile mala 12 ha guya mutala mavu a gutendelela. Waawambelele egi adi naye gubata ndambo ya ima ya mu gifutshi giene. Tangua avutugile abatele mabundu a figi, mabundu a grenade nu mabundu a vinyo anyi mala mbadi abatele gu muhitu! Ngatshima mala ene avuile woma handaga akhalelego nu gutshigina, uvi azuelele egi: ‘Gifutshi giene gidi gia mele nu wigi.’—Lutang 13:23, 27.
29 MARS–4 AVRIL
UMONYI UDI MU MBIMBI YA NZAMBI | LUTANGO 15-16
“Tuna Khadilo dia Lulendo nu dia Gudishila Mutshima”
w11-F 15/9 diyiji 27 par. 12
Yehowa Wana Gugujiya Ba?
12 Tangua enya Isalele akhalele muya mu Mavu a Gutendelela, Kore wabuishile mulonga umoshi wakoma. Wazuelele egi Moize akhalelego mutuameza athu mu luholo luabonga. Gungima, mafumu 250 adibungishile nenji ha gukamba gusombegesa ndaga. Kore nu athu enji akhalele mumona gifua khalele nu ufuta wabonga nu Yehowa. Awambelele Moize egi: ‘Enue na muabalegesa giwa, athu agasue adi muthundu eyi adi a gijila, Yehowa nji udi mukatshi diawo.’ (Lutang. 16:1-3) Akhalele diago nu khadilo diabola dia gudikanduisa nu dia lulendo! Moize waawambelele egi: ‘Yehowa mbawumonesa gula nanyi udi muthu wenji.’ (Tanga Lutango 16:5.) Mu lusugu lua landuile Kore nu athu agasue akhalele gukhanda yenji ashiyiwe.—Lutang. 16:31-35.
w11-F 15/9 diyiji 27 par. 11
Yehowa Wana Gugujiya ba?
11 Moize nu Kore akhalelego nu khadilo dia luholo lumoshi mu ndaga yatadila gunemesa utuameji nu ba desizio a Yehowa. Ngenyi yatshitshile egi Yehowa akhale guatadila mu luholo lua gudisha. Kore wakhalele muenya Kehate mu giphuta gia Levi. Wakhalele nu luendu lua gumona luholo Yehowa wahuluishile enya Isalele mu Kianga gia Benga, wakhalele gukhanda ya athu a gujinginyina tangua Yehowa ashiyile athu anyi akhalelego agujinginyina gu Mulundu wa Sinai. Kore wakhalele nji nu luendu lua gubata mushete wa gikotelo. (Guz. 32:26-29; Lutang. 3:30, 31) Kore wasalele wagujinginyina ivo yavula gudi Yehowa, enya Isalele akhalele nji musuanguluga nu makalegelo enji abonga.
Ndaga jia Ndando jia mu Nyuma
w98-F 1/9 diyiji 20 par. 1-2
Haga Ima ya Ndando ha Fundo dia Thomo!
Gu meso a Yehowa Kore watshitshile gubola guakola. Biblia idi muzuela egi: ‘Hangima, Yehowa wawambelele Moize egi yala owu udi naye gushiyiwa.’ (Lutango 15:35) Mukunda natshi Yehowa wavuile khabu mukunda nu ndaga yatshitshile Kore?
Enya Isalele akhalele nu masugu samano mukunda nu gunona khunyi, gulondega ima ya gudia, gulondega milele nu mafundo a gubanda. Uvi mu lusugu lua sambadi akhalele mukalagala ndaga jia mu nyuma. Yakhalelego ndaga yabola gula muthu waya munona khunyi mu lusugu lua sambadi. Uvi yakhalele mubua ndaga yabola gula wakalagala mudimo wene mutangua dia gukombelela Yehowa. Ngatshima mangino Aklisto anago gulandula luko Mukhuala wa Moize, uvi ndaga jiakhalele mukalagala enya Isalele jidi gutulongesa ha guhaga ndaga jia mu nyuma ha fundo dia thomo mu monyo wetu—Filliphi 1:10.
5-11 AVRIL
UMONYI UDI MU MBIMBI YA NZAMBI | LUTANGO 17-19
“Ngudi . . . Shinda Diaye”
w11-F 15/9 diyiji 13 par. 9
Yehowa Wana Khala Khapo Diaye Ba?
9 Tangiza gale, enya Levi ahetelego shinda dia mavu. Akhalele muhaga gikombelelo gia giamatshidia ha fundo dia thomo, akhalele muzegemena gudi Yehowa. Hene Yehowa awambelele egi: ‘Ame ngudi khapho dienu.’ (Lutang. 18:20) Ngatshima mangino tuana tshita ndo mudimo mu tempelo gifua nganga-nzambi nu enya Levi, uvi tuajiya gulandula gifezegeselo giawo gia gusha mutshima gudi Yehowa egi, mbawutagenesa nzala jietu. Luholo tudi mujinga mu masugu a gisugishilo tudi naye gukudisa khadilo dietu dia gushila Nzambi mutshima egi, muene mbawutagenesa nzala jietu jiagasue.—Yat. 13:17.
w11-F 15/9 diyiji 7 par. 4
Yehowa Udi Khapho Diami
4 Yehowa wawambelele enya Levi egi mbaakhala khapho dienji mu luholo lutshi? Wawambelele egi mbawaahana mudimo wa gukalagala mu inzo yenji ha fundo dia guahana jinda dia mavu. Gukhala ‘nganga-nzambi ya Yehowa’ guene guakhalele khapho diawo. (Yosh. 18:7) Mukanda wa Lutango 18:20 udi mumonesa egi akhalelego mukamba nga gima gimoshi. (Tanga Lutango 18:19, 21, 24.) Enya Levi akhalele muhanewa “gitshinyi giagasue giakumi ginyi enya Isalele akhalele muhana mukunda nu mudimo akhalele mukalagala.” Akhalele muhanewa nji giakumi (10%) gia mbuto jiagasue enya Isalele akhalele muzola nu giakumi (10%) gia shitu akhalele mufuga. Enya Levi nji akhalele muhana giakumi “gia ima ya ndando” akhalele muheta ha gukuatesa nganga-nzambi. (Lutang. 18:25-29) Akhalele muhana nji nganga-nzambi “milambu yagasue ya gijila” inyi enya Isalele akhalele muhana Nzambi. Athu anyi akhalele mu fami jia nganga-nzambi akhalele nu ishina yavula ya gusha mutshima egi Yehowa mbawutagenesa nzala jiawo.
Ndaga jia Ndando jia mu Nyuma
g02-F 8/6 diyiji 14 par. 2
Mungua—Wakhala Gima gia Ndando
Akhalele mukalegela mungua gifua njimbu mu ndaga jiavula. Gishina giene mu Biblia gula athu akota gikotelo giakola, akhalele gugitamega egi: “Gikotelo gia mungua.” Akhalele mudia hangoshi ima ya gumba mungua, gungima akhalele mumba kashe mu mukanda wa gikotelo giawo. (Lutango 18:19, NWT) Ha gutadila Mukhuala wa Moize, akhalele mumba mungua mu milambu yakhalele muwetshiewa holu dia giwetshielo, gutshita ngenyi guakhalele mumonesa egi milambu yene idi yabonga.
12-18 AVRIL
UMONYI UDI MU MBIMBI YA NZAMBI | LUTANGO 20-21
“Monesa Khadilo dia Gudibulumuisa Tangua udi Mutagana nu Umbalagaji”
w19.02-F diyiji 12 par. 19
Khala Muthu wa Gudibulumuisa ha Gusuanguluisa Yehowa
19 Kalagala ngolo ha gutuna gutshita gubola. Tangiza luko Moize. Moize wasalele muthu wa gudibulumuisa ivo yavula nu wakhalele musuanguluisa Yehowa. Uvi gu gisugishilo gia ivo 40 ya lamba yabalegese enya Isalele mu mavu a luselega, Moize wa totesele khadilo dienji dia gudibulumuisa. Phangi’enji wa mukhetu wa muhuluishile gu Ejipitu wakhalele wafile gale nu amufundile gu Kadeshe. Gugima enya Isalele asendesele guboguta egi ashigo mutuamezewa mu luholo luabonga. Akhalele ‘muboguta mukunda nu Moize’ handaga akhalelego nu meya. Ngatshima Yehowa waatuamezele nu waakalegele ndaga jiavula jia gushimana mu njila ya Moize, uvi ene alanduile guboguta. Uvi akhalele nji muboguta mukunda nu Moize gifua muene wakhalele mutunyisa egi meya azogigo.—Lutang. 20:1-5, 9-11.
w19.02-F diyiji 13 par. 20-21
Khala Muthu wa Gudibulumuisa ha Gusuanguluisa Yehowa
20 Moize wavile khabu jiakola, hene atotesele khadilo dienji dia guhuiminyina. Ha fundo dia guzola meya mu seso luholo Yehowa amuwambelele, Moize watotesele gutshigina guenji hene asendesele gubalela (gudingila) athu. Guzuela guenji guakhalele mumonesa egi muene umutshigina guzola meya. Gungima wawasele muhango wenji mbala jiyadi holu dia seso meya azogele avula. Khadilo dia lulendo nu dia khabu diatumine Moize ha gukalagala gubola guakola. (Ngi. 106:32, 33) Luholo Moize atotesele khadilo dienji dia gudibulumuisa, gakhalelego nu luendu lua gungina mu Mavu a Gutendelela.—Lutang. 20:12.
21 Lumene lua Moize ludi gutuhana malongo avula. Thomo, tudi naye gutshita ngolo ha gubamba khadilo dietu dia gudibulumuisa. Gula ndo lulendo luajiya gututuma ha gutshita ndaga yabola nga guzuela ndaga gutangiza ndo. Ya mbadi, malamba ajiya gututuma ha gutotesa khadilo dietu dia gudibulumuisa. Hene, tudi naye gutshita yagasue ha gukhala athu a gudibulumuisa nga tangua tudi mutagana nu usageshi.
w09-F 1/9 diyiji 19 par. 5
Nzuji Munu Wakhala wa Gujinginyina mu Ndaga Jiabonga
Thomo, Yehowa atogelego Moize ha guzuela nu enya Isalele. Uvi muene watshitshile ndaga mu luholo luenji, nu waatamegele egi alumbugi. Ndaga ya mbadi idi egi, Moize nu Alona atumbuishilego Nzambi. Nzambi waawambelele egi: “Muangunemeselego.” (Lutango 20:12) Tangua Moize nu Alona azuelele egi “tudi naye gumizolela meya,” amonesele egi ene atshitshi ndaga mu luholo lua gushimana ha guzola meya uvi Nzambi ndo. Ya thathu, Yehowa watunyishile Moize nu Alona ha gungina mu Mavu a Gutendelela gifua luholo atshitshile nu athu anyi amulumbulugile mu mavu a luselenga. (Lutango 14:22, 23) Ndaga ya nguana idi egi, Moize nu Alona akhalele atuameji a enya Isalele. Nzambi mbawutoga athu adi nu inemo mu ulondegi wenji ndaga jiavula gubalega.—Luka 12:48.
Ndaga jia Ndando jia mu Nyuma
w14-F 15/6 diyiji 26 par. 12
Wana Tadila Gubola gua Athu Gifua Yehowa Ba?
12 Tangua diagasue Alona wakhalele mukalagala gubola, Yehowa wakhalele naye gumuhana ndola mutangua diene. Uvi wakhalele mukotelesa egi Alona akhalelego muthu wabola nu akhalelego nji ha gishina gia gubola guene. Uvi yajiya gukhala egi ndaga jiakhalele mukalegewa nga ndo athu ako akhalele mutuma Alona ha gutshita ndaga yabola. Tangua diagasue akhalele muwambela Alona gubola guenji, wakhalele mutshigina nu mutshima wagasue nu wakhalele mulandula utuameji wa Yehowa. (Guz. 32:26; Lutang. 12:11; 20:23-27) Gishina giene Yehowa wakhalele mutala phamba gutshigina guenji nu khadilo dienji dia gubalumuna mutshima. Gungima dia siekle jiavula ajigulu a Alona ajiyiwe egi ana guvuila Yehowa woma.—Ngi. 115:10-12; 135:19, 20.
19-25 AVRIL
UMONYI UDI MU MBIMBI YA NZAMBI | LUTANGO 22-24
“Yehowa Wana Balumuna Malamba mu Gusuanguluga”
bt-F diyiji 53 par. 5
Alongesele “Lukuma Luabonga Luatadila Yesu”
5 Mangino, akombeledi a Nzambi ana tagana nji nu usageshi gifua akombeledi a Nzambi a mutangua dikulu. Uvi ndaga yene yana guakanga ndo njila ya gulongesa lukuma luabonga. Matangua avula ana gumba aphangi’etu mu bologo nga ndo ana guabata mu ifutshi iko, uvi gutshita ngenyi guana kuatesa aphangi’ene ha gulongesa lukuma luabonga mu mafundo ene. Ha gufezegesa mu sungi ya ita ya mbadi ya mavu a mudidi, Matemue a Yehowa alongesele lukuma luabonga mu ba camp de concentration Nazi. Muenya Yuda mumoshi watagenele nu Matemue a Yehowa udi muzuela egi: “Makalegelo abonga akhalele nu Matemue a Yehowa mu bologo angutshiginyishile diago egi gutshigina guawo guakhalele mukatuga mu Biblia—Gungima ngazudile desizio dia gubua Temue wa Yehowa.”
it-1-F diyiji 909 par. 6
Guheya
Gukhala Mbalagaji wa Yehowa Gudi Guheya. Profete Balama wakalegele ndaga nu guheya guagasue tangua akambele guya muzuela ndaga jiabola gudi enya Isalele, hagula fumu Balake wa gu Moabe a muhane makuta. Uvi Yehowa wa mukangele njila ha gutshita ngenyi. Mupostolo Phetelo wasonegele mukunda nu Balama egi ‘Shitu ya phunda yakhalelego muzuela, yasendesele guzuela gifua muthu nu yabolesele ndaga jia profete waheya.’ Ha gumonesa diago egi Balama wakhalele waheya, mupostolo wakalegele mbimbi ya Greke pa·ra·phro·niʹa, idi mukotelesa egi ‘muto ushigo mutshita muabonga.’—2 Phet 2:15, 16; Lutang 22:26-31.
Ndaga jia Ndando jia mu Nyuma
w04-F 1/8 diyiji 27 par. 2
Ndaga jia Ndando Jidi mu Mukanda wa Lutango
Lutango 22:20-22—Mukunda natshi Yehowa avuidile Balama khabu? Yehowa watunyishile profete Balama ha guya muta enya Isalele mikumbu. (Lutango 22:12) Uvi profete Balama wayile hamoshi nu athu a Balake ha guta enya Isalele mikumbu. Balama wakhalele mutshigina gusuanguluisa fumu wa gu Moabe hagula a muhane makuta. (2 Phetelo 2:15, 16; Yuda 11) Uvi ha fundo egi Balama ate enya Isalele mikumbu, wakhalele muzuela mbimbi jiabonga. Hene, Balama wakambele metode ako. Wawambelele fumu wa gu Moabe ha gutuma ana akhetu abonga anyi akhalele mukombelela Bale ha gutshita uthambi nu mala a gu Isalele. (Lutango 31:15, 16) Ndaga yene yatumine Nzambi ha guvuila profete Balama khabu handaga wakhalele waheya.
26 AVRIL–2 MAI
UMONYI UDI MU MBIMBI YA NZAMBI | LUTANGO 25-26
“Muthu Wabonga Wajiya Guhuluisa Athu Avula Ba?”
lvs-F diyiji 118 par. 1-2
“Lenga Uthambi!”
MULOWI wa jishui wana kamba fundo diabonga dinyi ajiya gukuata jishui jidi mutshigina muene. Wana tomba lundulo gungima ambi ndobo mu muta. Gungima wana nengenena nu guhuiminyina guagasue. Gula ishui ya sendesa gudia lundulo, wana gunana jinga muphushi ngenyi ndobo yana kuata ishui nu wana guyizola gonze.
2 Luholo lumoshi nji athu ajiya gubua mu muheto. Ha gufezegesa, tangua enya Isalele ahetele hehi nu Mavu a Gutendelela, ahagele phundo yawo mu temu dia Moabe. Fumu wa gu Moabe wawambelele Balama egi mbawumuhana makuta avula gula wata enya Isalele mikumbu. Balama wajiyile ndaga akhalele naye gutshita hagula enya Isalele adibatele ene hakhawo malamba. Watombele ana akhetu a gu Moabe gifua ndulo, gungima waatumine mu phundo ya enya Isalele hagula akalagale uthambi nu mala.—Lutango 22:1-7; 31:15, 16; Yatuwuwe 2:14.
lvs-F diyiji 119 par. 4
“Lenga Uthambi!”
4 Mukunda natshi enya Isalele avula abuile mu muheto wa Balama? Handaga akhalele mutangiza phamba gusuanguluisa mila yawo, uvi ajimbidile ndaga jiagasue jiabonga jiaakalegele Yehowa. Enya Isalele akhalele nu ndaga jiavula jiakhalele naye guaatuma ha gusala ya gujinginyina gudi Yehowa. Handaga waazolele mu uhiga gu Ejipitu, waadishile ima mu mavu a luselenga, waabatele mu ubambi uu hehi nu Mavu a Gutendelela. (Hebelu 3:12) Uvi ikhale Yehowa waakalegele ndaga eji jiagasue, ene abuile mu muheto wa uthambi. Mupostolo Phaula wasonegele egi: ‘Tushigo naye gukalagala uthambi gifua luholo ako mukatshi diawo akalegele.’—1 Kolinto 10:8.
Ndaga jia Ndando jia mu Nyuma
it-1-F diyiji 933 par. 5-6
Mudidilo
Idi naye gukhala egi ha gukhaphela athu mavu mu giphuta akhalele mutadila ndaga eji mbadi: Ya thomo akhalele muta mubela, ya mbadi akhalele mutadila gukoma gua giphuta. Yajiya gukhala egi guta mubela guakhalele guakuatesa ha gujiya fundo didi hehi nu mavu giphuta gidi naye guzula. Fundo diene diajiya gukhala gu Nord, gu Sud, gu Est nga gu West, mutemu nga mu milundu. Uvi Yehowa wakhalele muzula desizio mu njila ya mubela akhalele muta. Gutshita ngenyi guakhalele mukuatesa enya Isalele ha gutuna khadilo dia ginjiongo nga gumana mukatshi diawo. (Ish 16:33) Yehowa wakhalele mutuameza ndaga mu luholo lununu hagula mulonga wa giphuta giagasue udivue nu profesi yazuelele Yakobo gutuama egi afue idi mu Gisendeselo 49:1-33.
Gula ata mubela, akhalele mujiya fundo mavu ene adi. Gungima akhalele mukalagala ndaga ya mbadi ha gujiya ukomelo wa mavu ene. ‘Mudi naye guta mubela ha gukhaphela fami jienu mavu. Mbamuhana mavu gudi giphuta nu giphuta gifua mudi guvula gua athu a giphuta giene. Muthu wagasue mbawuzula shinda ha gutadila khanda mubela mbawubua.’ (Lutang 33:54) Akhalele muhana iphuta mavu phamba fundo dinyi mubela waatombela. Uvi ajiya gusombegesa ukomelo wa mavu ene ha gutadila ukomelo wa giphuta. Ha gufezegesa, tangua amonele egi mavu ahanele enya giphuta gia Yuda akhalele abalega gukoma, abatudile gitshinyi giko gia mavu alundile mu giphuta gia Simeona.—Yosh 19:9.