Tangua enya Isalele ayile mutala dimbo mu gisuegi, ayile gumbo dia mukhetu mumoshi, jina dienji Rahabe. Fumu wa gu Yeliko wajiyile ndaga yene, hene atumile masuta enji ha guya mukamba athu ene gumbo dia Rahabe. Mukhetu muene wasuegele mala mbadi holu dia yangi, wawambelele masuta ha guahata gu khanda iko. Wawambelele mala mbadi ayile mutala dimbo mu gisuegi egi: ‘Ngudi mujiya egi Yehowa mbawumikuatesa nu mbawumihana gifutshi. Ngabuba, ngulayenu egi mbamunguluisa nu enya fami yami.’

Mala ene awambelele Rahabe egi: ‘Tuagulaya egi gushigo nga muthu mumoshi wa mu fami yaye mbawushiyiwa.’ Azuelele luko egi: ‘Udi naye gujitshiga shinga yabenga ha fenetre yaye, ngenyi enya fami yaye mbaashiyiwago.’

Gungima Rahabe waabulumuishile ha fenetre nu shinga. Mala ene ayile gu khanda ya milundu, adisuegele guene masugu thathu, gungima avutugile gudi Yoshua. Gungima enya Isalele azawugile Muta wa Yordane, adilondele ha guya mutambula gifutshi. Yeliko yakhalele dimbo dia thomo enya Isalele abingile. Yehowa waawambelele ha gujieta dimbo mbala imoshi mu lusugu; akhalele naye gutshita ngenyi mu masugu 6. Uvi mu lusugu lua 7, ajietele dimbo mbala 7. Gungima nganga-nzambi jiashigile phungi, masuta ambile milolo yakola ya ita. Ibayi ya dimbo yamuanganele! Uvi inzo ya Rahabe yakhalele holu dia gibayi yabuilego. Rahabe wahulugile nu enya fami yenji handaga washidile Yehowa mutshima.

Mene jia gubua gua Yeliko jiamuanganele mu ifutshi yagasue ya enya Kanana. Mafumu avula adivile ha gudibungisa ha guluisa enya Isalele. Uvi enya Gibeona adivile ha gutshita ndaga mu luholo luko. Asudigile milele ya gufua, ayile gudi Yoshua, amuwambelele egi: ‘Tuakatuga mu gifutshi gia gualeha. Tuavi mene jiatadila Yehowa nu ndaga jiakalegele muene enya Ejipitu nu enya Moabe. Diloge egi mbamushigo gutuluisa, ngenyi mbatubua enya mudimo wenu.’

Yoshua watshiginyile ndaga yazuelele athu ene, adivile egi mbaashigo gualuisa. Uvi gungima dia masugu thathu, avile egi athu ene akhalelego mu gifutshi gia gualeha. Adi mu gifutshi gia Kanana. Yoshua wahudile enya Gibeona egi: ‘Mukunda natshi muatuhuigile?’ Azuelele egi: ‘Tuavile woma! Tuajiyile egi Yehowa Nzambi wenu udi gumiluila. Tuabuba mutushiyigo.’ Yoshua watagenesele ndaga jiaalayele muene, waabembele nu monyo.

Gungima, mafumu thano a enya Kanana adibungishile nu masuta awo avula ha guya muluisa enya Gibeona. Yoshua nu masuta enji ayile phipha-phipha ha gukuatesa enya Gibeona. Ita yasendesele mu gimenegena gia lusugu lua landuile. Enya Kanana asendesele gulenga mu mafundo agasue. Hakhalele ene mulenga, Yehowa wanogesele may’a-nzanza akoma. Gungima Yoshua watogele Yehowa ha gumagenesa kumbi. Sendese hafugile Nzambi ima, kumbi khenji dimaganele galego; na mukunda natshi Yoshua watogele Yehowa ha gumagenesa kumbi? Idi handaga Yoshua wakhalele mushila Yehowa mutshima. Kumbi diamaganele, diashiwugilego uu nu tangua enya Isalele abingile mafumu a enya Kanana nu masuta awo.