Enya Isalele abembele luko gukombelela Yehowa, asendesele gukombelela nzambi jia mambo. Uvi tangua enya Amona a aluishile, nzambi jiene jiaakuateselego. Enya Isalele amonele malamba ivo yavula. Gungima atogele Yehowa egi: ‘Tuatshitshi gubola. Tuabuba tuhuluisa ha mago a mbalagaji jietu.’ Enya Isalele abishidile isongo yawo, asendesele luko gukombelela Yehowa. Yehowa akhalelego mutshigina egi enya Isalele alandule gumona malamba.

Enya Isalele atombele suta mumoshi wa ngolo ha guatuameza ha guya muluisa enya Amona; suta muene jina dienji Yefeta. Yefeta wawambelele Yehowa egi: ‘Ngudi gudiloga egi, gula wangukuatesa ha gubinga ita, mbanguguhana muthu wagasue mbawuzoga muthu wa thomo ha guza gunguyamba tangua mbanguvutuga gu inzo.’ Yehowa wategelele gisambu gia Yefeta, wamukuatesele nji ha gubinga ita.

Tangua Yefeta wavutugile gu inzo, muthu wa thomo wajile gumuyamba yakhalele mun’enji wa mukhetu; wakhalele mun’enji mumoshi ha mumoshi. Mona muene wakhalele mushiga gangoma nu gukina. Aye mujiya ndaga Yefeta watshitshile? Wawungulugile laji dienji, wazuelele egi: ‘Oo, mun’ami! Wangubogola muila. Ngalayi Yehowa ndaga imoshi. Ha guyitagenesa, ngudi naye gugutuma ha guya mukalegela Yehowa mudimo gu tabernakle gu Shilo.’ Uvi mun’enji wazuelele egi: ‘Tata, gula walayi Yehowa ndaga imoshi, udi naye guyitagenesa. Uvi ngudi gugutoga ndaga imoshi, ngubembe nguye ngubalegese tangua nu mafuta ami a akhetu gu milundu mbeji mbadi, ngungima mbanguya giwa gu Shilo.’ Mun’a Yefeta wakalegele Yehowa mudimo monyo wenji wagasue gu tabernakle. Givo nu givo, mafuta enji akhalele muya gu Shilo ha gumutala.

Nganga-nzambi wakoma Eli wakhalele nu ana a mala mbadi akhalele mukalagala mudimo wa unganga-nzambi gu tabernakle. Majina awo akhalele Hofeni nu Fineyase. Akhalelego mutumagela mikhuala ya Yehowa; akhalele mukalegela athu ndaga mu luholo luabola diago. Tangua enya Isalele akhalele mubata milambu gudi Yehowa, Hofeni nu Fineyase akhalele mutomba gitshinyi gia mbiji giabalega gubonga ha gudia. Eli wakhalele muvua ndaga jiakhalele mutshita an’enji, uvi gakhalelego mutshita nga gima. Yehowa wabembele genji egi ndaga jia luholo elu jilandule gukalegewa ba?

Ikhale mu tangua diene Samuele wakhalele mona wa zonda, uvi galanduilego gifezegeselo gia Hofeni nu Fineyase. Yehowa wakhalele musuanguluga nu Samuele. Lusugu lumoshi, hakhalele Samuele ya gubanda, wavile dijui dimoshi gumutamega mu jina dienji. Wazugile mbala imoshi, wayile phushi gudi Eli, wazuelele egi: ‘Ame yowu!’ Uvi Eli wamuwambelele egi: ‘Ngagutamegelego, vutuga ubande.’ Samuele wavutugile mubanda. Gungima wavile dijui diene gumutamega luko. Tangua Samuele wavile dijui diene mbala ya thathu, Eli wakotelesele egi yakhalele Yehowa wakhalele mutamega Samuele. Wamuwambele egi gula wavua luko dijui diene, zuela egi: ‘Yehowa, zuela. Muenya mudimo waye udi gugutegelela.’

Samuele wavutugile luko mubanda. Gungima dijui diatamegele luko egi: ‘Samuele! Samuele!’ Samuele wazuelele egi: ‘Zuela muenya mudimo waye udi mutegelela.’ Yehowa wamuwambelele egi: ‘Wambela Eli egi ngudi gumuhana ndola nu fami yenji. Muene udi mujiya egi an’enji adi mutshita ndaga jiabola mu tabernakle yami, uvi gashigo mutshita nga gima.’ Mu gimenegena, Samuele wakangudile mufulo wa tabernakle gifua luholo luakhalele mutshita muene. Wakhalele muvua woma ha guwambela nganga-nzambi wakoma ndaga jiazuelele Yehowa. Uvi Eli wamutamegele, wamuhudile egi: ‘Mun’ami, ndaga itshi Yehowa wa guwambela? Nguwambele ndaga jiagasue.’ Hene Samuele wamuwambelele ndaga jiagasue.

Yehowa walanduile gukuatesa Samuele hakhalele muene mukula. Enya Isalele agasue ajiyile egi Yehowa watombele Samuele ha gukhala profete nu nzuji.