Kolesa Luko Ufuta Waye nu Yehowa

GIVO nu givo, athu avula ana vutuga mu hungu dia Uklisto. ‘Gusuanguluga guana khala guavula mu dilu’ gula muthu wavutuga mu hungu! (Luka 15:7, 10) Gula wazolewe mu hungu gungima wavutuga, jiya egi Yesu nu anjelo nu Yehowa ana khala nu gusuanguluga luholo wazudile desizio dia guvutuga luko mu giamatshidia. Gula udi mukolesa ufuta waye nu Yehowa, wajiya gubinga malamba udi mutagana nawo. Malamba atshi wajiya gutagana nawo? Itshi yajiya gugukuatesa?

MALAMBA ATSHI WAJIYA GUTAGANA NAWO?

Aphangi avula ana landula guleba muila ikhale avutudiwe gale mu hungu. Yajiya gukhala egi udi mukotelesa luholo Fumu Davidi wadivile. Ngatshima amutotesele gubola guenji, wazuelele egi: ‘Ndaga jiabola ngakalegele jidi gungunemela.’ (Ngi. 40:12; 65:3) Gula muthu wavutuga gudi Yehowa, wajiya gulandula gudisagesa nga guvua musonyi ivo yavula. Phangi Isabelle,a wakalegele ivo gubalega 20 tangua diazolewe muene mu hungu. Udi muzuela egi: “Ngakhalelego mutshigina egi Yehowa wajiya gungutotesela.” Gula udi mubemba egi muila ugulebe, ufuta waye nu Yehowa wajiya guleba luko muavula. (Ish. 24:10) Kalagala ngolo hagula ndaga yene yigubuilago.

Athu ako ana gudisagesa egi ashigo atagana ha gukalagala ndaga jiajiya guakuatesa ha gukolesa luko ufuta wawo nu Yehowa. Gungima dia guvutudiwa mu hungu, phangi Antoine wazuelele egi: “Ngajimbidile ndaga jiagasue ngakhalele mujiya nga gutshita tangua ngavutugile mu hungu.” Aphangi avula anyi ana gudivua luholo elu ana gudihana diago ndo muavula mu ndaga jia mu nyuma.

Ha gufezegesa, gula gikudi giabolesa inzo, fumi’a inzo wajiya guleba muila gula wasendesa gutangiza mudimo nu tangua diavula inzo yene yajiya guzula ha guyilondega. Luholo lumoshi nji, gula ufuta waye nu Yehowa wabolele mukunda nu gubola wakalegele, wajiya gusendesa gutangiza egi yajiya gutoga ngolo jiavula ha gulondega luko ufuta waye n’enji. Uvi gudi nu ndaga jiajiya gugukuatesa.

Yehowa udi gutuwambela egi: ‘Luenyelu izenu tudi vuisenu.’ (Yesh. 1:18) Ujimbilago egi wakalegele ngolo jiavula ha ‘gudivuisa nu Yehowa.’ Yehowa wana guguzumba luholo wana kalagala ngolo. Ujimbilago nji egi luholo wavutugile gudi Yehowa, wamuhanele njila ha gumonesa egi Diabulu udi muenya mambo!—Ish. 27:11.

Luholo wavutugile gudi Yehowa, wasuenele hehi n’enji, muene nji udi gugulaya egi mbawusuena hehi nu aye. (Yak. 4:8) Idi ndaga yabonga gula athu ako ajiya egi wavutuga luko mu hungu, uvi udi naye gukalagala ndaga jiko jiavula. Udi naye gulandula gukolesa guzumba guaye mukunda nu Yehowa. Luholo lutshi wajiya guyitshita?

DIHAGELE MAFELELA ANYI WAJIYA GUTAGENESA

Kamba gudishila mafelela anyi wajiya gutagenesa. Yajiya gukhala egi aye muwunguluga ndaga walongugile jiatadila Yehowa nu laji diatuhanele muene mukunda nu Phaladiso. Uvi henyaha udi naye gulondega luko programe yaye ya ndaga jia mu nyuma, gifua: Gulongesa muavula, guya mu gudibungisa nu gubalegesa tangua hamoshi nu aphangi Aklisto. Tutadilenu mafelela ako.

Khala muta maga muavula nu Yehowa. Yehowa wana jiya egi gula walandula gudisagesa mukunda nu gubola wakalegele, yajiya gukhala lamba gudi aye ha gumukombelela. (Lomo 8:26) Uvi udi naye ‘gufubidila nji mu gukombelela,’ ha guwambela Yehowa egi udi mutshigina gukhala nu ufuta wakola nu muene. (Lomo 12:12) Andrej udi muzuela egi: “ngakhalele mumona egi idi ndaga yakola; ngakhalele nji muvua musonyi, uvi tangua ngakhalele mutshita gisambu, ngakhalele gudivua muabonga. Ngahetele guhuima guavula.” Gula ushigo mujiya ndaga wajiya gutoga Yehowa mu gisambu, longuga isambu ya Fumu Davidi munu wabalumuine mutshima mu mukanda wa Ngimbo mukhapho 51 nu 65.

Khala mulonguga Biblia lusugu nu lusugu. Gutshita ngenyi mbagugukuatesa ha gukula mu nyuma nu ha guzumba Yehowa muavula. (Ngi. 19:7-11) Phangi Felipe udi muzuela egi: “Luholo ngakhalelego nu programe ya gulonguga Biblia lusugu nu lusugu, ngalebele mu nyuma nu ngakhalelego musuanguluisa Yehowa. Ngatshiginyilego egi ngutune luko gusuanguluisa Yehowa, hene ngazudile desizio dia gutanga Biblia lusugu nu lusugu.” Aye nji wajiya gutshita ngenyi. Gula udi nu funu ya ukuateshi ha gujiya ndaga wajiya gulonguga, wajiya gutoga ukuateshi gudi phangi mumoshi wa gukula mu nyuma.

Kolesa luko ufuta waye nu aphangi’aye a Aklisto. Athu avula anyi ana vutuga mu hungu ana gudisagesa egi aphangi a mu hungu ajiya guavuila khabu. Phangi Larissa udi muzuela egi: “Ngakhalele muvua musonyi wavula diago. Ngakhalele gudivua egi ngatshitshile ndaga imoshi yabola yasagesele aphangi a mu hungu. Ngakhalele gudivua ngenyi masugu avula diago.” Khala musha mutshima egi akulu nu aphangi ako a gukula mu nyuma ana tshigina gugukuatesa ha gukolesa luko ufuta waye nu Yehowa. (Tala galuanda “Ndaga Akulu adi Naye Gukalagala”) Aphangi ana khala nu gusuanguluga luholo wavutugile mu hungu, ana tshigina nji egi aye ukhale nu gusuanguluga!—Ish. 17:17.

Itshi yajiya gugukuatesa ha gukhala nu ufuta wakola nu aphangi mu hungu? Udi naye gudihana muavula mu ndaga aphangi ana kalagala, gifua: Guya mu gudibungisa gua mu hungu nu mu mudimo wa gulongesa hamoshi nu aphangi ene. Luholo lutshi gutshita ngenyi guajiya gugukuatesa? Phangi Felix udi muzuela egi: “Aphangi akhalele mutshigina egi nguvutuge mu hungu. Ngadivuile diago nu ndando. Mukut’awo agasue angukuatesele ha gudivua egi ngudi diago mukatshi dia fami. Yangukuatesele ha gujiya egi Yehowa wangutotesele ha gulandula gumukombelela.”—Tala galuanda “Ndaga Udi Naye Gukalagala.”

ULEBIGO MUILA!

Satana mbawulandula gugukambela “milonga” ha gugulebesa muila hagula ukolesago luko ufuta waye nu Yehowa. (Luka 4:13) Hene, sendese mangino khala mukolesa ufuta waye nu Yehowa.

Yehowa wazuelele mukunda nu imeme yenji egi: ‘Mbangukamba imeme yago yatotele, mbanguvutuluisa imeme yawungile, mbangulala yago yanamenele ibanji nu mbangukolesa yago idi ya guleba.’ (Ezek. 34:16) Yehowa wakuatesele gale aphangi avula ha gulondega luko ufuta wawo nu muene. Sha mutshima egi Yehowa wana tshigina gugukuatesa ha gulandula gukolesa ufuta waye n’enji.