Gitshinyi 9
Gikombelelo gia Giamatshidia Mbagigusuanguluisa Mayilago!
1. Itshi tuajiya guheta gula ‘tuasuena hehi nu Nzambi’?
YEHOWA wanazumba athu anagumutshitshila. Gula wakombelela Yehowa, mbawuheta gusuanguluga gudi muene sendese luenyolu uu nu mumasugu adi muza gutuama. Bibiliya idi muzuela egi: “Musuene hehi nu Nzambi, nu muene mbawusuena hehi nu enue.”—Yakoba 4:8.
2. Luholo tshi tuajiya gusuena hehi nu Nzambi, nunji luholo tshi gudi naye gumuenega mu gulomba guetu?
2 Hagusuena hehi nu Nzambi, udi naye gulonguga nu gutshitshila Mbimbi yenji. Gula udi mulomba gifua mudi gutshigina guenji, Yehowa udi naye guvua gulomba guaye nu gugutaya. Mutumiwi Yone wasonegele egi: “Tala gudifelela gutudi n’ago gu phala ya Nzambi: Gula tudi mumulomba nga gima’tshi gifua mudi gutshigina guenji, muene udi mutuvuila. Gifua mutudi mujiya etshi udi mutuvuila hatudi mumulomba gima giagasue. Tudi mujiya etshi, tudi muheta gituamulomba.”—1 Yone 5:14, 15.
3-7. Luholo tshi tuajiya guheta ndunge jidi mukatuga gudi Nzambi, nu luholo tshi jiajiya gutukuatesa?
3 Luyadi, gula udi musuena hehi nu Nzambi, mbawuguhua ndunge jia gulonda ndaga jia lujingu lua lusugu nu lusugu. Bibiliya idi muzuel’egi: “Gula mungoshi ya mukatshi dienu gashigo nu jindunge muene ajilombe gudi Nzambi.”—Yakoba 1:5.
4 Luholo tshi Ndunge jidi mukatuga gudi Nzambi jiajiya gugukuatesa? Gudiangela, jiajiya gugukuatesa hagujiya milonga ishigo musuanguluisa Yehowa. Wajiya gulonguga hagujiya mukunda natshi milonga yene idi yabola nu itshi wajiya gutshita haguituna. Ujiyi wa luholo lununu wajiya gugukuatesa hagulenga ndaga jiavula jia lamba jidi mubuila athu avula. Ha gufezegesa, gutumaga malongo a Nzambi adi muzuela egi tukhale aguphelegeta mu makalegelo guanakuatesa athu a Nzambi hagulenga lamba dia guzula vumu dishigo gutangiza, misongo yanazanguwa mu njila ya uthambi, nunji gushiya gua mahata.
5 Mu milonga tshi Ndunge jia Nzambi jiajiya gugukuatesa luko? Jiajiya gugukuatesa haguheta gusuanguluga mu lujingu luaye. Jiajiya gugukuatesa aye gutomba gutshita ndaga jiabonga, gifua gutema gutshitshila muabonga fualanga jiaye. Jiajiya nji gugukuatesa hagutomba ndaga ya ndando nu inyi ishigo ya ndando.
6 Ndunge jia Nzambi mbajigukuatesa nji hagukhala nu ufuta wabonga nu athu ako. Wajiya gukhala nu lujingu lua gusuanguluga nu enya jigo diaye. Mba ukuata ufuta wa kumbi dialeha nu wabonga nu athu ako, nunji mbawunemesewa, nga gudi athu anatshitshilago Nzambi.
7 Luyadi, gula wazangula ndunge jidi mukatuga gudi Nzambi mbawutalela lujingu mu phila ingoshi yabonga. Mbajigukuatesa haguluisa malamba nu gikenene gia lujingu. Nunji, mbawukhala nu gudikanda hagutshita ima, nu gutalela masugu adi muza gutuama nu matangi abonga. Matangi abonga mbaagubatela guhuiminyina gua mutshima nu muila wabonga.—Ishima 14:30; Yeshaya 48:17.
8. Gima tshi gi mbawushigo mukhala nagio woma, gula udi mutshitshila Nzambi?
8 Gula watshitshila Nzambi wa giamatshidia, mbawudikula mu uhiga wa woma udi nawo athu ago ashigo mutshitshila Nzambi. Mukunda umujiy’egi athu agufua anajinga luko ndo gu malumba, ngenyi, mbawushigo muvua woma wa mvumbi ndo. Ndaga ya wanasha mutshim’egi Nzambi mbawufuzumuna athu agufua, hangenyi mbawushigo muvua woma wa gufua. Mukunda udi mujiya egi Nzambi udi muenya ngolo jiagasue, mbawushigo muvila nganga nga aloji woma.—Yone 8:32.
Athu Abonga Mbajinga Hamavu
9-11. Akhuatshi mbaajinga mu Phaladisu, nu akhuatshi mbaashigo mungina muene?
9 Gula wasuena hehi nu Nzambi, mbawushigo muvua woma wa masugu adi muza gutuama. Gifua muho utuamonyi, Bibiliya yazuelele milonga yavula i tudi mumona hamavu mu masugu awa. Yehowa udi gutuwambela egi ima i tudi mu mona idi ya kumbi diazonda; gualeha ndo Ufumu wa Nzambi mbawumubuisa mavu wawa phaladisu.—Luka 21:10, 11, 31; 23:43.
10 Khuta athu anasuena hehi nu Yehowa nu anamutshitshila ene mbaajinga mu Phaladisu. Bibiliya idi muzuel’egi: “Gitshidi giazonda, athu abola mbatota, mbawakamba, mbawamonyigo. Athu adi mudibulumuisa mbakhala mu mavu, mbasuanguluga mukunda nu guzela muila nu guhuima.”—Ngimbo 37:10, 11.
11 Athu adi mushaga gu mikhuala ya gulongologa ya Nzambi mbaatotesa monyo ivuo nu ivuo. (2 Tesalonike 1:8, 9) Mbaakuluga sha. Mbaasanga Satana nu mademo enji mu gufua gua mayilago. (Yatuwuwe 20:10, 14) Uvi athu agasue amuzegemena gudi Yehowa nu adi gumutshitshila mbaakhala nu guhuima mu Phaladisu hamavu.
Masugu a Bonga Adi Muza Gutuama!
12. Itshi idi Bibiliya muzuela mukunda nu masugu adi muza gutuama?
12 Yehowa udi muwongega ima yavula yabonga mukunda nu athu anagumutshigina! Tala ndaga jidi Mbimbi yenji muzuela mukunda nu Phaladisu ya hamavu:
● Ima ya gudia mbaikhala yavula: ‘Mavu mbaazola bule diavula, mbuto [ima ya gudia] mbajitutumuga holu dia milundu.’—Ngimbo 72:16.
● Jinzo Jiabonga: “Athu ami mbatunga jinzo, mbakhala muene.”—Yeshaya 65:21.
● Mudimo wabonga: ‘Ene mbazala pha nu gusuanguluga mukunda nu midimo i mbayakuatela mago awo. Mudimo mbawutshita ene mbawukhala nu guzela muila.’—Yeshaya 65:22, 23.
● Misongo mbaikhadigo: “Gushigo nu muthu mungoshi udi mukhala mu mavu etu mbawukumuna egi: ‘Ngudi muvua misongo.’”—Yeshaya 33:24.
● Ikata mbaikhadigo: ‘Meso a ifofo mbatuwuwa, afua matshui mbavua. Gikata mbagisomboga gifua shitu ya ngulungu, afua makano mbahaga miyelele ya gusuanguluga.’—Yeshaya 35:5, 6.
● Lamba, gutataganya, gufua mbagukhadigo: [Nzambi] mbawukungula masoji agasue gu meso awo, gufua mbagukhadigo luko. Madilo gashigo mukhala luko nga mitataganyi nga gubala, ndaga ya ndaga jia gudiangela jiahua.”—Yatuwuwe 21:4.
● Ita mbaikhadigo: “[Nzambi] udi musugisa ita yagasue ha mavu.”—Ngimbo 46:9.
● Monyo wa ivuo nu ivuo: “Athu abonga mbahingana mavu, nu mbakhala hene ivuo nu ivuo.”—Ngimbo 37:29.
13. Khuta nanyi wajiya gubuisa mavu wawa phaladisu, nu mukunda natshi?
13 Athu ajiyilego gutshita ima ii yagasue, uvi Yehowa udi nu ngolo jia gutagenesa ima yagasue ii yanazuela muene. Gushigo nga gima gimoshi giajiya gumutunyisa hagutshita ima ei idi mutshigina muene. Bibiliya idi muzuel’egi: “Ndaga ya gudi Nzambi gushigo gima giakola ha gutshitshiwa.”—Luka 1:37.
14. Luholo tshi wajiya gungina mu njila ya monyo wa ivuo nu ivuo?
14 Mu njila ya Alondolodi enji, Yehowa udi muhana athu agasue luendu lua ‘gungina gu mufulo wazonda,’ nu gungina mu njila idi mutuameza gu monyo wa ivuo nu ivuo. Wajiya gukhala mukhatshi dia athu agusuanguluga amutshigina ndaga ei yanazuela Nzambi. Tshitshila gikombelelo gia giamatshidia hagula Yehowa aguhane gusuanguluga ivuo nu ivuo!—Matayo 7:13, 14.
[Foto idi ha diyiji diagasue 31]