Giamatshidia Giatadila Anjelo

Yehowa wana tshigina egi tulonguge ndaga jiatadila fami yenji ya mu dilu. Mukatshi dia enya fami yene tumumona Anjelo anyi ana tamegewa egi ‘ana a Nzambi.’ (Yobo 38:7) Ndaga itshi Biblia yana zuela mukunda nu anjelo? Mudimo utshi anjelo ana tshita? Anjelo agasue ana khala mu fami ya Nzambi ba?

1. Anjelo adi akuatshi?

Yehowa wadiangele gufuga anjelo gutuama dia gufuga mavu. Anjelo ene ana khala mu dilu, ana monega ndo handaga ana khala nyuma gifua Nzambi. (Hebelu 1:14) Anjelo ana khala avula diago, muanjelo wagasue wana khala nu makalegelo a gudisha nu anjelo ako. (Gumonesa 5:11) Ana “landula mikhuala ya [Yehowa], ana tumagela mbimbi yenji.” (Ngimbo 103:20) Mu tangua dikulu, matangua ako Yehowa wakhalele mutuma anjelo ha guwambela athu mbimbi yenji, ha gukuatesa nu guhuluisa akombeledi enji. Mangino nji, Anjelo ana tuameza Aklisto gudi athu adi mutshigina gulonguga ndaga jiatadila Nzambi.

2. Satana nu bademo enji adi akuatshi?

Anjelo ako asalelego ya gujinginyina gudi Yehowa. Muanjelo wa thomo walumbugile, wana “tamegewa egi Diabulu nu Satana, munu wana huiga athu a ha mavu agasue.” (Gumonesa 12:9) Satana wakhalele mutshigina gukhala mutuameji, hene wahuigile athu a thomo, gungima wahuigile nji anjelo ako ha gulumbugila Nzambi. Anjelo anyi alumbugile ana tamegewa egi bademo. Yehowa waakayele mu dilu hene ajile ha mavu, gualeha ndo mbawaashiya.​—Tanga Gumonesa 12:9, 12.

3. Luholo lutshi Satana nu bademo ana huiga athu?

Satana nu bademo ana huiga athu avula mu njila ya wanga; wanga udi luholo luabola lua guta maga nu nyuma jiabola. Ha gufezegesa, athu avula anaya gudi athu ana tala themua ha guphonga, nganga-ngombo, athu ana jiya ndaga jiza mubua gutuama, nu aloji. Athu ako anaya mukamba mbugi jinyi jiana saga nu wanga ha guasaga. Bademo ana huiga nji athu ha gutshigina egi ajiya guta maga nu athu a gufua. Uvi Yehowa wana gututemesa egi: “Muyigo gudi nganga-ngombo, muyigo nji mumona athu ana zuela ndaga mbajibua gu matuama.” (Levi 19:31) Wana gututemesa hagula Satana nu bademo atuhuigigo. Ana khala mbalagaji jia Nzambi, nu ana kamba gututshita gubola.

TUKAMBE GUJIYA NDAGA JIAVULA

4. Anjelo ana kuatesa athu ha gulonguga ndaga jiatadila Yehowa

Anjelo a Nzambi ana longesa ndo mbala imoshi lukuma luabonga gudi athu. Uvi, ana tuameza akombeledi a Nzambi gudi athu adi mutshigina gulonguga ndaga jiatadila Nzambi. Tanga Gumonesa 14:6, 7, gungima zuelelenu mihu eyi yalandula:

• Mukunda natshi tudi nu funu ya ukuateshi wa anjelo ha gulongesa lukuma luabonga?

• Udi nu gusuanguluga luholo wajiya egi anjelo ajiya gugutuameza ha guya gudi athu adi mutshigina gulonguga Biblia ba? Mukunda natshi?

5. Tuna wanga

Satana nu bademo adi mbalagaji jia Yehowa. Adi nji mbalagaji jietu. Tanga Luka 9:38-42, gungima zuelelenu muhu owu walandula:

• Luholo lutshi bademo ana kalegela athu ndaga?

Tuajiyilego gutamega bademo gumbo dietu. Tanga Mikhuala 18:10-12, gungima zuelelenu mihu eyi yalandula:

• Mu maluholo atshi bademo ana kamba gutuhuiga nga guta maga nu esue? Ndaga jitshi jia midimo ya phipha jiana kalegewa ha fundo wana jinga?

• Udi mutangiza egi idi ndaga yabonga luholo Yehowa watutunyishile midimo ya wanga ba? Mukunda natshi?

Tala VIDEO, gungima zuelelenu mihu eyi yalandula.

VIDEO: ‘Khalenu Mbalagaji jia Diabulu’ (5:02)

• Udi mutangiza egi shinga Palesa wajitshigile mun’enji yakhalele yabola ba? Mukunda natshi?

• Itshi Palesa wakhalele naye gutshita ha gudibamba hagula bademo amusagesago?

Aklisto a giamatshidia ana khala mbalagaji jia bademo. Tanga Makalegelo 19:19 nu 1 Kolinto 10:21, gungima zuelelenu muhu owu walandula:

• Mukunda natshi tudi naye gukatula ima yagasue idi gudivua nu wanga?

6. Wajiya gubinga Satana nu bademo enji

Satana wana tuameza bademo. Uvi anjelo a gujinginyina ana tuamezewa gudi Mikaele fumu ya anjelo, jina dienji diko Yesu. Mikaele udi nu ngolo jiavula ba? Tanga Gumonesa 12:7-9, gungima zuelelenu mihu eyi yalandula:

• Nanyi udi nu ngolo jiavula: Mikaele nu anjelo enji nga Satana nu bademo enji?

• Udi mutangiza egi alandudi a Yesu adi naye guvila Satana nu bademo enji woma ba?

Wajiya gubinga Satana nu bademo enji. Tanga Yakoba 4:7, gungima zuelelenu muhu owu:

• Luholo lutshi wajiya gudibamba ha gulenga Satana nu bademo?

NDAGA WALONGUGA

Anjelo a gujinginyina ana gutukuatesa. Satana nu bademo enji ana khala mbalagaji jia Yehowa, ana huiga athu mu njila ya wanga.

Mihu ya Guvutugila

• Luholo lutshi anjelo a Yehowa ana kuatesa athu ha gulonguga ndaga jiatadila Yehowa?

• Satana nu bademo enji adi akuatshi?

• Mukunda natshi ushigo naye gutshita nga ndaga imoshi idi gudivua nu wanga?

NDAGA JIKO JIA NDANDO

Tala ndaga jidi mumonesa egi Yesu udi Mikaele fumu ya anjelo.

“Qui est l’archange Michel?” (Longo edi didi mu jw.org)

Tala ndaga jidi mutshiginyisa egi Diabulu gashigo khadilo diabola nga matangi abola ana khala mu mutshima wetu.

“Le Diable: principe du mal ou personne réelle?” (Longo edi didi mu jw.org)

Tanga longo edi ha gumona luholo mukhetu mumoshi wabembele midimo ya bademo.

“Elle a trouvé un but dans la vie” (Inzo Yaleha ya Mutaledi 1 Juillet 1993 ya français)

Tala luholo Satana wana kalegela wanga ha guhuiga athu.

“La vérité sur la magie et la sorcellerie” (La route qui mène à la vie éternelle: L’avez-vous trouvée? gitshinyi gia 5)