Wajiya Gukhala nu Gusuanguluga gua Giamatshidia

1. Luholo lutshi gukhala nu “funu ya utuameji wa Nzambi” guana gutukuatesa ha gukhala nu gusuanguluga?

GUSUANGULUGA gua giamatshidia gushigo gusuanguluga tuana guvua gungima guhui. Uvi idi gusuanguluga muthu wajiya gukhala nago monyo wenji wagasue. Luholo lutshi? Mu diskur dia Yesu holu dia mulundu, wazuelele egi: “Gusuanguluga gudi nu athu adi mujiya egi adi nu funu ya utuameji wa Nzambi.” (Mat. 5:3) Yesu wakhalele mujiya egi athu afugiwe nu nzala yakola ya gujiya nu gukombelela Yehowa Nzambi Mufugi wawo. Luholo Yehowa udi “Nzambi wa gusuanguluga,” athu ana gumukombelela ana khala nji nu gusuanguluga.—1 Tim. 1:11.

2-3. (a) Ha gutadila ndaga jiazuelele Yesu, akuatshi ajiya gukhala nu gusuanguluga? (b) Itshi tuza muzuelela mu longo edi? Mukunda natshi idi nu ndando?

² Mbatukhala nu gusuanguluga phamba gula tushigo mutagana nu ndaga jia lamba ba? Ndo. Mu diskur dia Yesu holu dia mulundu, wazuelele ndaga imoshi ya gushimana. ‘Athu anyi adi mudila’ mukunda nu malamba adi mutagana nawo nga mukunda nu gubola akalegele, ajiya gukhala nu gusuanguluga. Wazuelele nji egi: “Athu adi mumonesewa lamba mukunda nu ndaga jiabonga” nga anyi adi “mushingiwa” handaga adi alandudi a Klisto, ajiya gukhala nu gusuanguluga. (Mat. 5:4, 10, 11) Uvi luholo lutshi tuajiya gukhala nu gusuanguluga gula tudi mutagana nu ndaga jia luholo elu?

³ Yesu wamonesele egi tuajiya gukhala nu gusuanguluga gua giamatshidia gula tudi nu funu ya utuameji wa Nzambi nu tudi nu ufuta wakola n’enji, uvi ndo mukunda nu lujingu luabonga tuana khala nalo. (Yak. 4:8) Luholo lutshi tuajiya guyitshita? Mu longo edi tuza muzuelela ndaga thathu jiajiya gutukuatesa ha gukhala nu gusuanguluga gua giamatshidia.

KHALA MUTANGA BIBLIA NU GUYILONGUGA

4. Ha gutadila Ngimbo 1:1-3 ndaga itshi ya thomo tudi naye gukalagala ha gukhala nu gusuanguluga gua giamatshidia?

⁴ NDAGA YA THOMO: Ha gukhala nu gusuanguluga gua giamatshidia, tudi naye gutanga Biblia nu guyilonguga. Yesu wafuanesele Mbimbi ya Nzambi nu ima ya gudia. Athu nu shitu ana khala nu funu ya ima ya gudia ha gukhala nu monyo. Uvi phamba athu ajiya gutanga Biblia. Yene ndaga adi naye gutshita. Hene Yesu wazuelele egi: “Muthu gashigo naye gukhala nu monyo phamba mukunda nu mapha, uvi mukunda nu mbimbi jiagasue jidi muzoga mu kano dia Yehowa.” (Mat. 4:4) Tudi naye gutanga Biblia lusugu nu lusugu. Muyimbi wa ngimbo wazuelele egi: ‘Gusuanguluga gudi nu muthu udi mutumagela mukhuala wa Yehowa nu udi guwutanga phipha nu muanya.’—Tanga Ngimbo 1:1-3.

5-6. (a) Ndaga jitshi tuajiya gulonguga mu Biblia? (b) Luholo lutshi gutanga Biblia guajiya gutukuatesa?

⁵ Yehowa wana gutuzumba, watuhanele malongo abonga mu Biblia ajiya gutukuatesa ha gukhala nu gusuanguluga. Tuana longuga ndaga jiana tshigina muene mukunda nu esue, nu luholo tuajiya gukuata ufuta n’enji nu ndaga tudi naye gukalagala hagula atutotesele gubola guetu. Tuana longuga nji felela diabonga diatuhanele muene mukunda nu masugu adi muza. (Yel. 29:11) Ndaga eji jia giamatshidia tuana longuga mu Biblia jiana gutukuatesa ha gukhala diago nu gusuanguluga!

⁶ Tudi mujiya egi Biblia yana khala nu malongo abonga ajiya gutukuatesa lusugu nu lusugu. Gula tudi mukalegela malongo ene, mbatukhala diago nu gusuanguluga. Ngatshima tualeba muila mukunda nu ndaga jia lamba tudi mutagana najio, tudi naye guzula tangua dia gutanga Biblia nu gutangigiza ndaga tudi mutanga. Yesu wazuelele egi: “Gusuanguluga gukhale nu athu adi muvua mbimbi ya Nzambi nu adi guyitumagela!”—Luka 11:28.

7. Itshi yajiya gugukuatesa ha guheta gubonga gua ndaga udi mutanga mu Biblia?

⁷ Khala musuanguluga nu ndaga udi mutanga mu Biblia. Tufezegese gale. Tangiza gale egi muthu mumoshi watelega ima wana suanguluga nayo. Uvi ushigo diago nu tangua dia gudia nga ndo matangi aye adi tutu-tutu handaga udi mutangiza ndaga jiko. Ngenyi wadia ima yene phushi-phushi nu guvua diago ndo gufula gua ima yene. Uvi gungima dia gudia wakotelesa egi wakhadi naye gudia mage-mage ha gusuanguluga nu ima yene. Idi nji luholo lumoshi nu gutanga Biblia. Gula tudi mutanga Biblia phushi-phushi, tuajiyilego diago gusuanguluga nu ndaga tudi mutanga. Hene khala muzula tangua dia gutanga Biblia. Tangiza nji luholo ndaga jiene jiakalegewe nu athu akalegele ndaga jiene. Gula watshita ngenyi, mbawukhala nu gusuanguluga.

8. Luholo lutshi “muhiga wafubidila nu watema” wana tagenesa ginemo gienji? (Tala nji mbimbi gosh’a diyiji.)

⁸ Yesu watombele “muhiga wafubidila nu watema” ha gutuhana ima ya gudia ya mu nyuma mu tangua diatagana. Tuana heta diago ima yagasue ya mu nyuma tuana khala nayo funu.b (Mat. 24:45) Muhiga wafubidila wana gutuhana malongo ana katuga mu Biblia. (1 Tes. 2:13) Malongo ene ana gutukuatesa ha gujiya ndaga Yehowa wana tshigina. Gishina giene tuana tanga Inzo Yaleha ya Mutaledi nu Réveillez-vous ! nu malongo adi mu jw.org. Tuana londega nji gudibungisa guetu guagasue gua mu hungu. Mbeji jiagasue tuana tala JW Télédiffusion gula idi guene. Gula tudi mutshita ndaga eji jiagasue, mbatukhala hehi ha gukalagala ndaga ya mbadi yajiya gutukuatesa ha gukhala nu gusuanguluga.

KHALA MUTUMAGELA MIKHUALA YA YEHOWA

9. Ndaga itshi ya mbadi yajiya gutukuatesa ha gukhala nu gusuanguluga gua giamatshidia?

⁹ NDAGA YA MBADI: Ha gukhala diago nu gusuanguluga, tudi naye gutumagela mikhuala ya Yehowa. Muyimbi wa ngimbo wasonegele egi: ‘Muthu wagasue wana vila Yehowa woma nu wana wenda mu njila jienji wana khala nu gusuanguluga.’ (Ngi. 128:1) Guvila Yehowa woma gudi mukotelesa gumunemesa muvuala ha gutuna gutshita ndaga jianago gumusuanguluisa. (Ish. 16:6) Hene tudi naye gutshita yagasue ha gulandula gutumagela mikhuala ya Yehowa idi mu Biblia yatadila ndaga jiabonga nu jiabola. (2 Kol. 7:1) Mbatukhala nu gusuanguluga gula tudi mukalagala ndaga jiana zumba Yehowa nu tudi mutuna ndaga jiana gumusagesa.—Ngi. 37:27; 97:10; Roma 12:9.

10. Ha gutadila Roma 12:2, itshi tudi naye gukalagala?

¹⁰ Tanga Roma 12:2. Muthu wajiya gujiya egi Yehowa udi watagana ha guzula desizio mukunda nu ndaga jiabonga nu jiabola. Uvi udi naye nji gutumagela mikhuala ya Nzambi mu monyo wenji. Ha gufezegesa, muthu wajiya gujiya egi mafumu a leta adi atagana ha gusha mikhuala yatadila luholo lua guwendesa tumiyo nga bamoto mu njila. Uvi yajiya gukhala egi muthu muene gana tshiginago gutumagela mikhuala yene. Wana bata gamiyo nga moto mu vitese jiakola luholo ludi mutshigina muene. Tuana monesa mu makalegelo etu egi gutumagela mikhuala ya Yehowa gudi nu ndando mu monyo wetu. (Ish. 12:28) Davidi wadivile nji ngenyi, wawambelele Yehowa egi: ‘Aye wana gungudijiga njila idi mubata gu monyo. Phala yaye idi nu gusuanguluga guavula; koko guaye gua madia gudi nu gusuanguluga ivo nu ivo.’—Ngi. 16:11.

11-12. (a) Gula tualeba muila nga ndo tudi gudisagesa, itshi tushigo naye gutshita? (b) Luholo lutshi mbimbi jidi mu Filiphi 4:8 jiajiya gutukuatesa tangua tudi mutomba saga jia gubalegesa tangua?

¹¹ Gula tudi nu gikenene nga ndo tualeba muila mukunda nu malamba, tuana khala nu funu ya gukalagala ndaga yajiya gutukuatesa ha gubemba gudisagesa. Gutshita ngenyi gushigo ndaga yabola, uvi tudi naye gumonesa gutema hagula tukalagalago ndaga yajiya gusagesa Yehowa.—Ef. 5:10-12, 15-17.

¹² Mupostolo Phaula wasonegele Aklisto a gu Filiphi ha gulandula gutangigiza ndaga “jidi jiabonga, . . . jishigo jia usala, . . . jinyi jidi mukuatesa athu ha gukhala nu guzumba, . . . [nu] jidi jiatagana.” (Tanga Filiphi 4:8.) Phaula gasonegelego mukanda wene ha guzuelela saga jia gubalegesa tangua, uvi ndaga jiasogele muene jiajiya gutukuatesa ha gutomba saga muabonga. Wajiya gutaga verse yene mu luholo luko egi: “Landulenu gutangigiza ngimbo jidi jiabonga, filme jidi jiatagana nu saga jia video jidi naye gutumbuishiwa.” Gutshita ngenyi mbagugukuatesa ha gujiya saga jiana tshigina Nzambi. Tuana tshigina gutumagela mikhuala ya Yehowa mu monyo wetu. (Ngi. 119:1-3) Henyaha tutadilenu ndaga iko yajiya gutukuatesa ha gukhala nu gusuanguluga gua giamatshidia.—Makal. 23:1.

KHALA MUHAGA NDAGA JIA MU NYUMA HA FUNDO DIA THOMO

13. Ndaga itshi ya thathu yajiya gutukuatesa ha gukhala nu gusuanguluga gua giamatshidia? (Yone 4:23, 24)

¹³ NDAGA YA THATHU: Khala mukamba gujiya gula wana haga ndaga jia mu nyuma ha fundo dia thomo. Yehowa udi Mufugi wetu, hene tudi naye gumukombelela. (Gumo. 4:11; 14:6, 7) Ndaga yabalega ndando mu monyo wetu idi gukombelela Yehowa mu luholo luana tshigina muene, yakotelesa “gumukombelela mu nyuma nu mu giamatshidia.” (Tanga Yone 4:23, 24.) Tuana tshigina egi nyuma ya Nzambi itutuameze hagula gukombelela guetu gudivue nu giamatshidia gidi mu Biblia. Tudi naye guhaga ndaga jia mu nyuma ha fundo dia thomo, ikhale tudi mu gifutshi ginyi atunyishile gale mudimo wetu. Mangino aphangi’etu gubalega 100 adi mu bologo handaga adi Matemue a Yehowa.c Ikhale ngenyi, ana tshita yagasue ha gukombelela, gulonguga Biblia nu guwabela athu ako ndaga yatadila Nzambi nu Ufumu wenji! Tangua athu ana gutushinga nu ana gutusagesa, tuana khala nu gusuanguluga handaga tuana jiya egi Yehowa udi nu esue nu mbawutukuatesa.—Yak. 1:12; 1 Phet. 4:14.

GIFEZEGESELO GIABONGA TUAJIYA GULANDULA

14. Ndaga itshi yabuidile phangi Jovidon gu Tadjikistan?

¹⁴ Aphangi’etu ako ataganele nu ndaga jia lamba, uvi akhalele nu gusuanguluga gua giamatshidia handaga akalegele ndaga thathu tuakatuga guzuelela. Tutadilenu ndaga yabuidile phangi Jovidon Bobojonov gu Tadjikistan, gu Russie. Watunyile mudimo wa gisuta hakhalele muene nu ivo 19. Mu 4 Octobre 2019 maphulushi ayile gumukuata gumbo dienji, amumbile mu bolongo mukunda nu mbeji jiazonda. Azuelele egi udi mbundudi. Athu asendesele guzuelela ndaga yene mu Internet mu ifutshi yavula. Akhalele muezuela egi abetele phangi muene ha gumushinjiga ha gudiloga egi udi naye gukalagala mudimo wa gisuta. Gungima tribinale yazuelele egi udi naye gumbiwa mu bologo. Hene amumbile mu bologo uu nu tangua prezida wa gifutshi giene wahanele njila ha gumuzola. Mu tangua diene phangi Jovidon wasalele ya gujinginyina gudi Nzambi nu wabambele gusuanguluga guenji. Luholo lutshi? Tangua diagasue wakhalele mujiya egi udi nu funu ya utuameji wa Nzambi.

15. Luholo lutshi phangi Jovidon wakhalele muheta ima ya mu nyuma hakhalele muene mu bologo?

¹⁵ Tangua phangi Jovidon wakhalele mu bologo, walanduile guheta ima ya gudia ya mu nyuma ngatshima gakhalelego nu Biblia nu mikanda yetu iko. Itshi ya mukuatesele? Aphangi akhelele gumubatela ima ya gudia nu akhalele gumusonegela mukhapho wa lusugu holu dia kuba akhalele gumubatela ima. Ndaga yene yamukuatesele ha gutanga Biblia nu ha guyitangigiza lusugu nu lusugu. Tangua amuzolele mu bologo, wazuelele ndaga imoshi mukunda nu athu anyi khenji ataganelego nu malamba akola egi: “Idi nu ndando ha gukalegela tangua dienu ha mudi mu guhuima ha gutanga Biblia nu mikanda yetu iko ha gujiya ndaga jiavula jiatadila Yehowa.”

16. Phangi Jovidon washile matangi’enji mu ndaga jitshi?

¹⁶ Aphangi’etu ana tumagela mikhuala ya Yehowa. Phangi Jovidon galanduilego gutangigiza ndaga jiabola amukalegele nu gatshitshilego nga ndaga imoshi yabola. Uvi walanduile gusha matangi enji gudi Yehowa nu mu ndaga jiana zula Yehowa nu ndando. Wakhalele muzula tangua dia gutala ima ya fugile Nzambi. Gimenegena giagasue wakhalele musuanguluga gutegelela luholo tunjila tuana yimba. Mu phipha wakhalele mutala ngonda nu themua. Wazuelele egi: “Ima eyi yafugile Yehowa yakhalele gungusuanguluisa nu gunguhana gikhesa.” Gula tudi muhana Yehowa mersi mukunda nu ima yana gutuhana muene nu malongo enji, mbatukhala nu gusuanguluga. Gusuanguluga guene mbagutukuatesa ha gukolesela mu malamba.

17. Gula tudi mutagana nu malamba gifua ataganele nayo phangi Jovidon, gubonga gutshi mbatuheta gula tualandula gukolesela? (1 Phetelo 1:6, 7)

¹⁷ Phangi Jovidon wakhalele nji muhaga ndaga jia mu nyuma ha fundo dia thomo. Wajiyile egi gusala ya gujinginyina gudi Yehowa gudi nu ndando. Yesu wazuelele egi: “Udi naye gukombelela phamba Yehowa Nzambi waye, muene hakhenji udi naye gukalegela mudimo wa gijila.” (Luka 4:8) Mafumu a masuta nu maphulushi akhalele mutshigina egi Jovidon abembe gukombelela Yehowa. Uvi, lusugu nu lusugu phangi Jovidon wakhalele mukombelela muavula hagula Yehowa a mukuatese alandule gukhala nu gutshigina guakola nu hagula galebigo muila. Walanduile gukombelela Yehowa ngatshima amukalegele ndaga mu luholo luabola. Mangino udi nu gusuanguluga guavula handaga udi nu gutshigina guakola gubalega gunu gakhalele nago gutuama egi amukuate, amubete nu amumbe mu bologo.—Tanga 1 Phetelo 1:6, 7.

18. Luholo lutshi tuajiya gubamba gusuanguluga guetu?

¹⁸ Yehowa wana jiya ndaga tuana khala najio funu ha gukhala nu gusuanguluga gua giamatshidia. Gula udi mukalegela ndaga thathu tuazuelela jiana bata gusuanguluga, mbayigukuatesa ha gubamba gusuanguluga guaye ngatshima udi mutagana nu malamba. Ngenyi mbawukhala nji hehi ha guzuela egi: ‘Gusuanguluga gudi nu athu anyi Yehowa udi Nzambi wawo!’—Ngi. 144:15.