Khalenu Gudihana Gikhesa mu Gudibungisa gua mu Hungu

1. Mukunda natshi tuana hana bakomantere mu gudibungisa gua mu hungu?

MUKUNDA natshi tuana guya mu gudibungisa gua mu hungu? Tuana guya ha gutumbuisa Yehowa. (Ngi. 26:12; 111:1) Tuana guya nji mu gudibungisa guene ha gudihana gikhesa mu tangua edi dia lamba. (1 Tes. 5:11) Tangua tuana hana bakomantere mu gudibungisa gua mu hungu, tuana tumbuisa Yehowa nu tuana hana aphangi ako gikhesa.

2. Mu itshinyi itshi ya gudibungisa gua mu hungu tuana khala nu luendu lua guhana komantere?

² Phoso nu phoso tuana khala nu luendu lua guhana bakomantere mu gudibungisa gua mu hungu. Ha gufezegesa mu gudibungisa gua gu suga ya phoso, tuana hana bakomantere mu gulonguga gua Inzo Yaleha ya Mutaledi. Mu gudibungisa gua mukatshi dia phoso, tuana hana bakomantere mu gitshinyi Ndaga jia Ndando jia mu Nyuma, Gulonguga gua Biblia mu Hungu nu mu itshinyi iko yana toga egi athu ahane mvutu.

3. Ndaga jitshi jiajiya gutukanga njila ya guhana bakomantere? Luholo lutshi Hebelu 10:24, 25 yajiya gutukuatesa?

³ Mukut’etu agasue tuana tshigina gutumbuisa Yehowa nu guhana aphangi’etu Aklisto gikhesa. Uvi ndaga gudi nu ndaga jiajiya gutukanga njila ya guhana komantere. Tuajiya guvua woma ha guhana komantere. Yajiya gukhala egi tudi mutshigina guhana komantere, uvi gula tuathuphula koko ashigo gututomba muavula gifua luholo tudi mutshigina. Itshi yajiya gutukuatesa? Ndaga mupostolo Phaula wasonegele Aklisto akhalele muzuela Hebelu jiajiya gutukuatesa. Tangua diakhalele muene mukotelesa mukunda natshi gudibungisa gudi nu ndando, wazuelele egi tudi naye gutshita ngolo ha ‘gudihana gikhesa.’ (Tanga Hebelu 10:24, 25.) Gula tuajiya egi, tangua tuana hana komantere ikhale yahihia yana hana athu ako gikhesa, mbayitukuatesa ha gutuna guvua woma ha guthuphula koko. Gula atutombelego muavula ha guhana bakomantere, tudi naye gukhala nu gusuanguluga luholo aphangi ako ahetshi luendu lua guhana bakomantere.​—1 Phet. 3:8.

4. Ndaga jitshi thathu tuza muzuelela mu longo edi?

⁴ Mu longo edi, tuza mumona thomo luholo tuajiya guhana athu ako gikhesa gula tudi mu hungu diazonda, mu hungu diene athu avula ashigo muthuphula mago ha guhana bakomantere. Gungima, tuza mumona luholo tuajiya guhana athu ako gikhesa gula tudi mu hungu diakoma, mu hungu diene athu avula adi muthuphula mago ha guhana bakomantere. Gugisugishilo, tuza mumona luholo tuajiya guhana bakomantere abonga adi muhana athu ako gikhesa.

KHALENU GUDIHANA GIKHESA MU HUNGU DIAZONDA

5. Gula mu hungu dietu tushigo athu avula, itshi tuajiya gutshita ha guhana athu ako gikhesa?

⁵ Mu hungu diazonda nga mu hunji, athu aguhana bakomantere ana khala azonda. Matangua ako gula mutuameji wahula muhu guana khalago nga nu muthu wana thuphula koko ha guhana mvutu. Mu tangua diene, mutuameji wana nengenena ndambo uu nu tangua phangi mumoshi uza muthuphula koko. Gudibungisa gua luholo elu guajiyilego guhana aphangi gikhesa. Itshi wajiya gutshita? Khala muthuphula koko muavula ha guhana komantere, gula watshita ngenyi mbawukuatesa nji athu ako ha guhana bakomantere muavula.

6-7. Itshi tuajiya gutshita ha gutuna guvua woma ha guhana komantere?

⁶ Itshi wajiya gutshita gula udi muvua woma ha guhana komantere? Udi sagesago, athu avula nji ana vua woma. Uvi hagula uhane aphangi a mala nu a akhetu gikhesa, tshita ngolo ha gutuna guvua woma wa guhana komantere. Luholo lutshi wajiya guyitshita?

⁷ Wajiya guheta malongo ako ajiya gugukuatesa anyi azogele gale mu Inzo Yaleha ya Mutaledi.b Ha gufezegesa, malongo ene ana zuelela luholo wajiya gudilondega muabonga ha guhana komantere. (Ish. 21:5) Gula walondega muabonga longo mbamulonguga, mbayikhala yaleba gudi aye ha guhana komantere. Khala muhana nji komantere jiahihia. (Ish. 15:23; 17:27) Gula udi muhana mvutu jiahihia mbayigukuatesa ha gutuna guvua woma. Ha fundo dia guzuela ndaga jiavula, hana komantere yahihia idi mukuatesa aphangi ha gukotelesa ndaga udi mutshigina guzuela. Gula wahana komantere yahihia mu mbimbi jiaye hakhaye, mbayimonesa egi wadilondega muabonga diago, udi mukotelesa nji muabonga ndaga mudi mulonguga.

8. Luholo lutshi Yehowa wana tadila gikhesa tuana kalagala ha guhana komantere?

⁸ Itshi wajiya gutshita gula wakalegela malongo awa agasue, uvi udi mulandula guvua woma ha guhana komantere jiavula? Jiya egi Yehowa wana suanguluga muavula luholo wana tshita ngolo ha guhana bakomantere. (Luka 21:1-4) Yehowa gana gututoga ndo ha gukalagala ndaga jinyi tuajiyilego gutshita. (Fili. 4:5) Kamba gujiya ndaga wajiya gutshita, zula desizio dia gukalagala ndaga yene, toga Yehowa ha gugukuatesa. Thomo wajiya gusendesa guhana komantere jiahihia.

KHALENU GUDIHANA GIKHESA MU HUNGU DIAKOMA

9. Lamba ditshi wajiya gutagana nadio gula udi mu hungu diakoma?

⁹ Gula mu hungu dienu mudi nu alongeshi avula, wajiya gutagana nu lamba dia luholo luko. Yajiya gukhala egi, mbala jiavula wana thuphula koko ha guhana komantere ana gugutomba ndo handaga mu hungu dienu athu avula ana thuphula mago ha guhana komantere. Ha gufezegesa, phangi wa mukhetu Danielle wana tshigina guhana bakomantere mu gudibungisa gua mu hungu.c Wana kotelesa egi guhana komantere gudi mukatshi dia ndaga tuana tshita ha gukombelela Yehowa. Gudi nji luholo lua guhana athu ako gikhesa nu lua gukolesa gutshigina guenji mu ndaga jiana longesa Biblia. Uvi tangua diayile muene mu hungu diakoma, akhalelego gumutomba mbala jiavula hakhalele muene muthuphula koko ha guhana komantere. Matangua ako wakhalele gudizogela, gakhalelego muhana nga komantere. Udi muzuela egi: “Ngakhalele muvua khabu. Ngakhalele muvua gifua angumina gima gimoshi gia ndando. Tangua ndaga yene yakhalele mukalegewa mbala jiavula mu gudibungisa, ngakhalele mumona gifua mutuameji wakhalele mutshita ndaga yene nu khuta.”

10. Itshi tuajiya gutshita ha guheta luendu lua guhana komantere?

¹⁰ Aye nji wadivuile gale gifua phangi Danielle ba? Gula idi ngenyi, ndaga yene yajiya gugutuma ha guzuela egi, ngushigo luko muthuphula koko, ngumutegelela gami komantere jia athu ako. Uvi ulebigo muila. Itshi wajiya gutshita? Wajiya gulondega komantere jiavula jia guhana mu gudibungisa gua mu hungu. Ngenyi gula agutombelego ha guhana mvutu tangua wathuphula koko mu mbala ya thomo, ajiya gugutomba tangua uza muthuphula koko mu mbala iko. Tangua udi gudilondega mukunda nu gulonga gua Inzo Yaleha ya Mutaledi, kamba gujiya luholo paragrafe yagasue idi gudivua nu muto wa lumene wa longo diene. Gula watshita ngenyi mbawuheta komantere jiabonga jia guhana mu gudibungisa. Wajiya nji gulondega komantere mu paragrafe jidi muzuelela malongo a Biblia anyi akhala akola ha gukotelesa. (1 Kol. 2:10) Mukunda natshi? Handaga athu avula ana thuphulago mago mu paragrafe jiene. Itshi wajiya gutshita gula wakalegela ndaga eji jiagasue tuamona, uvi ashigo gugutomba ha guhana komantere? Wajiya gumona mutuameji gutuama dia gudibungisa, umuwambela egi ngudi mutshigina ungutombe ha guhana mvutu ya muhu wuwu.

11. Mukanda wa Filiphi 2:4 udi gutukuatesa ha gutshita itshi?

¹¹ Tanga Filiphi 2:4. Mu ukuateshi wa nyuma ya Nzambi mupostolo phaula wakuatesele Aklisto ha gukamba gubonga gua athu ako. Luholo lutshi tuajiya gukalegela longo diene tangua tudi mu gudibungisa gua mu hungu? Tushigo naye gujimbila egi athu ako nji ana khala nu funu ya guhana bakomantere mu gudibungisa.

12. Luholo lutshi tuajiya guhana athu ako gikhesa mu gudibungisa? (Tala nji gifuanesa.)

¹² Tuzulenu gale gifezegeselo gimoshi. Tangua wana guta maga nu mafuta aye, wana tshigina guzuela muavula uvi ene guabembela ndo tangua dia guzuela ba? Ndo sha! Wana tshigina egi ene nji azuele tangua mudi muta maga. Luholo lumoshi nji mu gudibungisa, tudi naye gubembela athu ako tangua dia guhana bakomantere. Gula tudi mubembela aphangi’etu a mala nu a akhetu tangua dia guhana kombantere mbatuahana diago gikhesa. (1 Kol. 10:24) Tutadilenu luholo tuajiya guyitshita.

13. Itshi tuajiya gutshita ha gubembela athu ako tangua dia guhana komantere?

¹³ Thomo, tudi naye guhana komantere jiahihia ha gubembela athu ako tangua dia guzuela. Akulu nu aphangi ako adi nu eksperianse yavula adi naye guhana gifezegeselo giabonga mu ndaga yene. Ikhale komantere yaye idi yahihia, uvi uzuelelago ndaga jiavula mu mbala imoshi. Gula wazuelele ndaga jiagasue jidi mu paragrafe athu ako mbaashigo mumona ndaga iko ya guzuela. Ha gufezegesa mu paragrafe yiyi, tuazuelela ndaga mbadi jia ndando. Ya thomo guhana komantere jiahihia. Ya mbadi gutuna guzuelela ndaga jiavula mu mbala imoshi. Gula udi muthu wa thomo watombewa ha guhana mvutu mu paragrafe yiyi, zuelela phamba ndaga imoshi hafundo dia guzuelela yagasue mbadi.

14. Mukunda natshi tudi naye gumonesa gutema tangua tudi mutshigina guthuphula koko? (Tala nji gifuanesa.)

¹⁴ Monesa gutema tangua udi mutshigina guthuphula koko ha guhana komantere. Handaga gula tudi muthuphula koko muavula, yajiya gutuma mutuameji ha gututomba muavula ikhale athu ako khenji aheta galego luendu lua guzuela. Ndaga yene yajiya gulebesa athu ako muila, abembi gawo guthuphula mago.​—Mulo. 3:7.

15. (a) Itshi tudi naye gutshita gula atutombelego ha guhana mvutu? (b) Luholo lutshi mutuameji wajiya gumonesa egi udi gudisha ha fundo dia athu agasue? (Tala galuanda “Gula udi Mutuameza.”)

¹⁵ Gula athu avula adi muthuphula mago mu gudibungisa gua mu hungu, yajiya gukhala lamba ha guheta luendu lua guhana komantere jiavula gifua luholo tuakhadi mutangiza. Matangua ako, wajiya guthuphula koko mbala jiavula, uvi mutuameji nu gugutomba ndo nga mbala imoshi. Ndaga yene yajiya gutusagesa muavula, uvi tushigo naye guyibuisa mulonga.​—Mulo. 7:9.

16. Luholo lutshi tuajiya guhana aphangi ahanyi komantere gikhesa?

¹⁶ Gula wahetelego luendu lua guhana komantere jiavula gifua luholo udi mutshigina, khala mutegelela muabonga aphangi ako tangua adi muhana komantere. Gungima dia gudibungisa ashimane mukunda nu komantere jiawo. Gula washimana aphangi a mala nu a akhetu mbawaahana gikhesa gifua luholo wakhala mutshigina guahana gula nga wahanyi komantere. (Ish. 10:21) Gushimana aphangi gudi luholo luko lua gudihana gikhesa.

MALUHOLO AKO TUAJIYA GUDIHANA GIKHESA

17. (a) Luholo lutshi mvuaji jiajiya gukuatesa an’awo ha gulondega komantere jinyi ana a mu gindongo giawo ajiya guhana? (b) Ha gutadila video, ndaga tshi nguana tudi naye gutshita ha gulondega komontere? (Tala nji mbimbi gosh’a diyiji.)

¹⁷ Luholo lutshi luko tuajiya gudihana gikhesa mu gudibungisa gua mu hungu? Gula udi mvuaji, kuatesa an’aye ha gulondega komantere jinyi ana a mu gindongo giawo ajiya guhana. (Mat. 21:16) Matangua ako mu gulonguga tuana zuelela ndaga jiakola gifua: Ndaga jiatadila ulo nga ndaga jiatadila makalegelo abonga. Uvi ikhale ngenyi guajiya gukhala nu paragrafe imoshi nga jiyadi jiajiya gukhala nu ndaga jialeba jinyi ana ajiya guhana mvutu. Kuatesa nji an’aye ha gukotelesa egi ajiyilego guatomba tangua diagasue adi muthuphula koko ha guhana mvutu. Gula waakotelesela gutuama, mbayaakuatesa ha gutuna guvua khabu gula atomba athu ako ha guhana mvutu, uvi ene ndo.​—1 Tim. 6:18.d

18. Luholo lutshi tuajiya gutuna guzuelela muavula ndaga jiatutadila esue tangua tudi muhana komantere? (Ishima 27:2)

¹⁸ Mukut’etu agasue tuajiya gulondega komantere jiabonga jidi mutumbuisa Yehowa nu jidi muhana aphangi’etu Aklisto gikhesa. (Ish. 25:11) Tangua tudi muzuelela mu guhihia eksperianse imoshi tuataganele nayo, tushigo naye guzuelela muavula ndaga jiatutadila esue. (Tanga Ishima 27:2; 2 Kol. 10:18) Uvi tudi naye guzuelela muavula ndaga jiatadila Yehowa, Mbimbi yenji nu akombeledi enji. (Gumo. 4:11) Gula paragrafe idi mutoga egi athu ahane matangi awo mukunda nu ndaga imoshi, ishigo yabola ha guzuelela ndaga tudi mutangiza. Tuza mumona gifezegeselo gia ndaga yene mu paragrafe yalandula.

19. (a) Gubonga gutshi mbatuheta gula tudi gudisha ha fundo dia athu ako mu gudibungisa gua mu hungu? (Roma 1:11, 12) (b) Ndaga itshi yana gugusuanguluisa tangua tuana hana komantere mu gudibungisa gua mu hungu?

¹⁹ Ha fundo dia gudisagesa muavula mu luhoho tudi naye guhana komantere, mukut’etu agasue tudi naye gutshita ngolo ha guhana komantere jidi muhana athu ako gikhesa. Ha guyitshita, matangua ako yajiya gutoga egi tuhane komantere mbala jiavula, nga ndo tusuanguluge gula tuaheta luendu lua guhana komantere nga gusuanguluga tangua athu ako adi muheta luendu lua guhana mvutu. Gula tudi mukamba gubonga gua athu ako mu gudibungisa gua mu hungu, ‘mbatudikolesa hamoshi.’​—Tanga Roma 1:11, 12.