Yehowa udi Gutuwambela egi Mbawubuisa Mavu Phaladiso

1. Ndaga jitshi Yeshaya wawambelele enya Isalele?

PROFETE Yeshaya wazuelele egi Yehowa udi ‘Nzambi wa giamatshidia.’ Mbimbi yabalumuiwe egi “giamatshidia” idi mukotelesa egi, “Amen.” (Yesh. 65:16) “Amen” idi mukotelesa egi “ikhale ngenyi,” nga ndo “idi ngenyi.” Tangua Biblia yana kalegela mbimbi “amen” ha guzuelela Yehowa nga Yesu, yana monesa egi ndaga idi muzuelela idi ya giamatshidia. Hene, Yeshaya wawambelele enya Isalele egi, ndaga jiagasue jiana zuela Yehowa jiana tagenesewa. Idi diago ngenyi handaga Yehowa wana tagenesa ndaga jiagasue jialayele muene.

2. Mukunda natshi tudi naye gusha mutshima mu ndaga jialayele Yehowa mukunda nu masugu adi muza? Mihu itshi tuza muzuelela mu longo edi?

² Esue nji tuajiya gusha gutshigina egi ndaga jiana gutulaya Yehowa mukunda nu masugu adi muza jidi jia giamatshidia ba? Ivo 800 gungima dia Yeshaya, mupostolo Phaula wamonesele mukunda natshi tudi naye gusha mutshima egi ndaga jiana laya Yehowa mbajitagenesewa diago. Wasonegele egi: “Nzambi gajiyilego gumba mambo.” (Heb. 6:18) Muta umoshi wajiyilego guzola meya atuluga nu meya a mungua. Luholo lumoshi nji, Yehowa Nzambi wa giamatshidia gajiyilego guzuela giamatshi nu gumba mambo. Hene, tudi naye gusha mutshima mu ndaga jiagasue jiana zuela Yehowa, nu mu ndaga jiagasue jialayele muene mukunda nu masugu adi muza. Mu longo edi tuza muzuelela mihu eyi: Itshi Yehowa walayele ha gutuhana mu masugu adi muza? Itshi Yehowa watshitshile ha gututshiginyisa egi mbawutagenesa ndaga jialayele muene?

NDAGA JITSHI JIALAYELE YEHOWA?

3. (a) Ndaga jitshi jialayele Nzambi jiana suanguluisa akombeledi enji? (Gumonesa 21:3, 4) (b) Itshi athu ako ana zuela mukunda nu ndaga jiene?

³ Ndaga jialayele Nzambi tuza mutadila mu longo edi jiana suanguluisa akombeledi a Nzambi a ha mavu agasue. (Tanga Gumonesa 21:3, 4.) Yehowa walayele egi gudi nu lusugu “gufua mbagukhadigo luko, nga gudila nga gutataganya, lamba nji mbadikhadigo luko.” Athu avula mukatshi dietu ana tanga verse jiene mu mudimo wa gulongesa ha guhana athu ako gikhesa nu ha gumonesa luholo monyo mbawukhala mu Phaladiso. Itshi athu ako ana zuela tangua tuana guawambela felela diene? Ajiya guzuela egi: “Ndaga jiene jidi jiabonga, uvi ngushigo mutshigina egi mbajitagenesewa.”

4. (a) Tangua Yehowa watulayele phaladiso ndaga jitshi jiakhalele mujiya muene? (b) Ndaga itshi iko Yehowa wakalegele?

⁴ Tangua Yehowa wawambelele mupostolo Yone ha gusonega laji dia gukhala mu Phaladiso, wakhalele mujiya egi tangua mbatulongesa lukuma lua Ufumu mbatuwambela athu ako felela diene. Yehowa wajiyile nji egi mbayikhala lamba gudi athu avula ha gutshigina egi ndaga mbajisombegesa mu masugu adi muza. (Yesh. 42:9; 60:2; 2 Kol. 4:3, 4) Luholo lutshi tuajiya gukuatesa athu ako ha gutshigina egi ndaga jidi mu Gumonesa 21:3, 4 mbajitagenesewa? Yehowa watuwambelele ndaga jidi gututshiginyisa egi mbawutagenesa ndaga jiene. Ndaga jitshi jiatuwambelele muene?

YEHOWA WANA GUTUTSHIGINYISA EGI MBAWUTAGENESA LAJI DIENJI

5. Verse jitshi jidi gututshiginyisa egi Yehowa mbawutagenesa ndaga jialayele muene?

⁵ Verse eji jialandula jidi mumonesa ndaga jidi gututshiginyisa egi Yehowa mbawutagenesa ndaga jialayele muene. Jidi muzuela egi: “Muthu udi ha nguasa ya ufumu wazuelele egi: ‘Tala! Ngudi mutshita ima yagasue ihe-ihe.’ Wazuelele luko egi: ‘Sonega, handaga mbimbi eji jidi naye guhagewa mutshima nu jidi jia giamatshidia.’ Wanguwambelele egi: ‘Jiakalegewa! Ame ngudi Alfa nu Omega, gisendeselo nu gisugishilo.’”​—Gumo. 21:5, 6a.

6. Mukunda natshi ndaga jidi mu Gumonesa 21:5, 6 jidi mukolesa gutshigina guetu mu ndaga jialayele Nzambi?

⁶ Mukunda natshi verse jiene jidi mukolesa gutshigina guetu mu ndaga jialayele Nzambi? “Tuajiya gufuanesa ndaga jidi muzuela Yehowa mu verse eji nu muthu udi mumba sinyatire mu mukanda ha gumonesa egi mbawutagenesa laji dienji.”b Gumonesa 21:3, 4 idi muzuelela ndaga Nzambi mbawukalagala. Uvi mu verse 5 nu 6, Yehowa wamba sinyature ha gututshiginyisa egi mbawutagenesa ndaga jiene. Tutalenu muabonga luholo Yehowa udi gututshiginyisa egi tuajiya gumushila mutshima.

7. Nanyi udi musendesa guzuela mu verse 5? Mukunda natshi mbimbi jiene jidi nu ndando?

⁷ Verse 5 idi musendesa nu mbimbi eji: “Muthu udi ha nguasa ya ufumu wazuelele egi.” (Gumo. 21:5a) Mbimbi eji jidi nu ndando yavula handaga eyi mbala ya thomo mu mbala thathu Yehowa muene hakhenji udi muzuela mu mukanda wa Gumonesa. Yehowa gatumilego muanjelo nga Yesu ha gututshiginyisa ndaga eji uvi muene hakhenji! Luholo muene hakhenji udi muzuela, idi munonesa egi tuajiya diago gusha mutshima mu mbimbi jidi muzuela muene gungima. Mukunda natshi? Handaga Yehowa “gajiyilego gumba mambo.” (Tito 1:2) Mbimbi eji jidi mumonesa diago egi ndaga tuana tanga mu Gumonesa 21:5, 6 mbajitagenesewa diago.

“TALA! NGUDI MUTSHITA IMA YAGASUE IHE-IHE”

8. Mbimbi jitshi jia Yehowa jidi gututshiginyisa egi mbawutagenesa ndaga jialayele muene? (Yeshaya 46:10)

⁸ Gungima Yehowa udi muzuela egi: “Tala!” (Gumo. 21:5) Mu mukanda wa Gumonesa ana kalegela muavula mbimbi ya Greke yabaluimuiwe egi “tala!” Mukanda umoshi wana zuela egi ana kalegela mbimbi yene “ha gunana matangi a muthu udi mutanga mu ndaga jialandula.” Itshi Nzambi udi muzuela gungima? Udi muzuela egi: “Ngudi mutshita ima yagasue ihe-ihe.” Idi yadiago egi Yehowa udi muzuelela ndaga mbajitshita muene mu masugu adi muza. Uvi luholo luana jiya muene egi mbawutagenesa diago ndaga jiene udi gujizuela gifua wajitagenesa gale.​—Tanga Yeshaya 46:10.

9. (a) Mbimbi “ngudi mutshita ima yagasue ihe-ihe” yana zuelela ndaga jitshi mbadi mbajikalagala Yehowa? (b) Isthi mbayibuila “dilu” nu “mavu” a mangino?

⁹ Tutadilenu ndaga Yehowa udi muzuela luko mu Gumonesa 21:5 egi: “Ngudi mutshita ima yagasue ihe-ihe.” Mu mukhapho owu, mbimbi eji jidi muzuelela ndaga mbadi mbajikalagala Yehowa yakotelesa egi, gusombegesa nu gulonda. Ya thomo, itshi Yehowa mbawusombegesa? Mukanda wa Gumonesa 21:1, udi muzuela egi: “Dilu dikulu nu mavu akulu atotele.” “Dilu dikulu” didi mumonesa baguvernema adi mutuamezewa gudi Satana nu bademo enji. (Mat. 4:8, 9; 1 Yone 5:19) Mu Biblia mbimbi “mavu” yajiya gumonesa athu ana khala ha mavu. (Gis. 11:1; Ngi. 96:1) Hene, “mavu akulu” adi mumonesa athu abola ana khala ha mavu mangino. Yehowa mbagashigo mulonda “dilu” nu “mavu” a mangino, uvi mbawaashiya mayilago. Gungima mbawaasombegesa nu “dilu dihe-dihe nu mavu ahe-ahe,” yakotelesa guvernema ihe-ihe inyi mbayihinyina athu abonga ha mavu.

10. Itshi Yehowa mbawubuisa ihe-ihe?

¹⁰ Gumonesa 21:5, idi muzuelela ndaga Yehowa mbawulonda. Yehowa gashigo muzuela egi: ‘Ngudi mufuga ima yagasue ihe-ihe.’ Uvi udi muzuela egi, “Ngudi mutshita ima yagasue ihe-ihe.” Luholo lutshi Yehowa mbawubuisa ima yagasue ihe-ihe? Mbawusaga athu nu mbawubuisa mavu atagana. Gifua luholo Yeshaya wazuelele, Yehowa mbawubuisa mavu agasue fundo diabonga dia gukhala, gifua muakhalele dihia dia Edene. Yehowa mbawutubuisa nji athu ahe-ahe luholo mbalusaga muene muthu wagasue mukatshi dietu. Ikata, ifofo, nu ifua matshui mbaasagewa nu athu afuile gale mbaafuzumuga.​—Yesh. 25:8; 35:1-7.

“MBIMBI EJI JIDI NAYE GUHAGEWA MUTSHIMA NU JIDI JIA GIAMATSHIDIA. . . . JIAKALEGEWA!”

11. Ndaga itshi Yehowa wawambelele Yone? Mukunda natshi wamuwambelele ndaga yene?

¹¹ Ndaga itshi iko Nzambi wazuelele ha gutukuatesa ha gumushila mutshima? Yehowa wawambelele Yone egi: “Sonega, handaga mbimbi eji jidi naye guhagewa mutshima nu jidi jia giamatshidia.” (Gumo. 21:5) Yehowa gamuwambelelego phamba ha ‘gusonega’ uvi wamuwambelele mukunda natshi adi naye gusonega ndaga jiene. Wazuelele egi: “Handaga mbimbi eji jidi naye guhagewa mutshima nu jidi jia giamatshidia.” Yakotelesa egi mbimbi ya Nzambi idi ya giamatshidia, tudi naye nji guyishila mutshima. Tudi nu gusuanguluga guavula luholo Yone ‘wasonegele’ ndaga gifua muamuwambelele Yehowa. Hene tuana tanga ndaga jiatulayele Yehowa mukunda nu Phaladiso, tuana tangigiza nji gubonga mbatuheta mu masugu adi muza.

12. Mukunda natshi Yehowa udi muzuela egi: “Jiakalegewa!”

¹² Ndaga itshi Nzambi wazuelele gungima? “Jiakalegewa!” (Gumo. 21:6) Mukunda natshi Yehowa udi muzuelela ndaga jialayele muene gifua jiatagenesewe gale? Handaga gushigo nu gima giajiya gumukanga njila ha gutagenesa ndaga jiene. Gungima Yehowa udi muzuela ndaga iko idi gututshiginyisa egi mbawutagenesa diago ndaga jialayele muene. Ndaga itshi yene?

“AME NGUDI ALFA NU OMEGA”

13. Mukunda natshi Yehowa wazuelele egi: “Ame ngudi Alfa nu Omega”?

¹³ Gifua luholo tuayizuelela gu thunda, Yehowa muene hakhenji wazuelele nu Yone mu vizio mbala thathu. (Gumo. 1:8; 21:5, 6; 22:13) Mu mbala jiene jiagasue Yehowa wakhalele muzuela egi: “Ame ngudi Alfa nu Omega.” Alfabe ya Greke yana sendesa nu dileta alfa yana sugisa nu omega. Yehowa wazuelele egi udi “Alfa nu Omega,” ha gutukuatesa ha gukotelesa egi gula wasendesa gutshita ndaga imoshi, wana guyitagenesa.

14. (a) Hana gifezegeselo gidi mumonesa tangua Yehowa wazuelele mu luholo lua gufuanesa egi “Alfa,” nu tangua mbadizuela muene egi “Omega”? (b) Ndaga jidi mu Gisendeselo 2:1-3 jidi gututshiginyisa itshi?

¹⁴ Tangua Yehowa wafugile Adama nu Eva, waawambelele felela dienji mukunda nu athu nu mavu. Biblia idi muzuela egi: “Nzambi waasuanguluishile, waawambelele egi: ‘Vualenu ana mudivudise, zalesenu mavu nu muahinyine.’” (Gis. 1:28) Yakhalele gifua Yehowa wazuelele mu tangua diene egi “Alfa.” Wamonesele diago felela dienji haphelo egi: Gudi nu lusugu, ajigulu a Adama nu Eva ana gumutumagela mbaabua athu atagana nu mbazalesa mavu, mbaabuisa nji phaladiso. Mu tangua diene, mbayikhala gifua Yehowa wazuela egi “Omega.” Tangua Yehowa “wamanesele gufuga dilu nu mavu nu ima yagasue idi hene,” wazuelele ndaga imoshi ha gumonesa egi mbawutagenesa felela dienji. Ndaga yene idi mu Gisendeselo 2:1-3. (Tanga.) Yehowa wazuelele egi lusugu lua sambadi luakhalele lusugu lua gijila. Idi mukotelesa itshi? Yehowa wamonesele egi wakhalele naye gutagenesa ndaga jialayile muene mukunda nu athu nu mavu. Mbawutagenesa diago ndaga yene gu gisugishilo gia lusugu lua sambadi.

15. Mukunda natshi Satana watangijile egi wajiya gukanga Yehowa njila ha gutagenesa ndaga jialayile muene?

¹⁵ Tangua Adama nu Eva alumbugile Nzambi abuile enya gubola, ahanele nji gubola guene gudi an’awo. (Roma 5:12) Ndaga yene yamonesele gifua Satana wakangele njila egi felela dia Nzambi dia guzalesa mavu nu athu atagana nu ana gumutumagela ditagenesewago. Yakhalele gifua Satana wakangele Yehowa njila ha guzuela egi “Omega.” Yajiya gukhala egi Satana watangijile egi Yehowa gajiyilego gutagenesa felela dienji. Yajiya nji gukhala egi watangijile egi Nzambi udi naye gushiya Adama nu Eva ha gufuga athu ako atagana ha gutagenesa felela dienji mukunda nu mavu. Gula nga Nzambi watshitshile ngenyi, nga Diabulu wazuelele egi udi muenya mambo. Mukunda natshi? Handaga mu mukanda wa Gisendeselo 1:28, Yehowa wawambelele Adama nu Eva egi ajigulu awo akhalele naye guzalesa mavu.

16. Yajiya gukhala egi itshi yatumile Satana ha gutangiza egi Yehowa gabingilego ha gutagenesa ndaga jialayele muene?

¹⁶ Yajiya gukhala egi ndaga itshi iko Satana wakhalele mutangiza egi Nzambi wakhalele naye gutshita? Matangua ako, wakhalele mutangiza egi, Yehowa mbawubemba egi Adama nu Eva avuale ana a masumu anyi akhalelego naye guheta luendu lua gubua athu atagana. (Mulo. 7:20; Roma 3:23) Gula nga yakhalele ngenyi, Diabulu wakhalele naye guzuela egi Yehowa gabingilego ha gutagenesa ndaga jialayile muene. Mukunda natshi? Handaga gutuna guhana ana a Adama nu Eva luendu lua gubua athu atagana, mbagushigo mutagenesa ndaga jialayele Nzambi. Yakotelesa egi guzalesa Phaladiso nu athu atagana, ana tumagela Nzambi.

17. Ndaga itshi Yehowa watshitshile ha gulondega milonga yazolele Satana nu Adama nu Eva? Luholo lutshi ndaga yene mbayisuga? (Tala nji gifuanesa.)

¹⁷ Satana gakhalelego mujiya nga hazonda ndaga Yehowa wakhalele naye gutshita. Ikhale muene nu Adama nu Eva amulumbugidile, uvi Yehowa wakalegele ndaga mu luholo luko luabonga ha gutagenesa ndaga jialayele muene. (Ngi. 92:5) Yehowa wamonesele diago egi udi Nzambi wa giamatshidia uvi ganago gumba mambo luholo luahanele muene Adama nu Eva luendu lua gu guvuala ana. Ngenyi wamonesele haphelo egi gula wazuela egi mbawutshita ndaga imoshi, wana guyitagenesa. Wanonesele egi mbawutagenesa ndaga jialayele muene, luholo luahanele muene “vungu” mbadihuluisa ana a Adama nu Eva ana gumutumagela. (Gis. 3:15; 22:18) Satana wadihudile muavula, gakhalelego nji nu ndaga yaguzuela luholo Yehowa wahanele gibawu! Mukunda natshi? Handaga gibawu giana monesa guzumba gua giamatshidia gua Yehowa nu Yesu mukunda nu athu. (Mat. 20:28; Yone 3:16) Satana gana khalago nu khadilo diene, handaga wana khala nu ngina jiabola. Gubonga gutshi mbatuheta mukunda nu gibawu? Gu gisugishilo gia ivo 1 000 ya unyinyi wa Klisto, ana a Adama nu Eva ana tumagela Nzambi nu mbaabua athu atagana mbaajinga mu phaladiso ha mavu, gifua muakhalele ndaga jialayele Yehowa gu gisendeselo. Mu tangua diene Yehowa mbawuzuela egi “Omega” gifua luholo ndaga jiakhalele thomo.

LUHOLO TUAJIYA GUKOLESA GUTSHIGINA GUETU MU NDAGA JIALAYELE YEHOWA

18. Ndaga jitshi thathu jidi gututshiginyisa egi Nzambi mbawutagenesa ndaga jialayele muene? (Tala nji galuanda “Ndaga Thathu Jidi Gututuma ha Gusha Mutshima mu Ndaga Jialayele Yehowa.”)

¹⁸ Mu longo edi tuamonyi ndaga jidi gututshiginyisa egi mavu mbaabua Phaladiso. Itshi tuajiya guwambela athu ako ha guatshiginyisa egi ndaga jiene mbajikalegewa diago? Ya thomo, tuajiya guawambela egi Yehowa wana laya ndaga jiene. Mukanda wa Gumonesa udi muzuela egi: “Muthu udi ha nguasa ya ufumu wazuelele egi: ‘Tala! Ngudi mutshita ima yagasue ihe-ihe.’” Udi nu ndunge nu ngolo nu nzala yakola ya gubuisa mavu phaladiso. Ya mbadi, Yehowa wana jiya nji egi mbawutagenesa diago ndaga jiana zuela muene. Gishina giene wazuelele egi: “Mbimbi eji jidi naye guhagewa mutshima nu jidi jia giamatshidia. . . . Ndaga jikulu jiatota!” Ya thathu, gushigo nu ndaga imoshi yajiya gukanga Yehowa njila ha gumanesela ndaga yasendesele muene. Hene wana zuela egi: “Ame ngudi Alfa nu Omega.” Yehowa mbawumonesa egi Satana udi muenya mambo, gajiyilego gumukanga njila ha gutagenesa ndaga jialayile muene.

19. Itshi wajiya gutshita gula athu adi musha giphapha ha gutshigina ndaga jialayele Yehowa?

¹⁹ Khala mujiya egi, tangua diagasue wana wambela athu ako ndaga jiazuelele Yehowa ha gututshiginyisa egi mbawutagenesa felela dienji, wana kolesa gutshigina guaye gudi muene. Itshi wajiya gutshita gula mu masugu adi muza watanga ndaga imoshi idi muhana gikhesa yatadila Phaladiso gifua luholo Gumonesa 21:4 idi guyimonesa, gungima muthu mumoshi waguwambela egi: “Ndaga jiene jidi jiabonga, uvi ngushigo mutshigina egi mbajitagenesewa”? Wajiya guatangela nu guakotelesela verse 5 nu 6. Amonese nji luholo Yehowa wambile sinyatire yakotelesa egi watuwambelele ndaga jiana gututshiginyisa egi mbawutagenesa laji dienji.​—Yesh. 65:16.