Itshi udi Naye Gutshita ha Guheta Monyo wa Ivo nu Ivo?

1. Mukunda natshi athu ako ana tangiza egi ajiyilego guheta monyo wa ivo nu ivo?

ATHU avula ana gudia ima yabonga nu ana tshita ba exercice muavula ha gukhala nu sante yabonga hagula ajiya gukhala nu monyo masugu avula. Uvi anago gusha mutshima egi mbaakhala nu monyo mayilago. Handaga ana tangiza egi ajiyilego gukhala nu monyo ivo nu ivo luholo ana tagana nu malamba nu ana gubua athu a gukola. Uvi Yesu wazuelele mu Yone 3:16 nu 5:24 egi athu ajiya guheta “monyo wa ivo nu ivo.”

2. Mukanda wa Yone mukhapho 6 wana zuela itshi mukunda nu monyo wa ivo nu ivo? (Yone 6:39, 40)

² Lusugu lumoshi, Yesu wadishile thundu yavula ya athu mapha nu jishui mu luholo lua gushimana.a Yakhalele ndaga yabonga diago, uvi ndaga jiawambelele muene athu amulanduile gu Kaphelenauma hehi nu mbungu ya Galilea, jiakhalele jiabonga gubalega. Waawambelele egi mbawufuzumuna athu afuile gale nu mbaaheta monyo wa ivo nu ivo. (Tanga Yone 6:39, 40.) Ndaga eyi idi mukotelesa itshi mukunda nu mafuta aye nga enya fami yaye afuile gale? Mbimbi jiazuelele Yesu jidi guguhana felela egi athu avula anyi afuile gale ajiya gufuzumuga, ngenyi aye nu athu wana zumba mbamukhala nu monyo mayilago! Uvi ndaga jiazuelele Yesu mu verse jialandula jia Yone mukhapho 6 jiakhalele jiakola gudi athu ako a mu tangua diene ha gukotelesa. Jiana khala nji lamba gudi athu ako ha gukotelesa uu nu mangino. Tuzuelelenu ndaga jiene.

3. Itshi Yesu wazuelele mu Yone 6:51?

³ Thundu ya athu yakhalele gu Kaphelenauma yakotelesele gudivua guakhalele mukatshi dia mapha a ahanele Yesu nu mana Yehowa wahanele akhakh’awo. Biblia yana tamega mana ene egi “mapha akatugile mu dilu.” (Ngi. 105:40; Yone 6:31) Gungima Yesu wawambelele athu ene ndaga imoshi akhalele mujiya yatadila mana ha gualongesa longo dimoshi dia ndando. Ikhale Nzambi wakhalele muhana akhakh’awo mana, uvi athu adile mana ene afuile. (Yone 6:49) Uvi Yesu wazuelele egi muene udi “dipha dia giamatshidia diakatuga mu dilu,” udi “dipha dia Nzambi,” nu “dipha dia monyo.” (Yone 6:32, 33, 35) Gungima Yesu wamonesele gudisha guakhalele mukatshi dienji nu mana. Wazuelele egi: “Ame ngudi dipha dia monyo dinyi diakatugile mu dilu. Gula muthu wadia dipha edi, mbawukhala nu monyo wa ivo nu ivo.” (Tanga Yone 6:51.) Enya Yuda avuile ndaga yene abuile tunga-tunga. Akhalelego mukotelesa mukunda natshi Yesu wazuelele egi udi “dipha” diakatugile mu dilu nu diakhalele nji diabonga gubalega mana Nzambi wahanele akhakh’awo. Gungima Yesu waawambelele egi: “Dipha mbanguhana ame, didi muila wami.” Wakhalele mutshigina guzuela itshi? Tudi naye gukamba gukotelesa ndaga Yesu watshiginyile guzuela handaga mbayitukuatesa ha gujiya luholo esue nu athu tuana zumba tuajiya guheta monyo wa ivo nu ivo. Tutadilenu ndaga Yesu watshiginyile guzuela.

DIPHA DIA MONYO NU MUILA WA YESU

4. Mukunda natshi athu ako adisagesele mukunda nu ndaga jiaawambelele Yesu?

⁴ Athu ako adisagesele diago havuile ene ndaga Yesu wazuelele egi dipha adi naye gudia didi muila wenji “mukunda nu monyo wa athu agasue a ha mavu.” Yajiya gukhala egi atangijile egi wakhalele mutshigina guahana muila wenji wa mahatshi nu meya ha gudia. (Yone 6:52) Uvi Yesu waawambelele ndaga iko yaasagesele muavula, wazuelele egi: “Gula muadilego muila wa Mun’a muthu nu muanuilego mahatshi enji, enue mushigo nu monyo mukatshi dienu.”​—Yone 6:53.

5. Itshi idi gugutshiginyisa egi Yesu gakhalelego mutshigina guwambela athu ha gunua mahatshi enji?

⁵ Sendese mu tangua dia Nowa, Nzambi watunyishile athu ha gudia mahatshi. (Gis. 9:3, 4) Gungima Yehowa wahanele enya Isalele mukhuala egi ashigo naye gudia mahatshi. Muthu wagasue wakhalele naye gudia mahatshi wakhalele naye “gushiyiwa.” (Levi 7:27) Yesu walongesele enya Yuda ha gutumagela mikhuala yagasue yaahanele Nzambi. (Mat. 5:17-19) Hene, Yesu gakhalelego naye guwambela enya Yuda ha gudia muila wenji wa mahatshi nu meya nga gunua mahatshi enji. Uvi hazuelele muene mbimbi eji, wakhalele mutshigina gualongesa luholo ajiya guheta “monyo wa ivo nu ivo.”​—Yone 6:54.

6. Mu luholo lutshi tudi naye gukotelesa mbimbi jia Yesu jiatadila gudia muila wenji nga gunua mahatshi enji?

⁶ Matangi a Yesu akhalele itshi? Idi yadiago egi Yesu wakhalele muzuela mu luholo lua gifuanesa, gifua muawambelele muene mukhetu wa gu Samaliya egi: “Muthu wagasue udi munua meya anyi mbangumuhana, muene mbagashigo luko muvua luhungu, uvi meya anyi mbangumuhana mbaabua mukatshi dienji gifua mudidi wa meya adi muzoga ha guhana monyo wa ivo nu ivo.” (Yone 4:7, 14)b Yesu gakhalelego mutshigina guwambela mukhetu muene egi mbawuheta monyo wa ivo nu ivo gula wanua meya amoshi ngenyi. Luholo lumoshi nji, gatshiginyilego guzuela egi thundu ya athu yalongesele muene gu Kaphelenauma akhalele naye gukhala nu monyo mayilago gula adia muila wenji nu anua mahatshi enji.

NDAGA JIAZUELELE YESU JIAKHALELE MUTADILA GUDIA GUA FUMU GUA MU NGUENZE BA?

7. Ndaga jitshi athu ako ana zuela jiatadila mbimbi jiazuelele Yesu mu Yone 6:53?

⁷ Athu ako ana zuela egi mbimbi jia Yesu jidi mu Yone 6:53 jiatadila gudia muila wenji nu gunua mahatshi enji jiakhalele mukotelesa Gudia gua Fumu gua mu Ngueze, handaga mu lusugu luene Yesu wakalegele nji mbimbi jia luholo lumoshi. (Mat. 26:26-28) Athu ana zuela egi muthu wagasue udi muya mu Gudia gua Fumu gua mu Ngueze udi naye gudia dipha nu gunua vinyo ana balegesa mukatshi dia athu. Ndaga yene idi ngenyi ba? Idi nu ndando ha gujiya mvutu ya muhu wene handaga givo nu givo athu avula a ha mavu agasue ana guza ha gudibungisa nu esue mukunda nu gudibungisa guene gua ndando. Tuza mumona gudisha gudi mukatshi dia ndaga jidi mu Yone 6:53 nu ndaga jiazuelele Yesu mukunda nu Gudia gua Fumu gua mu Ngueze.

8. Gudisha gutshi gudi mukatshi dia ndaga mbadi Yesu wazuelelele? (Tala nji ifuanesa.)

⁸ Tutadilenu gudisha gudi mukatshi dia ndaga jiazuelele Yesu mu ba okazio ene. Ya thomo, fundo ditshi nu tangua ditshi Yesu wazuelele ndaga jidi mu Yone 6:53-56? Waazuelele ndaga jiene gudi enya Yuda avula akhalele gu Galilea mu givo 32 Gungima dia Guvualewa gua Yesu. Sendese tangua diazuelele muene ndaga jiene uu nu tangua diatshitshishile muene Gudia gua Fumu gua mu Ngueze gu Yelusalema, yakhalele hehi nu givo gimoshi. Ya mbadi, wakhalele muwambela akuatshi? Wakhalele muwambela athu asuangulugile muavula nu ima ya gudia yaahanele muene gubalega gulonguga ndaga jiatadila Yehowa nga Ufumu wa wenji. (Yone 6:26) Gishina giene, tangua Yesu waawambelele ndaga imoshi yakhalele ya lamba ha gukotelesa, atunyile gawo mbala imoshi ha gumutegelela. Nu ene alandudi enji ako abembele gumulandula. (Yone 6:14, 36, 42, 60, 64, 66) Uvi hehi nu givo gimoshi gungima tangua Yesu watshitshile Gudia gua Fumu gua mu Nguenze, apostolo 11 akhalele n’enji amonesele diago egi akhalele agudisha nu athu ene. Mu lusugu luene, apostolo ene 11 a gujinginyina akhalele n’enji ikhale akoteleselego ndaga jiagasue jiaalongesele muene. Ikhale athu avula a gu Galilea akhalelego nu gutshigina, uvi apostolo enji a gujinginyina akhalele mujiya muabonga egi Yesu udi Mun’a Nzambi wakatugile mu dilu. (Mat. 16:16) Yesu waashimanele egi: “Enue mudi athu anyi asalele a gujinginyina nu ame mu malamba ami.” (Luka 22:28) Gudisha gudi mukatshi dia ndaga eji gudi egi mu Yone 6:53, Yesu gakhalelego muzuelela ndaga jiakhalele naye gukalegewa mu Gudia gua Fumu gua mu Ngueze. Uvi gudi nji nu ndaga jiko jiavula jidi mumonesa gudisha gudi mukatshi dia ba okazio ene mbadi.

NDAGA JIAZUELELE YESU JIDI NJI GUGUTADILA BA?

9. Mbimbi jiazuelele Yesu mu Gudia gua Fumu gua mu Ngueze jiakhalele mutadila akuatshi?

⁹ Tangua Yesu wakalegele Gudia gua Fumu gua mu Ngueze, wahanele apostolo enji dipha dishigo nu levire, waawambelele nji egi diakhalele mumonesa muila wenji. Gungima waahanele vinyo nu wazuelele egi yakhalele mumonesa “mahatshi a gikotelo.” (Mako 14:22-25; Luka 22:20; 1 Kol. 11:24) Ndaga yazuelele Yesu mukunda nu gikotelo giene idi diago nu ndando yavula. Wakotele gikotelo gihe-gihe nu “Isalele [ya mu nyuma]” yakotelesa egi athu anyi mbaahinyina nu Yesu “mu Ufumu wa Nzambi.” (Heb. 8:6, 10; 9:15) Ikhale apostolo akoteleselego ndaga jiagasue mu tangua diene, uvi gungima ambiwe maji mu nyuma; ngenyi akotele gikotelo ha gukhala hamoshi nu Yesu mu dilu.​—Yone 14:2, 3.

10. Luholo lutshi ndaga jiazuelele Yesu gu Galilea jidi jia gudisha nu jinyi jiazuelele muene mu Gudia gua Fumu gua mu Ngueze? (Tala nji gifuanesa.)

¹⁰ Ndaga jiazuelele Yesu mu Gudia gua Fumu gua mu Ngueze jiakhalele mutadila “thundu yazonda” ya athu. Thundu yene yazonda yasendesele nu apostolo enji a gujinginyina anyi akhalele n’enji. (Luka 12:32) Yesu waatombele ha gudia dipha nu gunua vinyo mu ngueze yene. Athu ako adi naye gungina mukatshi dia thundu yene gungima, adi naye nji gudia dipha nu gunua vinyo tangua ana kalagala Gudia gua Fumu gua mu Ngueze. Athu ene adi mu thundu yazonda mbaaheta luendu lua gukhala nu Yesu mu dilu. Ndaga Yesu wawambelele apostolo enji mu lusugu luene jidi diago jiagudisha nu ndaga jiawambelele muene athu avula a gu Galilea. Handaga ndaga jiazulele muene mu Gudia gua Fumu gua mu Ngueze jiakhalele mutadila phamba thundu yazonda ya athu. Uvi ndaga jiazuelele muene gu Galilea jiakhalele mutadila athu avula.

11. Ndaga itshi Yesu wazuelele gu Galilea idi mumonesa egi gakhalelego muzuelela thundu ya athu azonda?

¹¹ Ndaga jiazuelele Yesu gu Galilea mu givo 32 G.Y. jiakhalele mutadila muavula enya Yuda anyi akhalele gumulandula phamba mukunda nu ima ya gudia. Uvi waakuatesele ha gukotelesa egi guakhalele nu gima giko gia ndando yavula gubalega ima ya gudia. Waawambelele ndaga ajiya gutshita ha guheta monyo wa ivo nu ivo. Yesu waawambelele egi athu anyi afuile gale mbaafuzumuga mu lusugu lua gisugishilo nu mbaaheta monyo wa mayilago. Ngenyi, mu Yone mukhapho 6, Yesu gakhalelego muzuelela ishimbigo inyi phamba athu azonda mbaaheta, gifua muazuelele muene mu Gudia gua Fumu gua mu Ngueze. Uvi ndaga jiazuelele muene gu Galilea jiakhalele mutadila gishimbigo gia monyo wa ivo nu ivo ginyi athu agasue ajiya guheta. Gishina giene wazuelele egi: “Gula muthu wadia dipha edi, mbawukhala nu monyo wa ivo nu ivo; . . . Dipha mbanguhana ame, didi muila wami mukunda nu monyo wa athu agasue a ha mavu.”​—Yone 6:51.

12. Itshi tudi naye gutshita ha guheta monyo wa ivo nu ivo wazuelele Yesu?

¹² Yesu wakhalele mutshigina guzuela egi athu agasue mbaheta monyo wa ivo nu ivo ba? Ndo, wazuelele egi phamba athu adi ‘mudia dipha edi,’ yakotelesa egi athu adi musha gutshigina gudi muene, mbaaheta monyo wa ivo nu ivo. Mangino athu avula ana zuela egi ana gusha gutshigina gudi Yesu nu ana gumutamega egi udi muhuluishi wawo. (Yone 6:29) Uvi gudi nu ndaga iko adi naye gutshita; handaga nu ene athu avula a gu Galilea anyi ashile gutshigina gudi muene thomo, gungima abembele gawo gumulandula. Mukunda natshi?

13. Gukhala mulandudi wa Yesu wa giamatshidia gudi mukotelesa itshi?

¹³ Athu avula mukatshi dia thundu ya athu yakhalele mulandula Yesu akhalele nu gusuanguluga ha gumulandula handaga waahanele ima akhalele nayo funu. Akhalele musuanguluga nu luholo lua gushimana luakhalele guasaga muene, nu luholo luakhalele muene guahana ima ya gudia ya khenda nu gualongesa ndaga akhalele mutshigina guvua. Uvi Yesu wamonesele egi alandudi enji a giamatshidia akhalele naye gutshita ndaga jiko jiavula. Gajilego ha mavu phamba ha guhana athu ima akhalele nayo funu. Uvi akhalele naye ‘guya gudi muene,’ yakotelesa egi akhalele naye gutshigina nu gutumagela ndaga jiagasue jiaalongesele muene.​—Yone 5:40; 6:44.

14. Itshi tudi naye gutshita ha guheta gubonga gua mulambu wa Yesu?

¹⁴ Yesu walongesele athu ene egi mulambu wenji, yakotelesa egi muila wenji nu mahatshi enji, wakhalele naye guakuatesa ha guheta monyo wa mayilago. Akhalele naye gutshigina ndaga yene. Gutshigina gua luholo elu guakhalele nu ndando yavula gudi enya Yuda, gudi nji nu ndando yavula mukunda nu esue mangino. (Yone 6:40) Ngenyi, ndaga jiazuelele Yesu mu Yone 6:53, jidi mukotelesa egi tudi naye gusha gutshigina mu mulambu wahanele muene ha guheta monyo wa ivo nu ivo. Gishimbigo egi gidi mukunda nu athu avula.​—Ef. 1:7.

15-16. Ndaga jitshi jia ndando tualonguga mu Yone mukhapho 6?

¹⁵ Mu mukanda wa Yone mukhapho 6 tualonguga malongo avula a ndando. Tuamonyi egi Yesu wana gudisagesa muavula mukunda nu athu ako. Hakhalele muene gu Galilea, wasagele athu, waalongesele ndaga jiatadila Ufumu wa Nzambi, waahanele nji ima ya gudia akhalele nayo funu. (Luka 9:11; Yone 6:2, 11, 12) Uvi ndaga yabalega ndando idi egi, waalongesele egi muene udi “dipha dia monyo.”​—Yone 6:35, 48.

¹⁶ Athu Yesu watamegele egi “imeme iko” anago nu ashigo naye gudia dipha nga gunua vinyo mu Gudia gua Fumu gua mu Ngueze. (Yone 10:16) Uvi ana gudia “dipha dia monyo” mu luholo lua gifuanesa. Ana tshita ngenyi tangua ana gusha gutshigina mu mulambu wahanele Yesu nu mu gubonga ana heta mu njila ya mulambu wene. (Yone 6:53) Uvi athu ana gudia dipha nu ana gunua vinyo mu Gudia gua Fumu gua mu Ngueze, ana monesa egi akotele gikotelo nu Yesu nu ana khala nu felela dia guhinyina n’enji mu Ufumu wa mu dilu. Mukanda wa Yone mukhapho 6 udi nu malongo avula tuajiya guzula ikhale tuambiwe maji mu nyuma nga ndo tudi imeme iko. Wana gutulongesa egi tudi naye gusha gutshigina mu mulambu wahanele Yesu ha guheta monyo wa ivo nu ivo.