Genezesi
21 Yahova adakumbukira Sara ninge momwe adanenera, ndipo Yahova adachitira Sara mobverana na vomwe adapolomisa. 2 Pamwapo Sara adakhala na mimba ndipo adaberekera Abulahamu mwana, Abulahamu muyo padakalamba. Vimwevi vidachitika ndendende panthawe yomwe Mulungu adapolomisa Abulahamu. 3 Abulahamu adapereka dzina yakuti Isaki kwa mwana yemwe Sara adamuberekera. 4 Isaki padakwanisa ntsiku 8, Abulahamu adamuchita mdulidwe mwana wake muyo, ninge momwe Mulungu adamulamulira. 5 Abulahamu wenze na magole 100 pomwe mwana wake Isaki adabadwa. 6 Manje Sara adati: “Mulungu wanipasa chifukwa chokhalira wokondwa. Aliyese wati abvembo vimwevi akondwe nane pabodzi.”* 7 Adapitiriza kunena kuti: “Ni mbani adakauza Abulahamu kuti: ‘Sara adzayamwise mwana’? Koma onani, namuberekera mwana Abulahamu ali wokalamba.”
8 Manje mwana muyo padakula adamulekesa kuyamwa. Pa ntsiku mwiyo yomwe adalekesa Isaki kuyamwa, Abulahamu adakonza phwando ikulu. 9 Koma Sara ambawona mwana yemwe Hagara wa ku Iguputo adaberekera Abulahamu ankuseka Isaki. 10 Pamwapo Sara adauza Abulahamu kuti: “Thamangisani kapolo wachikazi uyu pabodzi na mwana wake uyu pano, ndawa mwana wa kapolo muyu adzakhalelini wotambira chuma cha banja pabodzi na mwana wangu Isaki.” 11 Koma vomwe Sara adanena ivi pakunena va Isimaeli, vidamuipira maninge Abulahamu. 12 Patsogolo pake Mulungu adauza Abulahamu kuti: “Ayi kuipidwa na vomwe Sara wakuuza pakunena va mulumbwana na kapolo wako muyo. Mubvere,* ndawa mbadwa* zomwe nidakupolomisa zidzachokere kwa Isaki. 13 Pakunena va mwana wa kapolo moyu, nayembo nidzamuchitise kukhala ntundu, ndawa iyembo ni mwana wako.”
14 Manje Abulahamu adamuka machibesebese nkutenga nkate na chola chachikumba cha madzi, ndipo adaviikha paphewa pa Hagara. Padateno adamuuza kuti ambayenda pabodzi na mwana wake muyo. Pamwapo Hagara muyo adanyamuka nkumbandofambafamba muchipululu cha Beere-seba. 15 Pomalizira pake, madzi yadamumalira muchola chachikumba chire, ndipo iye adandomusiya mulumbwana ule pachitsamba. 16 Pamwapo iye adayenda chapatali, nkukakhala pasi payekhayekha pansenga wakuti kankondo kothusiwa na uta kangafike. Adachita vimwevi ndawa muntima mwake adati: “Nikufunalini kuwona mwana wangu ankufa.” Pamwapo adakhala pasi chapatali nkuyamba kulira mokuwa.
17 Pamwapo Mulungu adabva mawu ya mulumbwana muyo, ndipo mngelo wa Mulungu adayankhula na Hagara kuchokera kudzulu kuti: “Ko wachita tani Hagara? Ayi kuchita mantha, Mulungu wabva mawu ya mulumbwana muyo pomwe ali gone apo. 18 Nyamuka! Musa mulumbwana muyo, ndipo umuphate kuti ambakwanise kufamba ndawa nidzamuchitise kukhala ntundu ukulu.” 19 Pamwapo Mulungu adafungula maso Hagara, mwakuti adawona nchera wa madzi. Pamwapo adayenda panchera mwapo nkutungira madzi muchola chachikumba chire, patsogolo pake adapasa mulumbwana muyo kuti amwe. 20 Pomwe Isimaeli ambakula, Mulungu adapitiriza kukhala naye. Mulumbwana muyu ambakhala muchipululu ndipo adakhala shasha wothusa tumikondo pophatisa basa uta. 21 Iye adayamba kukhala muchipululu cha Parana, ndipo amayi wake adayenda kukamutengera nkazi kudziko ya Iguputo.
22 Panthawe mwiyo, Abimeleki pabodzi na Fikolo nkulu wa gulu yake yankhondo, adauza Abulahamu kuti: “Mulungu ali nawe pa vose vomwe unkuchita. 23 Manje lumbira pamaso pa Mulungu kuti udzakhale wokhulupirika kwa inepano, kwa wana wangu na kwa mbadwa zangu. Nakuti udzaonese chikondi chokhulupirika ninge chomwe inepano nakuwonesa. Lumbira kuti udzaonese chikondi chimwichi kwa inepano na kwa wanthu wa mudziko yomwe unkukhala.” 24 Abulahamu adadawira kuti: “Ninkulumbira.”
25 Koma Abulahamu adadandaulira Abimeleki va nchera wa madzi womwe anyabasa wa Abimeleki adatenga mwachipiringu.* 26 Abimeleki adadawira kuti: “Ninkudziwalini yemwe adachita vimwevi, ndipo iwepo ulibe kuniuza nkhani mweyi. Inepano nilibe kuibvako nkhani mweyi, apa nkubveratu kuno.” 27 Manje Abulahamu adatenga nkhosa na ng’ombe nkuvipereka kwa Abimeleki. Ndipo awiri mwawo adachita pangano. 28 Patsogolo pake Abulahamu adapatula wana akazi wa nkhosa 7 pa gulu mwiyo nkuwaikha pawokha. 29 Manje Abimeleki adabvunza Abulahamu kuti: “Ndawa chani wana akazi 7 wa nkhosa awa wawaikha pawokha?” 30 Abulahamu adadawira kuti: “Tambirani wana wa nkhosa akazi 7 womwe ninkukupasani awa, kuti ukhale umboni wakuti ndine nidakumba nchera moyu.” 31 Ndipomwapa malo mwayo adayapasa dzina yakuti Beere-seba,* ndawa yakuti wose awiri adalumbira pamalo mwapo. 32 Iwo adachita pangano pa Beere-seba mwapo, ndipo patsogolo pake Abimeleki pabodzi na Fikolo nkulu wa masocha yake, adabwerera kudziko ya Afilisiti. 33 Pavidateno, Abulahamu adabzala muti wa usika pa Beere-seba, ndipo kumuko adachemerera pa dzina ya Yahova Mulungu yemwe adzakhaleko mpakana kalekale. 34 Ndipo Abulahamu adakhala* mudziko ya Afilisiti kwa nthawe itali.*