Genezesi
22 Patsogolo pake, Mulungu chaiye adayesa Abulahamu ndipo adati: “Abulahamu!” Iye adadawira kuti: “Ine mbuya wangu!” 2 Basi Mulungu adamuuza kuti: “Tenga Isaki mwana wako m’bodzi yekha, mwana wako muyo yemwe umukonda maninge, ndipo muyende ku Moriya. Kumuko ukamupereke ntsembe yoshoka paphiri yomwe nidzakuuze.”
3 Pamwapo Abulahamu adamuka machibesebese, nkumanga chishalo pa bulu wake ndipo adatenga atumiki wake awiri pabodzi na mwana wake Isaki. Adatenga pomwe nkhuni nkuzibadulabadula kuti akashokere ntsembe. Padateno adanyamuka ulendo woyenda kumalo yomwe Mulungu chaiye adamuuza. 4 Pantsiku yachitatu, Abulahamu adakwiza maso yake ndipo adaona malo mwayo na patali. 5 Patsogolo pake Abulahamu adauza atumiki wake kuti: “Imwepo khalani pano na bulu uyu, inepano na mwana wangu uyu tinkuyenda uko kukatumikira Mulungu, tikugumaneni.”
6 Pamwapo Abulahamu adatenga nkhuni zokashokera ntsembe zire nkumusenzesa Isaki mwana wake ndipo iye adatakula moto na chisu. Basi adayendera pabodzi. 7 Manje Isaki adayankhula na Abulahamu ababa wake kuti: “Ababa!” Abulahamu adadawira kuti: “Yankhula mwana wangu.” Pamwapo iye adabvunza kuti: “Moto na nkhuni ni vimwevi vatatakula, manje nkhosa yati tikapereke ntsembe yoshoka iri kuponi?” 8 Abulahamu adadawira kuti: “Mwana wangu, Mulungu apereke nkhosa yakuti tikapereke ntsembe yoshoka. Pamwapo iwo awiri adapitiriza ulendo wawo.
9 Patsogolo pake iwo adafika pamalo yomwe Mulungu chaiye adauza Abulahamu. Padafika pamalo mwayo, iye adamanga guwa yantsembe nkutandalika nkhuni zire paguwa mwapo. Padateno, adamanga Isaki mwana wake muyo manja na minyendo nkumugonesa paguwa mwapo, padzulu pa nkhuni. 10 Pamwapo Abulahamu adatenga chisu chire kuti aphe mwana wake muyo. 11 Koma mngelo wa Yahova adamuchemera kuchokera kudzulu kuti: “Abulahamu! Abulahamu!” Iye adadawira kuti: “Ine mbuya wangu!” 12 Pamwapo mngelo muyo adati: “Ayi kumudzonga mwana muyo ndipo ayi kumuchita chirichose. Manje nadziwa kuti ugopa Mulungu, ndawa ulibe kulamba kupereka mwana wako m’bodzi yekha basi.” 13 Pavidateno Abulahamu adakwiza maso yake nkuona nkhosa imuna pafupi na pamwapo, nyanga zake zenze zokashiwa pamuti wopiringishapiringisha. Manje Abulahamu adayenda kukaitenga nkuipereka ntsembe yoshoka m’malo mwa mwana wake. 14 Pamwapo Abulahamu adapasa malo mwayo dzina yakuti Yahova-yire.* Ndipomwapa mpakana lero pali mawu yakuti: “Mu phiri yake Yahova adzapereke vinthu vofunikira.”
15 Manje mngelo wa Yahova adachemera Abulahamu kachiwiri kuchokera kudzulu, 16 nkumuuza kuti: “Yahova wanena kuti: ‘Ninkulumbira pa dzina yangu, kuti ndawa ya vomwe wachita ivi, pakubvuma kupereka mwana wako m’bodzi yekha basi, 17 shuwa nidzakudalise. Ndipo nidzawandisedi mbadwa* zako ninge nyenyezi zakudzulu komasoti ninge nchenga wa m’mphepete mwa nyanja. Ndipo mbadwa yako idzatenge thaundi* ya wanthu omwe aizonda. 18 Kupitira mwa mbadwa* yako, mitundu yose ya padziko yapasi yadzagumane madaliso ndawa yakuti wabvera mawu yangu.’”
19 Patsogolo pake Abulahamu adabwerera kwa atumiki wake wale nkunyamuka nawo pabodzi nkubwerera ku Beere-seba. Ndipo Abulahamu adapitiriza kukhala ku Beere-seba muko.
20 Vimwivi pavidapita, ntontholo udamufikira Abulahamu wonena kuti: “Milika waberekerambo m’bale wako Nahori wana amuna. 21 Mwana wake woyamba ni Uza, ndipo pali pomwe m’bale wake Buza na Kemueli ababa wake wa Aramu. 22 Pali pomwe Kesede, Hazo, Pilidasi, Yidilafi na Betuele.” 23 Betuele adabereka Rabeka. Wana 8 mwawa ni omwe Milika adaberekera Nahori m’bale wake wa Abulahamu. 24 Ndipo Rauma nkazi mng’ono wa Nahori, adamuberekera pomwe wana awa: Teba, Gahamu, Tahasi na Maaka.