22 Evriwan wea olketa chusim for security gard lo door for kam insaed hem 212 man. Olketa stap lo olketa vilij blo olketa followim famili tree blo olketa.+ David and Samuel wea hem seer*+ appointim olketa hia wea olketa trustim. 23 Olketa man hia and olketa son blo olketa lukaftarem waka for gaedem olketa gate lo haos blo Jehovah,+ wea hem tent. 24 Olketa security gard lo gate stap lo fofala saed, lo east, west, north, and south.+ 25 Samfala taem, olketa brata blo olketa savve kam from olketa vilij wea olketa stap for waka witim olketa for sevenfala day. 26 Fofala leader* wea olketa trustim, olketa nao security gard lo olketa gate. Olketa hia olketa Levite, and olketa lukaftarem olketa rum,* and ples for keepim olketa riches lo haos blo datfala tru God.+ 27 Lo naet, olketa savve security raonem haos blo datfala tru God, bikos olketa lukaftarem waka for gaedem gate, and olketa lukaftarem key and olketa savve openem door lo haos evri morning.