• Psalms 22:16-18
    Niu World Transleison blo Holy Scripture

    • 16 Olketa dog raonem mi,+

      Olketa blokem mi olsem grup blo olketa rabis pipol,+

      Olsem wanfala lion wea attakim olketa hand and feet blo mi.+

      17 Mi savve kaontem evri bon blo mi.+

      Olketa luk lo mi, and lukluk strong lo mi.

      18 Olketa divaedem kaleko blo mi between olketa seleva,

      And olketa iusim olketa smol ston* for divaedem olketa kaleko blo mi.+

  • Isaiah 53:1-12
    Niu World Transleison blo Holy Scripture

    • 53 Hu nao putim faith lo olketa samting wea olketa herem from mifala?*+

      And arm* blo Jehovah+ hem showaot klia lo hu?+

       2 Hem bae kamap olsem wanfala niu branch+ front lo hem,* olsem wanfala rut wea grow lo ples wea drae.

      Lukluk blo hem no spesol, or hem no luk naes.+

      And taem iumi lukim hem, no eniting abaotem lukluk blo hem pullim iumi go lo hem.*

       3 Hem man wea pipol lukdaonem and les lo hem,+

      Hem man wea kasem* olketa pain and savve gud abaotem olketa sik.

      Hem olsem feis blo hem haed from iumi.*

      Olketa man lukdaonem hem, and iumi ting nating nomoa lo hem.+

       4 Tru nao, hemseleva nao tekem aot olketa sik blo iumi,+

      And hem safa from olketa pain blo iumi.+

      Bat iumi ting lo hem olsem hem wanfala nogud sik, wea hem panis from God for mekem hem safa.

       5 Bat olketa spiarim hem+ for sin blo iumi.+

      Olketa killim hem nogud for olketa rong blo iumi.+

      Hem kasem panis for mekem iumi garem peace,+

      And bikos lo olketa garekil blo hem, iumi gud bak moa.+

       6 Iumi evriwan olsem olketa sheepsheep wea wakabaot olobaot nomoa,+

      Each wan followim gogo blo hemseleva,

      And Jehovah mekem for hem nao karem sin blo iumi evriwan.+

       7 Pipol spoelem hem+ and hem letem hemseleva for safa,+

      Bat hem no openem mouth blo hem.

      Olketa tekem hem go olsem wanfala sheepsheep for busarem,+

      Olsem mere sheepsheep wea stap kwaet nomoa front lo olketa wea katem wool blo hem,

      And hem no openem mouth blo hem.+

       8 Bikos olketa spoelem hem and judgem hem nogud, and olketa tekem hem go.

      And hu nao bae wari for herem story abaotem laen blo hem?*

      Bikos olketa aotem hem from midolwan lo pipol wea laef.*+

      And olketa whipim hem* bikos lo olketa sin blo pipol blo mi.+

       9 And ples wea olketa givim for berem hem, hem witim olketa wicked wan,+

      And witim olketa wea rich* taem hem dae,+

      Nomata hem no duim eni rong samting

      And no eni laea toktok kamaot from mouth blo hem.+

      10 Bat hem will blo Jehovah* for pipol killim hem nogud, and letem hem for sik.

      Sapos iu givim laef* blo hem olsem wanfala guilt offering,*+

      Hem bae lukim olketa pikinini* blo hem, bae hem laef for longtaem,+

      And thru lo hem, samting wea Jehovah laekem* bae kamap tru.+

      11 Bikos lo wei wea hem safa, hem bae lukim datwan and hem satisfae.

      And thru lo savve wea hem garem, raeteous wan hia, servant blo mi,+

      Bae hem helpem staka pipol for kamap raeteous,+

      And bae hem karem sin blo olketa.+

      12 From datwan, mi bae givim share blo hem midolwan staka pipol

      And hem bae divaedem olketa gud samting witim olketa maeti man,

      Bikos hem givim laef blo hem go kasem taem hem mas dae+

      And pipol ting lo hem olsem samwan wea duim sin.+

      Hem karem sin blo staka pipol,+

      And hem nao story on behalf lo olketa man wea sin.+

  • Daniel 9:26
    Niu World Transleison blo Holy Scripture

    • 26 “And bihaen 62 week, olketa bae killim dae Messiah+ and hem bae no garem eni samting.+

      “And wanfala leader bae kam witim army blo hem and olketa bae distroem datfala taon and holy ples hia.+ And ples hia bae distroe olsem flood nao distroem. And war bae gohed go kasem end. Evriting bae distroe followim disison blo God.+