35 Then pipol go for lukim samting wea happen. Olketa kam lo Jesus and lukim nao datfala man wea staka demon stap lo hem bifor, hem werem kaleko and tingting blo hem gud bak, hem sidaon lo feet blo Jesus, and olketa fraet nao. 36 Olketa wea lukim datwan olketa storyim nao lo olketa pipol, hao datfala man wea demon stap lo hem bifor hem gud bak moa. 37 Then staka lo olketa wea stap lo olketa area blo olketa Gerasene askem Jesus for hem mas lusim ples blo olketa, bikos olketa barava fraet tumas. Then hem go insaed lo boat and redi for go nao.