24 Iu tekem olketa man hia witim iu and iu mekem iufala evriwan for kamap klin and iu nao bae peim expense blo olketa, mekem olketa savve shavem hed blo olketa. Then evriwan bae savve dat olketa story wea gogo raon abaotem iu hem no tru, bat iu gohed for duim stret samting and iuseleva tu keepim Law.+

26 Then lo next day, Paul go witim olketa man hia and hem mekem hemseleva kamap klin witim olketa man hia,+ and hem go lo temple for givim notice abaotem wat day nao bae olketa finis for kamap klin, and priest bae mekem sakrifaes for each wan lo olketa.