Revelation wea John Kasem

10 Mi lukim nara strong angel kam daon from heven.* Wanfala cloud raonem hem olsem kaleko, and wanfala rainbow antap lo hed blo hem, and feis blo hem olsem sun,+ and tufala leg* blo hem olsem olketa bigfala post wea olsem fire. 2 And hem holem wanfala smol scroll wea open finis lo hand blo hem. Hem putim raet leg blo hem antap lo sea and left leg blo hem lo land. 3 And hem singaot big olsem taem wanfala lion hem singaot big.+ And taem hem singaot big, voice blo sevenfala thunder+ olketa toktok kam.

4 Taem sevenfala thunder toktok, mi redi for raetem daon wanem olketa talem, bat mi herem wanfala voice from skae*+ hem sei: “Sealim olketa samting wea sevenfala thunder hia talem and no raetem daon.” 5 Datfala angel wea mi lukim wea hem standap antap lo sea and lo land, hem apim raet hand blo hem go lo heven, 6 and hem promis olsem lo nem blo God wea stap for olowe,+ wea wakem skae and evri samting lo hem, and earth and evri samting lo hem, and sea and evri samting lo hem, hem sei:+ “God bae no weit moa. 7 Bat lo taem wea datfala mek-seven angel+ hem redi for blowim trumpet blo hem,+ datfala holy secret+ wea God talemaot olsem gud nius lo olketa servant blo hem, wea hem nao olketa profet,+ hem kamap tru.”

8 And mi herem moa datfala voice from skae.+ Hem tok kam lo mi and sei: “Go, tekem datfala scroll wea open finis from hand blo datfala angel wea standap antap lo sea and lo land.”+ 9 So mi go lo datfala angel and talem hem for givim mi datfala smol scroll. Hem sei lo mi: “Tekem and kaikaim.+ Bae hem mekem bele blo iu saoa bat lo mouth blo iu bae hem swit olsem honey.” 10 Mi tekem datfala smol scroll from hand blo datfala angel and mi kaikaim nao.+ Hem swit olsem honey lo mouth blo mi,+ bat bihaen mi kaikaim, bele blo mi saoa nao. 11 And olketa sei lo mi: “Iu mas talem profesi moa abaotem pipol and olketa nation and olketa languis and staka king.”