MEK-TU LETA FOR OLKETA THESSALONIANS

1 From Paul, Silvanus* and Timothy,+ for iufala lo kongregeson lo Thessalonica wea wan mind witim God, wea hem Dadi blo iumi, and wea wan mind tu witim Lord Jesus Christ.

2 Mifala laekem for iufala kasem bigfala kaeness* and peace from God, wea hem Dadi blo iumi and Lord Jesus Christ.

3 Olketa brata, mifala mas talem thankiu evritaem lo God for iufala. Diswan hem fitim, bikos faith blo iufala hem barava kamap strong moa and love blo each wan lo iufala for olketa narawan hem barava kamap strong.+ 4 Dastawe, mifala praod lo iufala+ bikos iufala stand strong and iufala faithful nomata iufala kasem persecution and iufala safa* lo olketa hard taem* wea kasem iufala.+ 5 Evri samting hia pruvim judgment blo God hem raeteous, wea diswan mekem iufala fit for kasem datfala Kingdom blo God, wea hem nao reason why iufala safa.+

6 Disfala judgment blo God hem raeteous bikos hem changem bak trabol lo olketa wea kosim trabol for iufala.+ 7 Bat iufala wea safa lo olketa hard taem, God bae helpem iufala and mifala tu, taem Lord Jesus+ hem showaot lo heven witim olketa paoaful angel blo hem,+ 8 lo bigfala fire taem hem pei bak lo olketa wea no savve lo God, and olketa wea no obeyim datfala gud nius abaotem Lord blo iumi Jesus.+ 9 Olketa hia wea bae kasem panis for mas finis for olowe,+ bae no stap moa front lo Lord and hem bae no iusim bigfala paoa blo hem for helpem olketa, 10 lo taem wea Lord hem kam for kasem glory witim olketa holy wan blo hem, wea lo datfala taem, evriwan wea showimaot faith bae tinghae lo hem. Bikos iufala wea bilivim toktok blo mifala bae tinghae lo hem tu.

11 Dastawe, mifala evritaem prea for iufala. Mifala prea lo God for hem ting lo iufala olsem iufala fit for kasem samting wea hem markem for iufala,+ mekem hem iusim paoa blo hem for duim evri gud samting wea hem laek for duim and evri waka iufala duim bikos lo faith blo iufala. 12 Diswan hem for mekem nem blo Lord blo iumi Jesus kasem glory, and for iufala wan mind witim hem, followim kaeness* blo God and Lord Jesus Christ.

2 Bat olketa brata, lo taem wea Lord blo iumi Jesus Christ hem stap*+ and iumi bae stap tugeta witim hem,+ mifala askem iufala for 2 no kwiktaem lusim stretfala tingting or seke lo eni message blo spirit or message wea kam from eniwan+ or iufala readim insaed leta wea pipol sei mifala nao raetem, for sei day blo Jehovah*+ hem kam finis.

3 No letem eniwan trikim iufala, bikos bifor datfala day hem kam, datfala wei for apostate+ mas kam firstaem and datfala man for brekem law+ bae showaot klia. Hem nao datfala son wea bae finis olowe.+ 4 Hem wanfala enemy and hem mekhae lo hemseleva winim evriwan wea olsem wanfala god, or eni samting wea pipol worshipim. From diswan, hem sidaon lo temple blo God and hem sei hem nao wanfala god. 5 Hao, iufala forgetim nao taem wea mi stap witim iufala, mi savve storyim olketa samting hia lo iufala?

6 And distaem iufala savve hu nao olketa wea olsem samting wea holem bak datfala man for brekem law, mekem gogo bae hem showaot lo barava taem blo hem. 7 Hem tru, man for brekem law hia hem stap finis,+ bat hem haed yet go kasem taem wea olketa hia wea holem bak datwan no stap nao. 8 Then lo datfala taem nao man hia wea brekem law bae showaot, taem Lord blo iumi Jesus bae finisim hem witim paoa* wea kamaot from mouth blo hem,+ wea datwan hem for showimaot klia+ dat Jesus hem stap.* 9 Bat datfala man for brekem law hem stap bikos Satan+ nao givim paoa lo hem for duim olketa mirakol, olketa laea saen, and olketa samting wea mekem pipol sapraes,+ 10 and evri samting wea no raeteous for trikim man+ wea bae finis, diswan hem bikos olketa no acceptim and lovem samting wea tru mekem olketa maet savve sev. 11 Dastawe God letem tingting wea no stret for trikim olketa, mekem olketa savve bilivim olketa laea toktok,+ 12 and kasem judgment bikos olketa no biliv lo truth bat hapi blo olketa kam from olketa samting wea no raeteous.

13 Bat mifala mas talem thankiu evritaem lo God for iufala olketa brata wea Jehovah* lovem, bikos hem chusim iufala lo firstaem+ for iufala sev, taem hem givim spirit blo hem lo iufala for mekem iufala holy,+ and bikos lo faith wea iufala garem lo datfala truth. 14 Hem iusim datfala gud nius wea mifala talemaot for chusim iufala for iufala sev, mekem iufala savve kasem datfala glory blo Lord blo iumi Jesus Christ.+ 15 So olketa brata, iufala standap strong+ and gohed for biliv strong lo olketa samting wea iufala lanem finis,+ nomata datwan hem message wea kam from eniwan or from wanfala leta from mifala. 16 And tu, mi prea for Lord blo iumi Jesus Christ and God wea hem Dadi blo iumi wea lovem iumi,+ for hem givim iumi comfort for olowe and hope,+ bikos kaeness* blo hem 17 comfortim iufala and strongim iufala mekem iufala evritaem duim and talem samting wea gud.

3 So olketa brata, evritaem prea for mifala,+ mekem message blo Jehovah* savve gohed kwiktaem for kasem staka ples+ and for pipol mekhae lo datwan, olsem iufala tu duim datwan. 2 Prea tu for God sevem mifala from olketa nogud man wea spoelem mifala,+ bikos faith hem no samting wea evriwan nao garem.+ 3 Bat Lord hem faithful, and bae hem strongim iufala and protectim iufala from datfala wicked wan. 4 Mifala wea followim Lord barava sure abaotem iufala, dat iufala duim olketa samting wea mifala talem and bae iufala gohed for duim datwan. 5 Mifala prea for Lord hem gohed for leadim gud heart blo iufala, mekem iufala lovem God+ and garem strong wea iufala needim+ for gohed followim Christ.

6 Distaem olketa brata, mifala talem iufala lo nem blo Lord Jesus Christ, for stap klia lo eni brata wea hem no obey+ and wea no followim olketa samting wea mifala talem lo iufala.*+ 7 Bikos iufala savve lo hao iufala shud followim example blo mifala,+ bikos taem mifala stap witim iufala mifala evritaem obey, 8 and eni kaikai wea mifala kaikaim, mifala peim datwan.+ Mifala barava waka hard lo day and lo naet mekem mifala no putim hevi lo eniwan lo iufala.+ 9 Mifala garem raet for kasem samfala samting from iufala,+ bat mifala seleva laek duim samting mekem mifala savve showim example for iufala followim.+ 10 Tru nao, taem mifala stap witim iufala, mifala savve talem disfala toktok lo iufala: “Sapos eniwan no laek waka, hem shud no kaikai tu.”+ 11 Bikos mifala herem samfala lo there olketa no laek obey.+ Olketa nating waka, bat olketa poke nose lo samting wea hem no bisnis blo olketa.+ 12 Lo kaen pipol olsem, mifala talem olketa and advaesem olketa thru lo nem blo Lord Jesus Christ, for olketa mas waka kwaet nomoa and kaikaim kaikai wea olketa seleva waka hard for hem.+

13 Bat for iufala olketa brata, iufala mas no givap for duim olketa gudfala samting. 14 Sapos eniwan hem no obeyim wanem mifala talem lo disfala leta, iufala mas markem hem and stop for associate witim hem,+ mekem hem savve feel shame. 15 And no ting lo hem olsem wanfala enemy, bat gohed for helpem hem+ bikos hem wanfala brata.

16 Mifala prea for Lord wea hem nao givim peace for evritaem givim peace lo iufala lo evri samting.+ Mifala prea tu for Lord hem stap witim iufala evriwan.

17 Mi Paul nao mi pasim kam love for iufala, and mi tu mi raetem.+ Taem iufala lukim disfala raeting lo evri leta, iufala mas savve mi nao mi raetem.

18 Mifala prea lo God for kaeness* blo Lord blo iumi Jesus Christ hem stap witim iufala evriwan.