Short Tongue Hem Finis!
FOR klosap eiti year, Wekap! hem helpem pipol for deal withim problem bilong living. Long samfala taem, hem talem pipol samfala niu samting and tingting long saed bilong medicine, wea savvy barava affectim laef bilong olketa, olsem disfala story showimaot.
Matthew hem born long 1989 long north bilong England. Go kasem taem hem tu year, hem olraet. Then, sek nomoa taem famili holiday hem kasem barava nogud short tongue.
“Mitufala hasband bilong mi lukim doctor wea savvy long diswan,” Margaret, mami bilong hem say, “and doctor talem mitufala hao olketa no savvy duim eni samting go kasem taem wea hem seven year bikos go kasem datfala age hem hard for pikinini bossim voice bilong hem. But taem Matthew go long skul, hem no laekem way wea olketa pikinini savvy tok spoelem hem, and short tongue bilong hem kamap moa worse. Hem no laekem way for stap midolwan planti pipol and go-go hem shame tumas. Way for attendim meeting long Kingdom Hall kamap hardfala samting.
“Then mifala lukim ‘Hope for Olketa Wea Short Tongue,’ insaed ‘Lukluk Long World,’ long English Wekap! magasin bilong April 8, 1995. Hem storyim lelebet work bilong wanfala sekson bilong olketa doctor long Sydney, Australia, wea helpem olketa pikinini wea garem problem bilong short tongue.
“Mifala raet go long University bilong Sydney and mifala kasem wanfala naesfala leta from Dr. Mark Onslow, wea talem mifala for ringim hem. From mifala stap long narasaed bilong world, grup bilong olketa doctor trae for treatim hem ‘from farawe ples.’ Mitufala, olsem dadi and mami bilong Matthew, kasem olketa instruction thru long telephone, fax, and kaset. Disfala treatment fitim wanem Matthew needim. Mi savvy sidaon withim hem and helpem hem for stretem olketa toktok bilong hem. Mi savvy praisim and givim hem small present sapos toktok bilong hem ‘stret.’
Sixfala month bihaen, Matthew hem no olsem pikinini wea shame tumas but hem kamap hapi, want for fren. Distaem hem ansa long kongregeson meeting and barava hapi for duim Bible reading long Kingdom Hall. Hem tek part tu long haos-tu-haos ministry. Toktok bilong hem gud nao!
“Mifala barava hapi long datfala small nius insaed long Wekap! wea changim laef bilong son bilong mifala!”—Contributed.