Olketa Orchid Stap Long Danger?

Olketa orchid fitim planti ples. Olketa savvy grow long graon, long tree, or long olketa ston tu. Olketa long International Union for Conservation of Nature and Natural Resources (IUCN) givim warning hao disfala nambawan plant garem staka different kaen wea no savvy grow moa long bush sapos man go ahed for spoelem ples wea olketa grow long hem. Wendi Strahm bilong IUCN hem say: “Change long ples wea olketa grow long hem meanim insect wea orchid needim for garem flaoa hem gogo for finis or hem muv go long different ples.” Hem talem moa: “Taem dat wan hem happen, bae olketa orchid no savvy grow moa.”

Samting olsem 20 percent bilong faev million orchid wea olketa sellim long world olketa tekem from bush. Olketa long IUCN talem hao diswan hem spoelem way for protectim disfala nambawan plant. Dastawe, olketa long IUCN talem olketa wea laek for kasem orchid for baem olketa wea grow long nursery and no for aotem olketa from bush.

Winim 20,000 different kaen orchid stap wea olketa man savvy abaotem. Samfala long olketa plant hia kasem hae bilong 0.6 centimeter nomoa; samfala moa olsem rope wea grow kasem 30 meter. Planti long olketa orchid hia grow long hot, tropical area wea savvy garem planti rain. But for stap laef, olketa needim environment for balance.

But sorry tumas, fasin bilong man for no luksavvy and for no care go ahed for spoelem environment, and mekem planti different kaen plant, and olketa orchid tu, stap long danger. But klosap nao diswan bae finis. Long niufala world wea God promisim, man bae stap long wan mind withim creation. Long datfala taem toktok bilong psalm bae fulfill: “Letem graon hem hapi and evri samting wea stap insaed. Long semtaem letem olketa tree bilong forest singaot withim hapi.”—Psalm 96:12.

[Credit Line long page 25]

Jardinería Juan Bourguignon

[Credit Line long page 25]

Jardinería Juan Bourguignon