Hem No Givap
LONG October 5, 1995, Matt Tapio wea hem 14-year hem operate from wanfala part long brain bilong hem boela. Boela hia hem barava nogud cancer. Operation hia hem first wan long staka wea hem needim long next tu and haf year. Olketa iusim enikaen medicine and radiation treatment tu.
Matt hem stap long Michigan, U.S.A., wea hem go long gavman skul and attendim olketa Kristian meeting. Hem iusim gud olketa chance for story withim olketa teacher and fren long class abaotem olketa belief bilong hem. Hem tek part tu for story long olketa narawan insaed long pablik ministry. Taem hem stap long hospital—hem spendem 18 month bilong last tu and haf year long laef bilong hem insaed olketa hospital—hem offerim staka hundred Bible literature withim pipol long there.
Planti taem hem luk olsem Matt bae no laef nao, but evritaem hem kamap gud moa. Wantaem, taem hem gogo for hospital, hem fall daon and hem haf-dead nao, hem no breath nao. Olketa pumpim chest and breath insaed mouth bilong hem, and go-go hem gud moa. Taem hem wekap, hem start for krae and tok big: “Mi wanfala man for faet! Mi wanfala man for faet! Mi no man for givap!” Pipol talem hao faith bilong Matt long God nao mekem hem laef longtaem lelebet.
Matt kasem wanfala samting wea hem laekem tumas long January 13, 1996, taem hem baptaes for showimaot dedication bilong hem long Jehovah. Hem baptaes insaed wanfala private pool from sik bilong hem. Tu-three day bihaen, hem go long hospital for operate moa. Long August 1997, Matt to-toraot for tu-three week, but hem kamap gud moa bihaen samfala operation.
Nomata evri samting hia, Matt go ahed for garem hapi tingting long laef, hem mek-funny withim olketa doctor and nurse. Olketa no meanim why nao Matt garem nambawan hapi olsem. Wanfala doctor talem hem: “Matt, sapos mi nao iu, mi bae satem curtain, kavarem hed, and talem evriwan for go long bush.”
Long February 1998, Matt go back long haos bilong hem long wanfala long olketa last taem bilong hem. Hem barava hapi tumas for stap laef yet and kasem haos bilong hem moa, so taem hem go insaed long door, hem say: “Mi hapi tumas! Iumi prea firstaem.” Then hem talem hapi bilong hem long Jehovah insaed long prea. Tufala month bihaen, long April 19, hem dae from disfala cancer.
Bifor datwan, olketa recordim wanfala interview withim Matt and playim long meeting long Kingdom Hall bilong Olketa Witness Bilong Jehovah. Olketa askim hem: “Wanem nao iu savvy talem long olketa wea garem gud health lelebet, abaotem ministry bilong iumi and olketa Kristian meeting?”
Matt ansa olsem: “Duim wanem iu savvy duim distaem. . . . . Iu no savvy wanem nao bae happen. . . . But nomata wanem samting happen, mas no givap for witness abaotem Jehovah.”