Pipol for Mekem Peace or War?
“WANFALA Kristian mas no join long war.” Datfala toktok showimaot klia tingting bilong olketa firstfala Kristian abaotem war, wea Thoko and Malusi Mpulwana talem olsem insaed Echoes, wanfala magasin wea World Council of Churches (WCC) pablisim. Olketa say “bihaen Kristian Church join withim politik” nomoa, church start for “acceptim need for garem war.” Wanem nao kamaot from diswan? Way wea Kristendom supportim war kam kasem distaem hem nogud tumas dastawe bihaen long mek-tu world war, United Church of Christ long Japan lukim need for “Konfes for Karim Blame for World War II.”
Distaem, samting olsem 50 year bihaen long datfala war, way bilong Kristendom hem semsem yet. Dr. Roger Williamson wea work for Church of England hem say “sapos iumi askim iumi seleva olsem olketa Kristian sapos long barava way iumi strong for talem Nomoa long war and Yes long love bilong Kraest, hem klia iumi . . . need for konfesim planti samting yet.” Nomata WCC talem long 1948 hao “way for iusim war for stretem raoa hem no fitim teaching and example bilong Lord bilong iumi, Jesus Kraest,” Williamson hem say olketa church bilong Kristendom planti taem “garem bighed tingting, no acceptim nara pipol, spoelem freedom bilong pipol and mekem raoa kamap moa worse.” Dastawe hem say “religion . . . planti taem mekem problem kamap moa worse winim way for stretem.”
War wea divaedem Yugoslavia bifor hem wanfala example. Nomata barava raf fasin go ahed for planti year, olketa church faendem hard tumas for garem wan mind long problem wea kamap long datfala kantri. Why nao olsem? Dr. Williamson say nomata olketa say olketa olsem Kristian brata, olketa bigman bilong religion long Serbia and Croatia divaed olsem olketa bigman long gavman bilong datfala kantri. Long there and narafala ples olketa bigman bilong Kristendom, nomata bilong Catholic, Orthodox, or Protestant, no duim samting olsem pipol for mekem peace but olsem “chaplain wea teksaed withim sekson bilong olketa nomoa.” Nomata WCC garem winim 300 church distaem, Dr. Williamson say hem “hard for faendem samfala example long olketa church wea barava mekem . . . peace.”
Tru nao, hem hard. Olketa member church bilong WCC toktok nomoa for joinim back olketa religion, but wanfala religion hem stap wea win finis for helpem pipol wea member bilong different religion bifor for fren back and for kamap trufala Kristian. Distaem, from love for God nao muvim olketa and olketa laek for “aftarem peace withim evri pipol,” long 233 kantri, winim 5.8 million Witness Bilong Jehovah no willing for join long war bilong olketa kantri—nomata olketa faet wea kamap long ples olsem Asia, Latin America, Middle East, North Ireland, Rwanda, or Yugoslavia bifor. (Hebrews 12:14; Matthew 22:36-38) But, olketa fulfillim Bible profesi taem olketa “hammerim sword bilong olketa for kamap hou” and “no learnim war moa.”—Micah 4:3.
[Olketa piksa long page 27]
Pipol whipim nogud samfala Witness Bilong Jehovah long Africa bikos olketa no teksaed or olketa kamap refugee