India and China Kasem Danger From Tobacco

FROM MAN WEA RAET FOR WEKAP! LONG INDIA

TAEM wei for againstim advertising bilong tobacco long olketa Western kantri kamap moa big and planti moa pipol savve abaotem nogud health wea wei for smoke savve givim, olketa big tobacco kampani tan go long olketa kantri long East for sellim moa tobacco. Samfala report wea World Bank sponsarem showimaot hao go kasem year 2010, wan million pipol long China bae savve dae evri year from tobacco. Disfala British Medical Journal talem hao 100 million Chinese wea no kasem 29 year bae dae from wei for smoke.

World Health Organization talem hao China witim India—wea garem klosap wan billion pipol—bae kasem “barava bigfala namba bilong pipol wea kasem sik from tobacco.” Samfala report sei samting olsem 20 million pikinini long there start for smoke evri year. Wanfala man from South India savve smoke tumas for planti year. Hem raet go long olketa wea pablisim Wekap! and sei thankiu for wanfala article wea helpem hem for stop evribit from smoke. Article hia nao “You Can Quit—We Did!” wea kamap insaed English Wekap! bilong December 8, 1998 issue.

Wanem nao samfala reason why iu mas stop smoke? Samfala interesting kwestin stap long page 25 bilong brochure Wanem Nao God Mas Kasem From Iumi? wea garem 32 page. Iu savve ask for wanfala copy sapos iu raetem and postim information long daon go long address wea stap long daon or long eni address wea fitim iu long page 5 bilong disfala magasin.

□ Sendem kam wanfala brochure Wanem Nao God Mas Kasem From Iumi?

□ Plis kam lukim mi for wanfala free hom Bible study.