Klosap for Finis Evribit
SAM, thri-year-old gorilla long foto hia, barava luk sorre. Bat diswan shud no mekem iumi sapraes. Olketa man for hunting killim dae mami bilong hem and lusim hem witim no eni parents and no eni wei for go bak long bush. Sorre tumas, tu-thri month bihaen olketa tekem disfala piksa, Sam hem dae from sik. Bat hem no disfala gorilla nomoa wea no garem gudfala chance for stap laef.
Wei for go ahed for distroem ples bilong olketa mekem olketa insaed list bilong olketa kaen animal wea gogo for finis evribit. And bikos long samfala ples olketa kaikaim gorilla, olketa man for hunting witim gun tu mekem future bilong olketa animal hia stap long danger. Future bilong olketa gorilla maet luk no mas gud, bat for samfala narakaen animal, diswan hem moa worse.
Datfala International Union for Conservation of Nature and Natural Resources (IUCN) givim sorre report abaotem staka kaen animal long world. Insaed tu-thri year wea just go pas, staka moa stap long danger and hao fast olketa gogo for finis evribit hem big tumas. IUCN, wanfala organization wea lukluk long staka thousand kaen animal, hem listim nem bilong olketa wea gogo for finis evribit, and hem goal bilong olketa for mekem pipol savve long danger wea olketa hia feisim.
Klosap wanfala long evri fofala mammal long world and samting olsem wanfala long evri eitfala bird stap long danger for finis evribit. Bat diswan hem just olketa wea olketa faendaot abaotem. Staka moa animal stap wea no eni savve stap abaotem danger wea olketa insaed.
Sapos disfala nogud wei mekem iu sorre, hao nao mas feeling bilong Creator bilong iumi? Hem sei insaed Word bilong hem Bible: “Evri animal long forest hem bilong mi.” (Psalm 50:10, Today’s English Version) So hem mas no ting nating long disfala nogud wei for distroem samting hem wakem. Long buk bilong Revelation, God promisim iumi hao hem bae “finisim olketa wea spoelem earth.”—Revelation 11:18.
For protectim olketa animal long earth and environment wea isi for spoelem, wea iumi evriwan depend long hem, hem tufala nomoa long olketa important samting wea Kingdom bilong God bae duim taem ‘God mekem evri samting kamap niu.’—Revelation 21:5; Matthew 6:10.
[Box/Picture on page 12, 13]
Tiger (Panthera tigris)
◼ Namba wea olketa tingse stap yet: midolwan 5,000 and 7,500 (Wan handred year bifor, diswan hem samting olsem 100,000)
◼ Main danger: olketa man for hunting, poison, ples hem stap lus nao, stap farawe from each other
[Box/Picture on page 13]
Giant Panda (Ailuropoda melanoleuca)
◼ Namba wea olketa tingse stap yet: 1,000—wea mekem hem mammal wea barava hard for faendem
◼ Main danger: no garem mas pikinini and wei wea bambu forest wea hem kasem kaikai bilong hem, hem distroe
[Credit Line]
Foto: Zoo de la Casa de Campo, Madrid
[Box/Picture on page 13]
Orangutan (Pongo pygmaeus)
◼ Namba wea olketa tingse stap yet: samting olsem 20,000
◼ Main danger: forest fire, logging, olketa man for hunting, and bisnis for sellim for man keepim
[Credit Line]
Foto: Zoo, Santillana del Mar, Cantabria, España
[Box/Piksa long page 14]
Lesser (Red) Panda (Ailurus fulgens)
◼ Namba wea olketa tingse stap yet: no savve, bat luk olsem hem gogo daon from olketa man spoelem nao ples hem stap and hem no garem mas pikinini
◼ Main danger: olketa man for hunting, distroe bilong olketa bambu forest, and from olketa farm animal kaikaim area
[Credit Line]
Foto: Zoo de la Casa de Campo, Madrid
[Box/Piksa long page 14]
Goeldi’s Monkey (Callimico goeldii)
◼ Namba wea olketa tingse stap yet: no savve (olketa faendem disfala monkey long 1904 nomoa)
◼ Main danger: distroe bilong Amazon rain forest and wei wea olketa stap farawe from each other, wea mekem isi for olketa dae aot
[Credit Line]
Foto: Zoo, Santillana del Mar, Cantabria, España
[Box/Piksa long page 14]
Red-Crowned Crane (Grus japonensis)
◼ Namba wea olketa tingse stap yet: samting olsem 2,000
◼ Main danger: bangam olketa electric wire, spoelem ples for bornem pikinini, and pollution
[Credit Line]
© 1986 Steve Kaufman