Hao Nao for Givim Discipline Long Pikinini?
National Post niuspepa long Canada hem sei: “Olketa problem kamap taem parents appruvim olketa pikinini nomata wanem samting olketa duim.” Samfala parents tingse diswan hem helpem pikinini for feel gud abaotem hemseleva. Bat, savveman Roy Baumeister sei “hem fitim for man feel gud abaotem hemseleva taem datwan kamaot from wei wea hem barava kasem wanfala goal, bat parents shud ting strong for teachim olketa pikinini for garem fasin for kontrolem seleva.”
Dadi or mami wea fraet for stretem pikinini taem hem duim rong samting, hem spoelem datfala pikinini. Hem bikos wei for stretem pikinini hem wei for teachim hem. So hem teachim pikinini wea duim rong for no mekem datfala sem mistek moa. Hem tru, parents mas stap klia long discipline wea raf and wea no fitim rong wea pikinini duim. (Jeremiah 46:28) Olketa mas mek sure olketa no ova tumas for stretem hem. Bible talem: “Iufala dadi, no mekem pikinini bilong iufala kros evritaem, nogud heart bilong olketa kamap hevi.”—Colossians 3:21.
Long Bible, wei for stretem samwan hem evritaem join witim love and kwaet fasin, no kros and raf fasin. Man wea savve tumas for givim kaonsel mas “kaen long evriwan, . . . bossim hemseleva taem nogud samting kamap, teachim witim kwaet fasin olketa wea no garem stretfala feeling.” (2 Timothy 2:24, 25) So, wei for stretem pikinini mas no samting parents duim for satisfaem kros bilong olketa. Bible nating appruvim eni samting wea savve spoelem pikinini.
Planti million pipol raonem world kasem gud samting from disfala 192-page pablikeson Secret for Kasem Hapi Famili. Samfala long olketa chapter wea gud for teach hem “Trainim Pikinini From Taem Hem Baby Yet” and “Helpem Teenager Bilong Iu Grow Ap Gud.” For kasem copy bilong iu, plis raetem information long daon and sendem go long address wea stap long daon or address wea fitim long page 5 bilong disfala magasin. Iu bae kasem olketa idea wea savve helpem iu for stretem olketa problem and mekem famili laef kamap hapi olsem Creator wantem for iumi.
□ Sendem kam wanfala copy bilong buk Secret for Kasem Hapi Famili.
□ Plis kam lukim mi for wanfala free hom Bible study