“Hem Kam Long Barava Taem”

HEM nao samting wea wanfala man from taon bilong Abakaliki hem sei taem hem raetem leta long branch office bilong Olketa Jehovah’s Witness long Nigeria. Hem story abaotem datfala brochure Taem Samwan wea Iu Lovem Hem Dae, wea no longtaem go nomoa samwan givim for hem. Hem story olsem:

“Waef bilong mi, Tochi, wea mi lovem tumas, hem dae bihaen hem bonem pikinini long June 18, 2000. Winim wan month bihaen mi no savve winim feeling bilong mi for sorre, wei for no savve feelim eniting, feeling olsem mi lus, and hard for bilivim wei wea disfala sorre samting hem kasem mi. Then long July wanfala Jehovah’s Witness hem givim mi wanfala copy bilong pablikeson bilong iufala Taem Samwan wea Iu Lovem Hem Dae. Long mi datfala brochure hem olsem wanfala medicine, and witim help bilong advaes wea stap insaed, gogo mi start for tek kontrol long laef bilong mi moa. Hem strongim mi for garem hope and mekem mi luksavve hao nomata mi sorre tumas, hope hem stap.”

Maet iu or samwan wea iu savve long hem bae kasem comfort from wei for readim disfala 32-page brochure. For kasem wanfala copy plis raetem information long daon and sendem go long address wea stap long daon or address wea fitim long page 5 bilong disfala magasin.

□ Sendem kam wanfala copy bilong brochure Taem Samwan wea Iu Lovem Hem Dae.

□ Plis kam lukim mi for wanfala free hom Bible study.