Waswe, Hope for Peace Hem Katdaon?

“Distaem hem feel olsem iumi stap . . . long midol bilong wanfala cyclone, wanfala trabol wea winim eni narawan.”​—“La Repubblica” niuspepa, Rome, Italy.

BIHAEN olketa terrorist attak last year long New York City and Washington, D.C., staka pipol no sure wanem nao bae happen long future bilong olketa man. Iumi lukim planti piksa long Television wea showim taem Twin Towers bone and foldaon, and tu barava sorre feeling and feeling for lus hope bilong olketa long there. Olketa piksa hia mekem pipol raonem full world feel nogud tumas. For join witim datfala wei for feel nogud hem feeling for tingim hao world change evribit from bifor. Waswe, datwan hem tru?

War hem start nao bihaen long September 11, 2001. No longtaem bihaen, olketa nation wea bifor no laekem each other olketa join tugeta for daonem terrorism. From diswan, olketa distroem staka samting and killim dae staka pipol. Bat bigfala change for planti pipol evriwea long world nao hem wei for no feel sef, feeling hao no eniwan barava sef long eni ples.

Olketa leader bilong world feisim olketa barava big problem. Olketa pipol for talem nius no sure hao for stopem terrorism for spread kwiktaem, bikos luk olsem poor living and wei for garem strong feeling for samting—olketa problem wea luk olsem no eniwan savve hao for stretem—olketa nao kosim diswan. Wei wea no followim justice kamap big tumas evriwea long world wea evri samting hia nao savve mekem big raoa kamap. Pipol evriwea no sure sapos olketa problem bilong world bae finis or nomoa. Waswe, bae war—witim evri nogud samting wea kamaot from datwan olsem wei for safa, dae, and wei for distroe—finis enitaem?

Planti million pipol tan go long religion for ansarem olketa kwestin hia. Olketa narawan daotem diswan. Waswe long iu? Waswe, iu ting olketa bigman bilong religion savve ansarem olketa kwestin olsem? And waswe, olketa savve help for mekem peace kamap thru long prea bilong olketa?