Wat Olketa Scientist Hard for Explainim

Luk olsem olketa scientist studyim klosap evri samting wea olketa discoverem lo universe. Bat, staka important kwestin stap yet wea olketa no savve lo ansa blo hem.

Waswe, olketa scientist savve lo hao universe and laef hem start? Simpol ansa for datwan, hem no. Samfala sei wanfala branch blo science wea olketa kolem lo cosmology, hem savve explainim hao universe hem start. Bat, wanfala professor blo astronomy lo Dartmouth College, Marcelo Gleiser, wea no sure sapos God hem stap, sei: “Mifala no savve explainim yet hao universe hem start.”

Diswan semsem tu witim wanem article lo Science News magasin hem talem abaotem hao laef hem start. Hem sei: “Hem hard for iumi barava savve hao laef lo Earth hem start: Staka geological record abaotem wat hem really happen lo Earth lo bifor hem lus finis.” Olketa toktok hia showimaot hao science hem no savve yet lo ansa for disfala kwestin, Hao nao universe and laef hem start?

Bat iu maet ting olsem, ‘Sapos samwan nao designim laef lo earth, hu nao designim?’ Iu maet garem tu olketa kwestin olsem: ‘Sapos wanfala wise and loving Creator hem stap, why nao olketa man safa? Why nao hem letem staka difren kaen religion for stap? Why nao hem letem olketa wea worshipim hem for duim staka nogud samting?’

Science seleva no savve ansarem olketa kwestin olsem. Bat datwan no minim hem bae hard nao for iu faendem olketa ansa wea mek sense. Tru samting nao, staka pipol faendem ansa lo Bible wea mekem olketa satisfae.

Sapos iu laek for savve why samfala scientist wea studyim Bible bilivim dat wanfala Creator hem stap, go lo jw.org and search for olketa video series Tingting Bilong Samfala Abaotem Hao Laef Hem Start.

Olketa kasem pruv from Science and Bible

Georgiy N. Koidan, chemist

“Lo waka blo mi, mi savve joinim olketa chemical for mekem olketa molecule. Hem olsem wei for pleim game chess: Iu need for planim gud firstaem hao for iu duim each muv. Taem iu wakem molecule, sapos iu misstim wanfala step bae hem no savve join tugeta. Nomata waka blo mi hem barava complicated, hem simpol nomoa taem mi comparem go witim staka thousand chemical reaction wea kamap insaed lo olketa living cell wea producem olketa molecule. Datwan mekem mi for bilivim dat masbi wanfala best Chemist hem stap, hem nao Creator.

“Taem mi studyim Bible, mi luksavve hem no wanfala ordinary buk. Olketa finis for raetem Bible samting olsem 2,000 years go finis, bat mi lukim hao olketa advaes blo hem still barava fitim tuday. Wanem hem talem abaotem hao for stretem problem lo famili, lo waka ples, and witim olketa neiba hem barava help. Mi luksavve olketa kaen advaes olsem, hem only kam from samwan wea barava wise.”

Yan-Der Hsuuw, embryologist

“Taem embryo hem start for form, evri cell mas waka tugeta for changem olketa cell hia for kamap olketa nerve, muscle, bone, blood, and olketa nara tissue and gogo diswan formimap wanfala baby. Mifala still no minim gud yet datfala process lo hao olketa cell hia olketa formimap wanfala embyro. So lo tingting blo mi, samwan wea barava wise nao hem designim.

“Lo tingting blo mi, toktok lo Bible wea stap lo Sams 139:15, 16 abaotem hao wanfala embyro grow insaed bele blo mami, hem semsem witim wanem olketa scientist discoverem abaotem diswan. So hao nao olketa lo bifor kam yet savve raet abaotem barava stretfala information olsem? Masbi Creator nao talem man hia for raetem datwan.”

Watchim video Rocío Picado Herrero: A Chemistry Teacher Explains Her Faith. Search for datfala video title lo jw.org.