First King Bilong Israel Go Kasem Taem Olketa Kamap Prisoner Long Babylon

Saul kamap first king bilong Israel. Bat Jehovah rejectim hem, and hem chusim David for kamap king. Iumi bae lanem plande samting abaotem David. Taem hem wanfala young man, hem faet witim datfala giant Goliath. Bihaen, hem ranawe from King Saul wea hem jealous. Then Abigail wea luk naes tumas hem stopem hem for duim wanfala krangge samting.

Then iumi bae lanem plande samting abaotem son bilong David, Solomon, wea changem David olsem king bilong Israel. Each wan long first thrifala king bilong Israel olketa rul for 40 year. Bihaen Solomon hem dae, Israel hem divaed long tufala kingdom, wanfala kingdom long north and wanfala long south.

Datfala 10-tribe kingdom long north hem stap for 257 year bifor olketa long Assyria finisim hem. Then 133 year bihaen, tu-tribe kingdom long south hem finis tu. Long taem hia nao olketa Israelite kamap prisoner long Babylon. So Part FOA hem storyim 510 year bilong history, wea iumi bae lukim plande difren kaen interesting samting wea happen insaed datfala taem.