Resurrection Bilong Jesus Go Kasem Taem Paul Stap Long Prison

Long mek-thri day bihaen hem dae, Jesus hem resurrect. Long datfala day, hem showim hemseleva long olketa follower bilong hem long faevfala difren taem. Jesus gohed for showim hemseleva long olketa for 40 day. Then, taem samfala disaepol bilong hem lukluk, Jesus hem go ap long heven. Tenfala day bihaen, God pourimaot holy spirit long olketa follower bilong Jesus wea weit long Jerusalem.

Bihaen, olketa enemy bilong God putim olketa aposol long prison, bat wanfala angel mekem olketa kamap free. Samfala wea againstim Stephen killim hem dae. Bat iumi bae lanem hao Jesus chusim wanfala wea againstim hem for kamap spesol servant bilong hem, and hem nao aposol Paul. Then, thri and haf year bihaen long dae bilong Jesus, God sendem aposol Peter for preach long Cornelius.

Samting olsem 13 year bihaen, Paul startim firstfala preaching gogo bilong hem. Long mek-tu gogo, Timothy go witim Paul. Iumi bae lanem hao plande interesting samting happen long Paul and olketa wea gogo witim hem taem olketa servem God. Gogo, olketa putim Paul long prison long Rome. Tufala year bihaen, hem kamap free, bat olketa putim hem long prison moa and killim hem dae. Olketa samting wea happen long PART 7 happen insaed samting olsem 32 year.