Hao for Faendem Trufala Religion

Sapos iu want for kamap wanfala fren bilong God, iu mas followim religion wea God appruvim. Jesus talem hao “olketa trufala worshiper” bae worshipim God followim “truth.” (John 4:23, 24) Only wanfala stretfala wei for worshipim God hem stap. (Ephesians 4:4-6) Trufala religion lead go for laef olowe, and false religion lead go for dae.—Matthew 7:13, 14.

Iu savve luksavve long trufala religion taem iu lukluk long pipol wea followim. From Jehovah hem gud, olketa trufala worshiper bilong hem mas gud pipol tu. Olsem wanfala gud orange tree hem garem gud orange frut, trufala religion tu garem gud pipol.—Matthew 7:15-20.

Olketa fren bilong Jehovah garem bigfala respect for Bible. Olketa savve hao Bible hem kam from God. Olketa letem wanem hem talem for gaedem laef bilong olketa, for stretem problem bilong olketa, and for helpem olketa for lane abaotem God. (2 Timothy 3:16) Olketa trae for followim wanem olketa preachim.

Olketa fren bilong Jehovah showim love long narawan. Jesus showim love long pipol taem hem teachim olketa abaotem God, taem hem healim olketa wea sik. Olketa wea followim trufala religion showim love long narawan tu. Olsem Jesus, olketa no lukdaon long olketa wea poor or wea kam from difren ples. Jesus talem hao pipol bae savve long olketa disaepol bilong hem from love wea olketa showim long narawan.—John 13:35.

Olketa fren bilong God honorim nem bilong God, Jehovah. Sapos samwan no willing for iusim nem bilong iu, waswe, datfala man hem klos fren bilong iu? Nomoa nao! Taem iumi garem wanfala fren, iumi iusim nem bilong hem and iumi talem gudfala samting abaotem datfala fren long nara pipol. So olketa wea laek for kamap fren bilong God shud iusim nem bilong hem and tok abaotem hem long nara pipol. Jehovah laekem iumi for duim datwan.—Matthew 6:9; Romans 10:13, 14.

Olsem Jesus, olketa fren bilong God teachim pipol abaotem Kingdom bilong God. Kingdom bilong God nao hem gavman long heven wea bae mekem earth for kamap wanfala paradaes. Olketa fren bilong God talemaot disfala gud nius abaotem Kingdom bilong God long olketa narawan.—Matthew 24:14.

Olketa Jehovah’s Witness trae for kamap olketa fren bilong God. Olketa respectim Bible and olketa garem love midolwan long olketa seleva. Olketa iusim and honorim tu nem bilong God and teachim narawan abaotem Kingdom bilong God. Olketa Jehovah’s Witness followim trufala religion long earth tuday.