Changem Voice

FOR iusim simpol wei for strongim word hem helpem audience for minim samting wea iu talem. Bat pipol bae enjoyim tok bilong iu long big wei moa taem iu mekius long olketa difren wei for changem laod, fast, and wei for apim or daonem voice. Winim datwan, wei wea iu duim olsem bae mekem audience savve long feeling bilong iu abaotem samting wea iu talem. Wei wea iu ting long datfala information savve affectim feeling bilong olketa abaotem datwan tu. Diswan hem tru nomata iu toktok long platform or long man wanwan long field ministry.

Voice bilong man hem wanfala nambawan instrument, fit for duim staka difren samting. For iusim long stretfala wei savve mekem wanfala tok interesting, kasem heart, muvim feeling, and muvim pipol for duim samting. Bat, iu no savve duim diswan nomoa long wei for putim mark insaed olketa note bilong iu for showim iu ples wei iu mas changem laod, fast, or for apim or daonem voice. For changem voice followim mark olsem bae here nogud. Winim wei for mekem tok bilong iu interesting, datwan maet mekem audience feel nogud. For iusim wei for changem voice long stretfala wei hem kam from heart.

Taem hem iusim long wisefala wei, wei for changem voice bae no mekem pipol tingim speaker nomoa. Bat, hem bae helpem audience for kasholem really mining bilong datfala subject wea hem storyim.

Changem Laod. Wanfala wei for changem wei wea iu story hem for changem laod bilong iu. Bat diswan mas no wei for apim or daonem laod long wei wea semsem evritaem. For duim olsem savve spoelem mining bilong samting wea iu talem. Sapos iu apim laod staka taem tumas, bae hem here nogud.

Laod bilong iu mas fitim datfala information. Nomata iu readim wanfala komand wea important tumas, olsem Revelation 14:6, 7 or Revelation 18:4, or wanfala toktok wea showimaot strong, olsem Exodus 14:13, 14, hem gud for apim laod long wei wea fitim. Long sem wei, sapos iu readim wanfala strongfala judgment from Bible, olsem long Jeremiah 25:27-38, wei for changem laod bilong iu bae mekem samfala toktok showaot klia.

Tingim tu, goal bilong iu. Waswe, iu want for muvim audience for duim samting? Waswe, iu want for mekem olketa main point insaed tok bilong iu showaot klia? For toktok moa laod long balance wei savve helpem iu for kasem olketa goal hia. Bat, for apim laod bilong iu nomoa maet spoelem goal bilong iu. Long wanem wei? Samting iu talem maet needim feeling, no wei for moa laod. Iumi bae storyim diswan long Study 11.

Sapos iumi duim witim fasin for luksavve, wei for daonem laod savve muvim audience for luk forward long samting. Bat for duim olsem planti taem needim man for strongim saond bilong voice stretawe bihaen. Wei for daonem laod and strongim saond bilong voice hem fitim for showimaot wari or fraet. For daonem laod maet showimaot tu hao samting wea iu talem hem no important olsem olketa nara samting wea stap raonem. Bat, sapos voice bilong iu evritaem kwaet tumas, diswan maet mekem audience tingse iu no sure or no biliv strong or no really interest long subject bilong iu. Tru tumas, speaker mas careful hao nao hem iusim barava low voice.

Changem Fast Bilong Iu. Long toktok bilong iumi evriday, olketa word kamaot isi nomoa taem iumi talemaot tingting bilong iumi. Taem iumi hapi tumas, iumi tok fast. Taem iumi laekem narawan for barava no forgetim samting wea iumi talem, iumi talem moa slow.

Bat, planti niu speaker no changem fast bilong olketa. Why nao olsem? From olketa tingting tumas nomoa long olketa word for talem. Maet olketa raetem evri samting. Nomata sapos hem no readim from wanfala manuscript, hem maet baeheartim olketa word. From diswan, hem talem evri samting long wei wea semsem nomoa. For lane for givim tok from aotlaen bae help for stretem disfala problem.

Stap klia long wei for kwiktaem change for moa fast wea olsem wanfala puskat wea wakabaot and seknomoa hem jamp taem hem lukim wanfala dog. And no enitaem tok fast tumas wea mekem iu no talem stret olketa word.

For changem fast bilong iu, no tok moa fast and tok moa slow followim wanfala set wei nomoa. Wei olsem bae spoelem information long tok bilong iu winim wei for mekem hem moa interesting. Mas changem fast for fitim samting wea iu talem, feeling wea iu laek for showimaot, and goal bilong iu. Givim tok long wei wea no fast tumas. For givim idea bilong hapi, tok moa fast, olsem iu duim taem iu story evriday. Diswan hem fitim tu taem iu talem olketa point wea no important tumas or storyim samting wea happen bat wea evri information insaed long datwan no barava important. Diswan bae mekem tok bilong iu garem olketa difren part insaed and stopem wei for mekem hem here olsem serious tumas. Long narasaed, olketa pruv wea moa important, and olketa main point, planti taem needim speaker for tok moa slow.

Apim or Daonem Voice Bilong Iu. Tingim sapos samwan pleim music instrument for samting olsem wan hour. For full hour, hem pleim wanfala saond nomoa—firstaem laod, then long kwaet wei, long samfala taem hem pleim kwiktaem, then slow. Hem changem fast and laod, bat from hem pleim wanfala saond nomoa, datfala “music” hem no mas naes. Long sem wei, sapos iumi no apim or daonem voice, bae hem no here gud.

Iumi mas luksavve hao wei for apim or daonem voice hem no duim sem samting long evri languis. Long samfala languis wea mekhae long saond, olsem Chinese, planti taem wei for apim or daonem voice maet changem mining bilong wanfala word. Nomata olsem, long languis olsem, man savve duim samfala samting for changem voice bilong hem. Hem savve trae for mekem moa big wei wea hem savve apim or daonem voice bilong hem and long semtaem keepim olketa saond bilong hem semsem. Long wei olsem hem savve mekem olketa hae saond moa hae and olketa low saond moa low.

Nomata long olketa languis wea no mekhae long saond, wei for apim or daonem voice savve givim planti difren mining. Olsem example, wei for lelebet apim voice and apim laod maet gud for strongim mining. Or wei for apim or daonem voice savve showimaot size or farawe bilong samting. Wei for apim voice long end bilong wanfala sentence maet showimaot hem wanfala kwestin. Samfala languis maet iusim wei for daonem voice.

Wei for apim voice savve showimaot hapi and strong. (Long wanfala languis wea mekhae long saond, hem maet needim wei for apim or daonem voice long wei wea moa big.) Sorre and wari maet needim voice wea moa low. (Or long languis wea mekhae long saond, for no apim or daonem voice tumas.) Olketa feeling wea iumi storyim hia savve helpem speaker for kasem heart. Taem iu want for talemaot, no just talem olketa word nomoa. Iusim voice bilong iu long wei wea showaot iu feelim diswan tu.

Putim Wanfala Faondeson. So wea nao wei for changem voice hem start? Hem start long information wea iu chusim for tok bilong iu. Sapos iu chusim olketa pruv nomoa, or encouragement nomoa, iu bae no garem chance for talem samting long difren wei insaed tok bilong iu. So ting raonem aotlaen bilong iu, and mek sure iu garem kaen information wea savve mekem tok bilong iu interesting.

Tingim sapos long midol long tok, iu luksavve long need for duim samfala change bikos hem go ahed semsem nomoa. Wanem nao iu savve duim? Changem wei wea iu storyim datfala information. Hao? Wanfala wei hem for openem Bible, invaetem audience for openem Bible bilong olketa, and readim wanfala scripture winim wei for toktok nomoa. Or changem wanfala toktok for kamap wanfala kwestin, and iusim wei for stop lelebet for strongim datwan. Iusim wanfala tokpiksa. Hem nao olketa teknik wea olketa speaker wea garem savve iusim. Bat nomata haomas savve iu garem, iu savve iusim olketa sem idea taem iu preparem information bilong iu.

Wei for changem voice hem nao samting wea mekem tok interesting. Sapos iu iusim inaf and long stretfala wei, hem bae barava mekem datfala information kamaot klia and mekem audience bilong iu hapi long hem.