LESON 8
Josiah Fren Witim Pipol wea Duim Stret Samting
Waswe, iu tingse hem hard for duim stret samting?— Samfala taem hem no isi. Bible storyim wanfala boy wea nem bilong hem Josiah. Hem barava no isi for hem duim stret samting. Bat hem garem olketa fren wea helpem hem for duim datwan. Distaem bae iumi storyim samting Bible talem abaotem Josiah and olketa fren bilong hem.
Amon nao dadi bilong Josiah, and hem king bilong Judah long datfala taem. Amon hem wanfala nogud man wea worshipim olketa idol. Bihaen hem dae, nomata Josiah hem eit year nomoa, hem kamap king bilong Judah! Waswe, iu tingse hem nogud king olsem dadi bilong hem?— Nomoa, hem no olsem!
Zephaniah warnim pipol for no worshipim olketa idol
Nomata Josiah hem smol boy, hem laek for obeyim Jehovah. So hem fren nomoa witim pipol wea lovem Jehovah. And olketa helpem Josiah for duim stret samting. Hu nao samfala fren bilong Josiah?
Wanfala fren bilong hem nao Zephaniah. Zephaniah hem wanfala profet wea warnim pipol bilong Judah sapos olketa worshipim olketa idol, olketa bae kasem nogud samting. Josiah followim warning bilong Zephaniah and no worshipim olketa idol. Hem worshipim Jehovah nomoa.
Nara fren bilong Josiah hem Jeremiah. Hem klosap sem age olsem Josiah and tufala growap tugeta. Tufala best fren, dastawe taem Josiah dae Jeremiah raetem wanfala spesol song wea showimaot hem barava missim Josiah. Jeremiah and Josiah helpem each other for duim stret samting and for obeyim Jehovah.
Josiah and Jeremiah helpem each other for duim stret samting
Wanem nao iu savve lanem from gudfala example bilong Josiah?— Nomata taem Josiah hem smol boy, hem laek for duim stret samting. Hem savve hem gud samting for fren witim pipol wea lovem Jehovah. Hem gud tu for iu fren witim olketa wea lovem Jehovah bikos olketa savve helpem iu for duim stret samting.