Wanfala Kingdom wea Bae Rulim Full Earth

Iu savve wanem Kingdom nao iumi story abaotem?— Hem Kingdom bilong God wea bae mekem earth kamap paradaes. Waswe, iu laek savve moa abaotem disfala Kingdom?—

Evri kingdom hem garem king. And datfala king rulim pipol wea stap long kingdom bilong hem. Iu savve hu nao King long Kingdom bilong God?— Hem nao Jesus Christ and hem stap long heven. Klosap nao hem bae rulim evriwan long earth! Waswe, iu tingse iumi evriwan bae hapi taem Jesus rulim full earth?—

Iumi bae barava hapi! Long Paradaes, pipol bae no raoa or faet long war. Evriwan bae lovem each other. No eniwan bae sik or dae. Olketa wea blind bae savve lukluk moa, olketa wea earpas bae savve herehere moa, and olketa wea leg bilong olketa nogud bae savve ran and jamp. Staka kaikai bae stap for evriwan. And olketa animal bae plei witim olketa nara animal, and iumi bae plei witim olketa tu. Olketa wea dae finis bae laef bak. Staka man and woman wea iumi lane abaotem long disfala brochure, olsem Rebekah, Rahab, David, and Elijah, bae laef bak tu! Waswe, bae iu laek for meetim olketa long Paradaes?—

Jehovah lovem iu and hem laekem iu for garem gudfala laef. Sapos iu gohed for lane abaotem Jehovah and duim wanem hem laekem, bae iu savve stap olowe long Paradaes! Waswe, iu laek for stap long there?—