Followim Example Bilong Jesus wea . . .

SORRE LONG NARAWAN

Staka samting wea iumi olketa man wari abaotem and olketa hard taem wea kasem iumi, Jesus no kasem bikos hem man wea perfect. Nomata olsem, hem sorre long pipol. Hem barava willing for duim gud samting for olketa nomata olketa no askem hem bikos hem sorre long olketa. Lukim olketa example long Chapter 32, 37, 57, 99.

PIPOL FEEL FREE FOR STORY WITIM HEM

Nomata olketa young wan and olketa olo, evriwan feel free for story witim Jesus bikos hem no act olsem hem important winim olketa or busy tumas for story witim olketa. Pipol luksavve Jesus interest long olketa, so olketa hapi for stap witim hem. Iu savve read abaotem diswan long Chapter 25, 27, 95.

PREA EVRITAEM

Jesus evritaem prea long Dadi bilong hem. Hem prea taem hem stap seleva and taem hem stap witim olketa narawan wea worshipim Jehovah. Hem no prea for kaikai nomoa, bat hem prea for thankiu long Dadi bilong hem, praisem hem, and bifor hem mekem olketa important disison. Ting raonem olketa example long Chapter 24, 34, 91, 122, 123.

NO SELFISH

Jesus no tingim hemseleva. Samfala taem hem gohed for helpem olketa narawan nomata hem barava laek for rest and relax lelebet. Jesus showimaot nambawan example for iumi long diswan tu. Studyim wanem Jesus duim wea showimaot datwan long Chapter 19, 41, 52.

WILLING FOR FORGIVE

Jesus no just teachim olketa disaepol bilong hem for forgivim narawan, bat hem tu showimaot example long diswan taem hem forgivim olketa and nara pipol. Ting raonem olketa example long Chapter 26, 40, 64, 85, 131.

STRONG FOR SAPOTIM TRU WORSHIP

Olketa profesi showimaot plande Jew bae rejectim datfala Messiah and olketa enemy bae killim hem dae. Nomata Jesus savve finis long datwan, hem no hol bak for helpem pipol bat hem strong for sapotim tru worship. Evri disaepol bilong hem wea olketa narawan againstim and spoelem olketa savve lane from example bilong hem. Lukim Chapter 16, 72, 103.

HAMBOL

From Jesus hem perfect, hem savve duim eni samting, and wisdom and savve wea hem garem hem barava winim olketa man wea no perfect. Nomata olsem, hem hambol for helpem pipol. Bae iu lane abaotem datwan long Chapter 10, 62, 66, 94, 116.

PATIENT

Jesus evritaem patient witim olketa aposol and olketa narawan taem olketa no followim example bilong hem and no duim wanem hem talem olketa for duim. Hem patient and willing for teachim moa samfala samting wea hem teachim olketa finis mekem olketa savve fren gud witim Jehovah. Ting raonem olketa example long Chapter 74, 98, 118, 135.