Leta From Governing Body

Dear Olketa Pablisa blo Gud Nius:

Hem spesol privilege for iumi wan mind for worshipim only tru God Jehovah! Iumi “waka tugeta” witim hem lo disfala holy waka for sevem laef blo pipol wea hem nao for preachim and teachim gud nius abaotem Kingdom blo hem. (1 Cor. 3:9; Matt. 28:19, 20) For wan mind and garem peace taem iumi duim disfala waka evriwea lo world, iumi mas barava organize.​—1 Cor. 14:40.

Disfala buk bae helpem iu for minim hao Christian Kongregeson hem organize distaem. Hem storyim olketa privilege and responsibility wea iu garem olsem wanfala Jehovah’s Witness. If iu tinghae lo privilege blo iu and duim olketa responsibility blo iu, faith blo iu bae “gohed for kamap strong.”​—Acts 16:4, 5; Gal. 6:5.

So mifala encouragem iu for barava studyim gud disfala buk. Ting raonem hao iu savve applyim olketa information hia lo laef blo iu. For example, if iu just anbaptaes pablisa, wat nao olketa samting wea iu mas duim mekem iu fit for baptaes olsem wanfala Jehovah’s Witness? Bat if iu baptaes finis, wat nao iu savve duim for grow lo spiritual wei and duim moa samting lo service blo Jehovah? (1 Tim. 4:15) Wat nao iu savve duim for keepim peace insaed kongregeson? (2 Cor. 13:11) Faendem ansa for olketa kwestin hia insaed disfala buk.

If iu wanfala brata, wat nao iu savve duim mekem iu qualify for waka olsem ministerial servant and bihaen kamap wanfala elder? From staka thousand niu wan gohed for kam insaed organization blo God, iumi barava needim olketa brata wea qualify for lukaftarem olketa. Disfala buk bae helpem iu for savve lo wat for duim for kasem olketa spiritual goal hia.​—1 Tim. 3:1.

Mifala prea hao disfala buk bae helpem iu for savve lo waka blo iu insaed organization blo Jehovah and for tinghae lo datwan. Mifala barava lovem iufala evriwan and gohed for prea dat iu bae wanfala lo olketa wea hapi for worshipim dadi blo iumi lo heven, Jehovah, for olowe.​—Ps. 37:10, 11; Isa. 65:21-25.