God Wakem Skae and Earth

Jehovah God nao Creator blo iumi. Hem wakem evri samting, olketa samting wea iumi savve lukim and olketa samting wea iumi no savve lukim. Bifor hem wakem olketa samting wea iumi savve lukim, hem wakem staka angel. Hu nao olketa angel? Olketa angel hem olketa spirit olsem Jehovah. Iumi no savve lukim olketa, olsem God tu iumi no savve lukim. First angel wea Jehovah wakem, hem kamap helper blo hem. Datfala angel helpem Jehovah for wakem olketa star, olketa planet, and evri nara samting. Wanfala lo olketa planet hia hem earth, wea hem beautiful hom blo iumi.

Then Jehovah redyim earth for olketa animal and iumi olketa man for stap lo hem. Hem mekem laet from sun for shaen kam lo earth. Hem wakem olketa maunten, sea, and olketa river.

Wat moa Jehovah wakem? Jehovah sei: ‘Bae mi wakem olketa grass and olketa plant and olketa tree.’ Staka difren kaen frut, vegetable, and olketa difren kaen flaoa start for grow. Then Jehovah wakem evri animal, olketa animal wea savve flae, swim, and krol. Hem wakem olketa smol animal, olsem olketa rabbit, and olketa big animal, olsem olketa elephant. Wat nao fevaret animal blo iu?

Then Jehovah sei lo datfala first angel: “Iumi wakem man.” Olketa man difren from olketa animal. Olketa savve designim samting. Olketa savve toktok, laflaf, and prea. Olketa bae lukaftarem earth and olketa animal. Iu savve hu nao first man wea God wakem? Bae iumi lukim.