Eitfala Nomoa Sev

Noah, famili blo hem, and olketa animal go insaed datfala ark. Jehovah satem door blo ark hia and hem start for rain. Hem rain gogo datfala ark start for float nao. And wata kavarem full earth. Evri nogud pipol wea stap aotsaed olketa dae. Bat Noah and famili blo hem stap sev insaed. Masbi olketa hapi tumas bikos olketa obeyim Jehovah, iaman?

Hem gohed rain for 40 days and 40 naet, then hem stop. Isisi wata hem go daon. Gogo, ark hem sidaon ontop lo maunten. Bat evriwea samfala wata still stap yet, so Noah and famili blo hem no savve go aot yet from ark.

Isisi, wata hia hem start for drae. For winim wan year nao Noah and famili blo hem stap insaed ark. Then Jehovah talem dat olketa savve go aot from ark and stap lo wanfala world wea no eni nogud pipol stap. Olketa tinghae tumas lo wei wea Jehovah sevem olketa, and olketa showim datwan taem olketa mekem offering go lo Jehovah.

Jehovah hapi lo offering wea olketa mekem. Hem promis dat no enitaem bae hem iusim moa flood for distroem evri samting lo earth. Hem mekem first rainbow appear lo skae olsem saen for datfala promis. Enitaem iu lukim rainbow?

Then Jehovah talem Noah and famili blo hem for garem olketa pikinini and fulimap disfala earth.