Taoa blo Babel

Afta Flood, olketa son blo Noah and waef blo olketa garem staka pikinini. Famili blo olketa staka, and olketa start for go stap lo olketa difren ples lo earth, olsem Jehovah bin talem olketa for duim.

Bat samfala lo olketa famili hia no obeyim Jehovah. Olketa sei: ‘Kam iumi buildim wanfala taon and stap lo hia. Iumi buildim wanfala taoa wea bae hae go kasem skae. Mekem evriwan mekhae lo nem blo iumi.’

Jehovah no hapi lo samting wea pipol hia duim, so hem disaed for stopem olketa. Iu savve wat nao Jehovah duim? Seknomoa hem mekem olketa story lo olketa difren languis. From olketa no savve minim each other, datfala waka hem stop nao. Datfala taon wea olketa buildim olketa kolem lo Babel, wea minim “Konfius.” Pipol start for muv aot and go stap evriwea lo earth. Bat olketa gohed duim olketa nogud samting lo olketa ples hia wea olketa stap lo hem. Hao, eniwan still lovem Jehovah? Iumi bae lukim lo next leson.