Moses Chus for Worshipim Jehovah

Lo Egypt, pipol savve lo famili blo Jacob olsem olketa Israelite. Afta Jacob and Joseph dae, wanfala niu Pharaoh start for rul. Pharaoh hia fraet nogud olketa Israelite staka and strong winim olketa lo Egypt. So hem mekem olketa Israelite for slave. Hem forcem olketa for wakem olketa brik and for waka hard lo datfala land. Bat taem olketa lo Egypt forcem olketa for waka hard, olketa Israelite just staka go moa. Pharaoh no laekem datwan, so hem givim komand for killim dae evri baby boy blo olketa Israelite. Masbi olketa Israelite fraet tumas, iaman?

Wanfala Israelite woman wea nem blo hem Jochebed garem wanfala baby boy wea luk naes tumas. For protectim datfala baby, Jochebed putim hem insaed wanfala basket and haedem between olketa grass lo Nile River. Sista blo baby hia, wea nem blo hem Miriam, standap klosap lelebet for lukim wat nao bae happen.

Dota blo Pharaoh kam for swim lo datfala river and lukim datfala basket. Taem hem openem basket hia, datfala baby hem krae, and hem sorre lo hem. Miriam sei: ‘Hao, iu laekem mi for go talem wanfala woman for lukaftarem disfala baby for iu?’ Taem dota blo Pharaoh agree lo datwan, Miriam go talem mami blo hem, Jochebed for kam. Dota blo Pharaoh sei lo hem: ‘Tekem disfala baby, lukaftarem for mi and bae mi peim iu.’

Taem datfala pikinini hem big, Jochebed tekem hem go lo dota blo Pharaoh, hem nemim hem lo Moses and hem kamap son blo dota blo Pharaoh. Moses grow ap olsem wanfala prince and hem savve kasem eni samting wea hem laekem. Bat Moses hem no forgetim Jehovah. Hem savve hem wanfala Israelite, hem no wanfala Egyptian. And hem chus for worshipim Jehovah.

Taem Moses 40 years old, hem disaed for go helpem pipol blo hem. Taem Moses lukim wanfala Egyptian man whipim wanfala Israelite slave, hem killim dae datfala Egyptian man. Then Moses haedem body blo man hia lo sandbis. Taem Pharaoh faendaot, hem laek for killim dae Moses. Bat Moses ranawe go lo land lo Midian. And Jehovah lukaftarem hem taem hem stap lo there.