Jesus Wakabaot Ontop Sea

Jesus no just healim olketa wea sik and resurrectim olketa wea dae, bat hem savve kontrolem wind and rain tu. Afta Jesus prea lo maunten, hem luk go daon lo Sea blo Galilee and lukim wanfala storm. Olketa aposol blo hem insaed boat, olketa stragol for padol againstim wind. Jesus kam daon and start for wakabaot ontop lo sea for go lo boat blo olketa. Taem olketa aposol lukim samwan wakabaot kam ontop lo sea olketa start for fraet. Bat Jesus sei lo olketa: ‘Mi nomoa ia. Iufala no fraet.’

Peter sei: ‘Lord, if olsem, talem mi for wakabaot kam lo iu.’ Jesus sei lo Peter: ‘Iu kam.’ So Peter go aot from boat and wakabaot go lo Jesus ontop sea lo datfala storm. Bat taem hem klosap kasem Jesus, hem lukim strong wind hia and hem fraet nao. Hem start for sink daon. Peter singaot olsem: ‘Lord, sevem mi!’ Jesus holem hand blo hem and sei: ‘Why nao iu garem daot olsem? Hao, iu no garem faith?’

Jesus and Peter go insaed boat and semtaem nomoa storm hia stop nao. Iu ting hao nao feeling blo olketa aposol? Olketa sei: “Tru nao, iu Son blo God.”

Diswan hem firstaem wea Jesus kontrolem weather. Nara taem, taem Jesus and olketa aposol blo hem go insaed boat for akros go lo nara saed lo sea, Jesus hem sleep bihaen lo boat. Taem hem sleep, wanfala big wind hem blow kam. Olketa wave bangam datfala boat and wata fulap insaed. Olketa aposol wekapem Jesus, and singaot olsem: ‘Teacher, iumi klosap dae nao! Helpem iumi!’ Jesus wekap and sei lo sea: “Kwaet nao!” Semtaem nomoa, wind hem stop and sea hem fine nao. Jesus sei lo olketa aposol: ‘Hao, iufala no garem faith yet?’ Olketa sei lo each other: “Nomata wind and sea bat obeyim hem tu.” Olketa aposol lanem dat if olketa barava trustim Jesus, olketa bae no need for fraetem eni samting.