No Eni Samting Savve Stopem Olketa

Wanfala man wea leg blo hem nogud savve sidaon lo gate blo temple evriday for askem selen. Lo wanfala aftanun, hem lukim Peter and John wakabaot go insaed lo temple. Hem sei lo tufala: ‘Plis givim mi eniting.’ Peter sei: ‘Wat mi garem for givim lo iu hem gud winim selen. Lo nem blo Jesus, iu getap and wakabaot!’ Then Peter helpem datfala man for standap, and hem start for wakabaot! Evri pipol wea lukim diswan olketa hapi tumas lo datfala mirakol and datwan mekem staka pipol moa for Christian.

Bat olketa priest and olketa Sadducee kros tumas. Olketa grabim olketa aposol and tekem olketa go lo kot, and kwestinim olketa olsem: ‘Hu nao givim iufala paoa for healim disfala man?’ Peter sei: ‘Mifala kasem paoa from Jesus Christ, wea iufala killim dae.’ Olketa leader blo religion singaot olsem: ‘Stop for story abaotem Jesus!’ Bat olketa aposol sei: ‘Mifala mas story abaotem hem. Mifala bae no stop.’

Semtaem olketa releasem Peter and John, tufala go lo olketa nara disaepol and storyim evri samting wea happen. Olketa prea tugeta and askem Jehovah: ‘Plis helpem mifala for no fraet mekem mifala savve gohed duim waka blo iu.’ Jehovah givim holy spirit lo olketa, and olketa continue for preach and healim pipol. Staka pipol moa olketa biliv. Olketa Sadducee jealous fogud so olketa arrestim olketa disaepol and putim olketa lo prison. Bat lo datfala naet, Jehovah sendem wanfala angel for openem olketa door lo prison and angel hia talem olketa aposol: ‘Go bak lo temple, and teach lo there.’

Lo morning, nius kasem Sanhedrin, hae kot blo olketa Jew wea sei: ‘Prison hem still lok, bat olketa man wea iufala arrestim no stap nao! Olketa insaed lo temple and gohed teachim pipol!’ So, olketa arrestim moa olketa aposol and tekem olketa go lo Sanhedrin. Hae priest hem sei: ‘Mifala givim order for iufala no story abaotem Jesus!’ Bat Peter sei olsem: ‘Mifala mas obeyim God olsem ruler and no olketa man.’

Olketa leader blo religion kros fogud and laek for killim dae olketa aposol. Bat wanfala Pharisee wea nem blo hem Gamaliel standap and sei: ‘Iufala tingting gud firstaem bifor iufala duim eni samting! Luk olsem God stap witim olketa man hia. Hao, iufala laek for faet againstim God?’ So olketa followim advaes blo hem. Afta olketa whipim nogud olketa aposol witim olketa stik, olketa stopem olketa moa for preach, then olketa letem olketa for go. Bat datwan nating stopem olketa aposol. Olketa no fraet for gohed preachim gud nius insaed lo temple and from haos tu haos.