Cornelius Kasem Holy Spirit

Wanfala important man wea nem blo hem Cornelius stap lo Caesarea, hem wanfala army officer blo Rome. Nomata hem no man blo Jew, olketa Jew respectim hem. Hem kaen lo olketa wea poor and helpem olketa wea needim help. Cornelius savve lo Jehovah and prea lo hem evritaem. Wanday, wanfala angel kam lo Cornelius and sei: ‘God hem herem olketa prea blo iu. Sendem samfala man go lo taon blo Joppa, ples wea Peter stap, and askem hem for kam lo iu.’ Semtaem nomoa, Cornelius sendem thrifala man go lo Joppa wea hem samting olsem 50 kilometer for kasem south.

Taem Peter lo Joppa hem lukim wanfala vision. Hem lukim olketa animal wea olketa Jew no savve kaikaim and hem herem wanfala angel talem hem for kaikaim. Bat Peter les and sei: ‘No eni taem lo laef blo mi, mi kaikaim olketa animal wea no klin.’ Then angel hia sei lo hem: ‘Iu no sei olketa animal hia no klin. God mekem olketa klin nao.’ Then God sei moa lo Peter: ‘Thrifala man nao lukaotem iu. Go witim olketa.’ Peter go lo olketa man hia and askem olketa why nao olketa lukaotem hem. Olketa sei: ‘Wanfala army officer blo Rome wea nem blo hem Cornelius nao sendem mifala kam. Iu mas kam lo haos blo hem lo Caesarea.’ Peter invaetem olketa man hia for stap lo haos blo hem lo datfala naet. Lo next day, hem go witim olketa lo Caesarea, witim samfala brata from Joppa.

Taem Cornelius lukim Peter, hem baodaon. Bat Peter sei: ‘Standap! Mi man olsem iu nomoa ia. God talem mi for kam lo haos blo iu, nomata olketa Jew no savve go lo haos blo olketa Gentile. Plis talem mi why nao iu laekem mi for kam.’

Cornelius sei lo Peter: ‘Fo days ago mi prea lo God, and wanfala angel talem mi for sendem samfala man for kam lo iu. Plis teachim mifala abaotem Jehovah.’ Peter sei: ‘Mi lanem dat God no fevarem eniwan. Hem acceptim eniwan wea laek for worshipim hem.’ Peter teachim olketa staka samting abaotem Jesus. Then Cornelius and olketa wea stap lo there kasem holy spirit, and olketa evriwan baptaes.