Leta From Governing Body

Dear Olketa Brata and Sista:

From iumi lovem God and pipol datwan mekem iumi for “go and teachim pipol long evri kantri for kamap disaepol bilong mi. Baptaesim olketa.” (Matt. 28:​19, 20; Mark 12:​28-31) Love hem garem paoa. Taem iumi showimaot love, hem bae kasem heart blo pipol wea “showimaot olketa laekem laef olowe.”—Acts 13:48.

Bifor, main samting iumi duim hem for memorizim olketa presentation and givimaot literature. Distaem iumi need for impruv lo hao for story witim pipol. Iumi showim iumi lovem olketa narawan taem iumi storyim subject wea olketa interest lo hem. Datwan minim iumi mas willing for changem story and luksavve lo wat nao each wan wari abaotem and interest lo hem. Hao nao disfala brochure bae helpem iumi for duim datwan?

Disfala brochure garem 12-fala leson wea storyim olketa wei wea iumi need for garem mekem iumi showim love and mek disaepol. Each leson hem base lo wanfala story lo Bible abaotem wanfala wei wea Jesus or olketa Christian lo first century garem taem olketa duim ministry. Goal blo disfala brochure hem for helpem iumi luk for olketa difren wei for showim iumi lovem pipol and no for memorizim olketa presentation. Nomata iumi need for garem olketa wei hia taem iumi duim ministry, bae iumi storyim samfala wei wea iumi need for garem taem iumi startim story, duim return visit, and conductim Bible study.

Taem iu studyim each leson, ting raonem gud hao iu savve showim datfala wei taem iu story witim pipol lo community blo iu. Traem best for strongim love blo iu for Jehovah and for pipol. Datfala love nao bae helpem iu for kasem goal blo iu for mek disaepol.

Mifala tinghae tumas lo disfala privilege for waka tugeta witim iu. (Zeph. 3:9) Jehovah bae blessim iu taem iu gohed for lovem pipol and mek disaepol!