Introduction
GOAL BLO DISFALA PABLIKESON
Jehovah God talem pipol blo hem for ‘gohed lukaotem’ savve and wei for minim samting lo sem wei wea olketa bae lukaotem “riches wea haed.” (Prov. 2:1-5) Datwan minim iumi mas waka hard for faendem ansa for olketa kwestin wea iumi garem abaotem Bible and for kasem help wea iumi needim lo laef. Disfala Research Index for Olketa Jehovah’s Witness bae helpem iu for duim datwan.
Disfala index no listim evri subject wea olketa pablikeson blo iumi storyim. Nomata olsem, lo disfala index iu bae lukim samfala reference for information wea savve helpem iu wea stap lo olketa pablikeson lo Solomon Islands Pidgin. Staka reference hia hem from olketa pablikeson start kam lo year 2000.
HAO FOR IUSIM DISFALA BUK FOR FAENDEM INFORMATION
Lukim list blo olketa subject lo next page wea garem heding Insaed. Chusim which subject nao maet storyim information wea iu laekem. Maet iu need for lukluk lo winim wanfala heding for faendem information wea iu laekem. Olketa subheding wea stap anda lo main heding bae helpem iu for faendem information wea iu laekem.
Then, go lo page namba wea list showim and faendem datfala subject and subheding. Lukluk lo title blo olketa article and chapter lo datfala list, and chusim olketa reference wea iu laek for chekim. Iusim olketa pablikeson lo haos blo iu or lo Kingdom Hall for faendem article or chapter wea stap lo datfala list. Plis tingim, nomata hem maet luk olsem title blo samfala article no join witim subject wea iu laek chekim, olketa article hia bae garem samfala information abaotem datfala subject.
Sapos iu laek faendem information for helpem iu minim wanfala scripture lo Bible, lukluk lo sekson wea garem title “Mining blo Olketa Scripture.” Olketa listim nomoa olketa scripture wea information stap for explainim olketa.
No forget, bae hem tek taem and maet iu mas waka hard for faendem “olketa riches wea haed.” So iu mas patient taem iu lukaotem information wea iu needim. Sapos iu iusim disfala Research Index evritaem, gogo bae hem moa isi for iu faendem information wea iu laekem, and bae iu enjoyim tu. Jehovah bae blessim hard waka blo iu and helpem iu for faendem wisdom and minim samting.—Prov. 2:6; 4:5.
KEY:
❐ = Olketa article wea join tugeta
§ = Subheding, sekson, or part
¶ = Paragraf
chap. = Chapter
p. or pp. = Page or olketa page
No. = Namba
12/2004 = Month/Year
2/1/2010 = Month/Day/Year
Pablikeson hia garem index insaed:
Kasem Gud Samting From Theocratic Ministry Skul Education