Report Bilong Olketa wea Talemaot Kingdom
“Iufala Savve Tumas Long Bible”
TAEM Jesus wea hem 12 year no fraet for tok long olketa leader bilong religion long Jerusalem, “evriwan wea lisin long hem go ahed for barava sapraes long savve and olketa ansa bilong hem.” (Luke 2:47) Olsem tu distaem, planti young servant bilong Jehovah no fraet for story long olketa teacher and skulfren bilong olketa abaotem God and Bible, and planti taem diswan satisfaem olketa.
Tiffany, wea hem 14 year, hem insaed class wea olketa story abaotem profesi bilong Bible abaotem 70 week bilong year, long Daniel 9:24-27. Teacher hia talem lelebet samting nomoa abaotem olketa verse hia and kwiktaem go ovarem disfala subject.
Long firstaem, Tiffany hem hol bak for apim hand bilong hem. Hem sei: “Bat for samfala reason mi no hapi long wei wea olketa no explainim gud olketa verse hia. And seknomoa, mi apim hand bilong mi nao.” Datfala teacher sapraes from samwan garem samting for talem abaotem disfala subject, from planti long olketa student hard for minim diswan.
Taem olketa givim hem chance for minim profesi hia, Tiffany standap and story long wei wea hem no iusim note. Taem hem finis, evriwan insaed classrum kwaet nao. Tiffany hem seksek lelebet. Then olketa student go ahed for singaot witim hapi.
Teacher go ahed for talem and talem moa disfala toktok: “Mifala barava tinghae long datwan, Tiffany, mifala barava tinghae long datwan.” Hem luksavve maet moa samting insaed olketa verse hia, bat Tiffany nao first wan for minim klia long hem. Bihaen long class, hem askem Tiffany hao nao hem savve tumas long Bible.
“Bikos mi wanfala long olketa Jehovah’s Witness,” hem ansarem hem. “Dadi and mami bilong mi explainim datfala profesi long mi planti taem bifor mi minim.”
Olketa skulfren bilong hem tu sapraes long savve bilong hem long Bible. Wanfala student sei long Tiffany: “Mi just savve why nao iufala Olketa Jehovah’s Witness go from door tu door; hem bikos iufala savve tumas long Bible.” Olketa nara student promis for no mekfani long hem moa abaotem olketa biliv bilong hem.
Taem Tiffany talem dadi and mami bilong hem abaot experience bilong hem, olketa talem hem idea for offerim datfala buk Savvy Wea Lead Go long Laef Olawe long teacher bilong hem. Taem hem duim olsem and showim teacher part wea minim profesi bilong Daniel, hem willing for tekem buk hia and sei thankiu long hem for diswan.
Tru nao, taem olketa young Christian no fraet for toktok abaotem wanem dadi and mami bilong olketa teachim long olketa abaotem God and Bible, olketa givim praise and honor long Jehovah and blessing long olketa seleva.—Matthew 21:15, 16.