Bigfala Need for Comfort!

“Lukim! wata long eye bilong olketa wea kasem hevi, bat olketa no garem man for givim comfort; and long pipol wea putim hevi long olketa, paoa stap, mekem olketa no garem man for givim comfort.”—ECCLESIASTES 4:1.

WASWE, iu lukaotem comfort? Waswe, iu barava laekem lelebet help for kam for bigfala sorre bilong iu? Waswe, iu barava laekem lelebet comfort for mekem laef wea safa tumas and fulap witim planti saoa samting for kamap moabeta?

Iumi evriwan kasem taem wea iumi needim comfort and encouragement. Diswan hem bikos planti samting long laef mekem iumi sorre. Iumi evriwan needim haos, gudfala living, feelim love from narawan. Samfala long iumi kamap olo and iumi no hapi long diswan. Olketa narawan barava sorre from laef bilong olketa no kamap olsem olketa laekem. And samfala moa sorre from result wea olketa kasem from hospital.

Bat, staka pipol bae agree hao olketa samting wea happen long taem bilong iumi mekem bigfala need for comfort and hope kamap. Insaed century wea go pas nomoa, winim wan handred million pipol dae long war.a Klosap evriwan long olketa lusim bihaen famili wea sorre—olketa mami and dadi, olketa brata and sista, olketa widow and pikinini wea no garem dadi or mami—wea barava needim comfort. Distaem, winim wan billion pipol garem barava poor living. Haf long pipol long world no savve kasem gudfala medical treatment and medicine wea olketa needim. Long olketa dirty street bilong olketa bigfala taon planti pikinini wea lusim haos wakabaot raon nating, planti long olketa iusim drug and duim jury fasin. Planti million barava safa insaed olketa nogud camp.

Bat, olketa namba—nomata olketa important—nating showimaot pain and safa wea samfala kasem long laef bilong olketa. Tingim, Svetlana, wanfala young woman from wanfala Balkan kantri wea born long barava poor living.b Hem sei: “Dadi and mami bilong mi sendem mi go aot for beg and steal mekem mifala garem selen. Famili laef bilong mifala kamap nogud gogo mi safa from incest. Mi faendem waka long wanfala ples for kaikai, and mami bilong mi, wea tekem evri selen wea mi kasem, talem mi hao sapos mi no garem waka, bae hem killim dae hemseleva. Evri samting olsem leadim mi for kamap wanfala jury. Mi 13 year nomoa. Gogo, mi babule and mi killim dae baby insaed bele bilong mi. Taem mi 15 year, mi luk olsem mi 30 year finis.”

Laimonis, wanfala young man from Latvia, storyim hao hem needim comfort and olketa nogud samting wea happen bifor wea mekem hem feel nogud. Taem hem 29 year, hem insaed wanfala car accident wea mekem hem paralyze start long waist and go daon. Hem barava feel iusles and hem tan go long alcohol. Faevfala year bihaen hem barava nogud—man wea paralyze and depend long alcohol wea no garem hope. From wea nao hem savve kasem comfort?

Or tingim Angie. Hasband bilong hem kasem thrifala operation long brain wea mekem hem haf paralyze. Then, faevfala year bihaen last operation, hem insaed wanfala barava nogud accident, wea klosap killim hem dae. Taem waef bilong hem go insaed long hospital and lukim hasband bilong hem leidaon hafded bihaen hem kasem barava nogud kill long hed bilong hem, waef hia savve hao wanfala bigfala trabol klosap for happen. Hem savve future bilong hem and famili bae no isi. Hao nao hem savve faendem saport and encouragement?

Taem Pat wekap wanday tu-thri year bifor, hem feel evri samting olraet nomoa. Bat, hem no savve rememberim thrifala day bihaen datwan. Hasband bilong Pat talem hem hao bihaen hem kasem barava nogud pain long heart bilong hem, heart bilong hem stop for waka nao. Heart bilong hem start for waka fast tumas and olabaot, and then hem stop for waka. Hem stop for breathe. Pat sei “Mi dae nao.” Bat gogo hem laef. Hem storyim taem wea hem stap long hospital olsem: “Mi fraetem tumas enikaen test, especially taem olketa trae for mekem heart bilong mi stop moa olsem bifor.” Wanem nao savve givim hem comfort and help wea hem needim long disfala hardfala taem?

Joe and Rebecca lusim son bilong tufala wea 19 year long wanfala car accident. “Hem firstaem bilong mitufala for feisim wanfala barava nogud samting olsem,” tufala sei. “Nomata mitufala savve sorre witim olketa narawan wea lusim relative bilong olketa long dae, mitufala no barava feelim bigfala pain long heart wea mifala kasem distaem.” Wanem nao savve givim comfort long “bigfala pain long heart” olsem—feeling bilong bigfala sorre from iu lusim samwan wea iu barava lovem?

Olketa evriwan hia, and planti million moa, faendem nambawan ples for kasem comfort. For lukim hao nao iu tu savve kasem gud samting, plis readim next article.

[Olketa Footnote]

[Piksa Credit Line long page 3]

UNITED NATIONS/PHOTO BY J. K. ISAAC

UN PHOTO 146150 BY O. MONSEN