Wei for Give wea Spesol Long Eye Bilong Jehovah

Disfala leta hem kasem branch office bilong Olketa Jehovah’s Witness long Mozambique:

“Mi wanfala boy wea seven year. Mi go long primary skul yet. Mi sendem kam disfala selen wea mi kasem from mi keepim wanfala baby kokorako. Mi sellim for 12,000 Meticais [$5, S.I.]. Mi thankiu long Jehovah for mekem first baby kokorako wea mi keepim for grow kasem taem hem kamap big. Mi laekem iufala for iusim present bilong mi for waka bilong Kingdom bilong Jehovah.

“Note: Dadi bilong mi nao helpem mi for raetem disfala leta.”

Samfala pipol tingse olketa wea garem staka material samting nomoa garem kaenfala fasin. Bat, taem iumi readim story long Bible abaotem wanfala widow woman wea putim “tufala smolfala selen wea nating garem hae price” insaed long box, iumi luksavve hao kaenfala fasin hem no depend long haomas nao man givim, bat long stretfala feeling bilong heart.—Luke 21:1-4.

Jehovah tinghae long evri present, nomata smol wan, wea kam from heart wea love nao muvim. And hem givim bigfala blessing long olketa wea followim kaenfala fasin bilong hem long wei wea olketa givim taem, strong, or material samting bilong olketa for saed bilong Kingdom.—Matthew 6:33; Hebrews 6:10.